1 Aŵakolinto 2

1Naneŵo, mweŵakwasu, ili naisile kuli mweŵo mukutulisya kuli mweŵo ifyamfiso fyaŵaLesa, nsinaisile nekupuŵa kwamasiwi neli kwamano. 2Pakuti nalilandakenye mumutima, ati nsikesiŵe'fintu fimbi pakati pali mweŵo, sombi kweŋko'kuwesiwa ŵaYesu Klistu ati ŵo eŵatalicilwe kaŵili. 3Nakaŵili nali nenu ili naka nekutina nekututumo'kwakuti. 4Ukulaŵila kwanji nekutulisya kwanji takwali nemasiwi amano akutekenesya, koku; sombi kwali nekuŵoneka ukwaMupasi nekwamakosa; 5ukucetekela kwenu kwiŋgekala mumano aŵantunsi, sombi ŋgakwikale mumakosa aŵaLesa.

6Naŋgawe'fyo tulalaŵila ifyamano pakati pawakulu; sombi amano ayo taali ampindi ino, neli amfumu syampindi ino isilukuŵa syalukoso; 7sombi tulalaŵila amano aŵaLesa, amumfiso, opele afisilwe akale ayo ŵaaansicile limo ŵaLesa, lomba taiŋgatatika impindi, mukutuletelo'ŵuleme. 8Amano ayo tasiesi imfumu syampindi ino neli imo; pakuti ŋga syaesiŵile, ŋga tasyaŵatalicile ŵaSikulu ŵaŵuleme; 9sombi, koti nifyopele'fyo ifyalembelwe, ati:

Ifintu ifyo ifi talyabwene ilinso, ifi takwaumfwile ukutwi,

Ifitafyaninine pamutima wamuntunsi,

Ifintu ifyo ifi ŵaŵaansicile ŵaLesa aŵo aŵaŵatemwa.

10Sombi kuli fweŵo ŵaLesa ŵalififisulwile muMupasi; pakuti Umupasi ulacete'fintu fyonse, icine nefintu ifitali ifyaŵaLesa. 11Pakuti aŵantunsi, mbaninani uwisi ifintu fyamuntunsi, sombi weŋke'mupasi wamuntunsi uli muli ye eufiisi? Fyopele'fyo nefintu fyaŵaLesa, tapali-po ufiisi, sombi weŋko'Mupasi waŵaLesa eufiisi. 12Sombi fweŵo tatwapokele umupasi uwamucalo capansi, sombi twalipokele Umupasi ufumine kuli ŵaLesa; ati ŋgatwisiŵe ifintu ifyo ifipelwa lukoso kuli fweŵo, impese isyakufuma kuli ŵaLesa. 13Ifyo-fintu kaŵili tulalaŵila, pamasiwi asambisiwe kumano aŵantunsi tepo, sombi pali ayo ausambisya Umupasi; ili tusaŋkanya ifintu fyaMupasi nefyaMupasi. 14Lomba umuntu umwine uwacifyalilo taapoka-po ifintu ifyaMupasi waŵaLesa: pakuti ifyo kutumpa pamenso akwe; kaŵili tesi afiisiŵe, pakuti filebwa kuMupasi. 15Sombi uyo uwaMupasi eweŵe'fintu fyonse; umwine taebwa kuŵantu ŵonse neli umo. 16Pakuti mbaninani uwaesiŵile amano amumutima waŵaSikulu, ati aŵasambisye? Sombi fweŵo tuli nemano amumutima waŵaKlistu.

Currently Selected:

1 Aŵakolinto 2: AAL59

Highlight

Copy

Compare