1 Aŵakolinto 12

1Lomba ifyafintu ifyakuMupasi, mweŵakwasu, nsilukufwaya ati muŵule ukwisiŵa. 2Muliisi ati, ili mucili ŵenafyalo, mwalukukulikwa ukumutwaleni kufiŵumbwaŵumbwa ifyo ifitafilaŵila-po, koti nifyopele'fyo ifi mwalukwisa-kutwalwa. 3Pakuti pali fyefyo, ndukumwisiŵisyeni ati papo'muntu ulukulaŵila muMupasi waŵaLesa, euŋgalaŵila ati ŵaYesu ŵalifinjilwe; kaŵili papo' muntu uwisi ukulaŵila ati ŵaYesu niŵaSikulu, utaalaŵile'fyo muMupasi Uswetelele.

4Popele pali imikoka yampese, sombi epo uli Umupasi umo wopele. 5Kaŵili pali imikoka yakupyuŋga, naŵaSikulu naŵo epo ŵali ŵamo ŵopele. 6Nakaŵili pali imikoka yamilimo, naŵaLesa naŵo epo ŵali ŵamo ŵopele, aŵacita yonse muŵantu ŵonse. 7Sombi kuli ŵo ŵonse umo umo kulipelwe ukuŵoneka kwaMupasi mukuŵasyucisya. 8Pakuti kuli umbi kulipelwe muMupasi isiwi lyamano; nakuli umbi naye kulipelwe isiwi lyakwisiŵa, koti kufwaya kwaMupasi wopele: 9kuli umbi naye ukucetekela muMupasi wopele: nakuli umbi naye impese syakutendulusya muMupasi untu umo; 10nakuli umbi naye ukulukucite'fimpelampela; nakuli umbi naye ukusimika; nakuli umbi ukwisiŵisye' mipasi ukwilekanya: kuli umbi naye imikoka yamini; nakuli umbi naye ukuŵulisisya imini: 11sombi ifyo fyonse ulacita Umupasi untu umo wopele, nekwaŵanya kuli ŵo ŵonse umo umo koti kufwaya kwauo.

12Pakuti koti nifyopele'fyo ifi umuŵili uli umo, nekwikala nefilewa fyauo ifinji, nafyefyo-filewa ifili finji nekwikala muŵili umo; fyopele'fyo naŵaKlistu. 13Pakuti muMupasi umo fwense twaliŵatisiwe muMuŵili umo, kani nifweŵaJuda, kani nifweŵaEla, kani nifweŵasya, kani nifweŵana-ŵaŵene; fwense twalinwinsiwe Umupasi umo.

14Pakuti umuwili taukumene icilewa cimo ceŋka, sombi ulikumene ifinji. 15Kani ulukasa lulaŵile ati: Pakuti nsili ninekuŵoko, lomba nsili wamuŵili neŵo; pakuti pali fyefyo kansi taluli lwamuŵili? 16Kaŵili kani ukutwi kulaŵile ati: Pakuti nsili ninelinso, lomba nsili wamuŵili neŵo; pakuti pali fyefyo kansi takuli kwamuŵili? 17Ŋga muŵili wonse linso, mbokumfwa amasiwi ŋga kuli kulipi? Ŋga muŵili wonse kumfwa' masiwi, mbo'kumfwo'bwema ŋga kuli kulipi? 18Sombi kuliŵele ati ŵaLesa ŵalifiikalicile ifilewa fyonse cimo cimo mumuŵili, koti kufwaya kwaŵo. 19Lomba fyonse ŋga fili cilewa cimo ceŋka, mbomuŵili ŋgoli kulipi? 20Kansi ŵukumo fili filewa ifinji, sombi umuŵili umo. 21Ilinso taliisi ukulaŵila kukuŵoko ati: Nsilukukupeŋgela weŵo! Neli kaŵili umutwi tawisi ukulaŵila kumakasa ati: Nsilukumupeŋgeleni mweŵo! 22Sombi tanje cine ifilewa ifyamuŵili ifyo, ifiŵoneka ati filinacile ukucila, filifwailwe; 23kaŵili nafyefyo ifilewa ifitweŵa ati fyakuŵulo'ŵuleme, ifyo tulafipelo'ŵuleme ubwakucila ubwinji; nefyesu, ifyakuŵulo'ŵulombe, filaŵa neŵulombe ubwakucila ubwinji; 24sombi ifyesu ifyaŵulombe tafipeŋgele'fyo, tau. Sombi ŵaLesa walifisaŋkenye ifileŵa fyamuŵili, ukulukucipelo'ŵuleme ubwakucilo'bwinji ico Icalukupeŋga; 25kwiŋgesa-kuwa-po ukulekana mumuŵili; sombi ati ifilewa ŋgafilukulamansyanya bwino. 26Popele kani icilewa cimo cisomenwe, ifilewa ifiŵyakwe fyonse filasomenwa pamo naco; kani icilewa cimo cipoke uŵuleme, ifilewa ifiŵyakwe fyonse filasemba pamo naco.

27Sombi emwemuŵili waŵaKlistu, umo umo muli filewa fyauo. 28Kaŵili ŵaLesa ŵaliikalicile ŵambi mwikelesya, pakutaŋga intanjisi, paŵuŵaŵili aŵakusimika, paŵuŵatatu aŵasambisi, popele ifimpelampela, popele impese syakutendulusya, nefyakofwa-ko, nefyakwikalika, nemikoka yamini. 29Kani ŵonse nintanjisi? Kani ŵonse ŵakusimika? Kani ŵonse ŵasambisi? Kani ŵonse fimpelampela? 30Kani ŵonse ŵali nempese syakutendulusya? Kani ŵonse ŵalalaŵila nemini? Kani ŵonse ŵalaŵulisisya imini? 31Sombi kamufwaisya impese isyakucilo'ŵukulu. Peŋka kaŵili ndukumulanjisyeni insila iweme iyakucila lukoso.

Currently Selected:

1 Aŵakolinto 12: AAL59

Highlight

Copy

Compare