1 Aŵakolinto 11

1Muŵe ŵakutuntulula amekalilo anji, koti nifyopele'fyo ifi ndi naneŵo wakutuntulula ŵaKlistu.

2Lomba ndukumucindikeni pakuti mulukundaŋguluka mufintu fyonse, nekulukulama ifyakutantaka koti nifyopele'fyo ifi namupeleni. 3Sombi ndukufwaya ati mwisiŵe ati umutwi waŵalalume ŵonse niŵaKlistu; kaŵili ati umutwi wamwanakasi mwalalume; nakaŵili ati umutwi waŵaKlistu niŵaLesa. 4Aŵalalume ŵonse ulukutembela nekusimika ufwite pamutwi, alukupufya Umutwi wakwe. 5Sombi aŵanakasi ŵonse ulukutembela nekusimika utaafwite pamutwi, alukupufya umutwi wakwe; pakuti ifyo nifimo ŋga aliŵeyele. 6Pakuti kani umwanakasi aŋgawulo'kufwala pamutwi, ŋgaacese kaŵili imisisi; pakuti kani fyansoni kumwanakasi ukucese'misisi kani kuŵeya, ŋgaafwale pamutwi. 7Pakuti icine tekwelelwa umwalalume ukufwala pamutwi wakwe, pakuti ye cinsiŋgwa neŵuleme bwaŵaLesa: sombi umwanakasi eŵuleme bwamwalalume. 8Pakuti umwalalume taafumine mumwanakasi, sombi umwanakasi ewafumine mumwalalume; 9pakuti kaŵili umwalalume taaleŋgelwe pakuti pamwanakasi, sombi umwanakasi ewaleŋgelwe pakuti pamwalalume. 10Pakuti pali fyefyo ukwelelwa umwanakasi ukwikala nekesiŵilo kaŵukulu pamutwi wakwe, pakuti paŋkalamba syaŵaLesa.

11Naŋgawe'fyo muli ŵaSikulu umwanakasi tekala apakuŵulo'mwalalume, nemwalalume naye tekala apakuŵulo'mwanakasi, 12Pakuti koti nifyefyo ifi afumine mumwalalume umwanakasi, fyopele'fyo umwalalume ali-po pakuti pamwanakasi; sombi ifintu fyonse filafuma kuli ŵaLesa. 13Kamulaŋguluka mweŵene: kani fyelelwe umwanakasi ukutembela kuli ŵaLesa, utaafwite pamutwi? 14Kansi ukwisiŵila ukwine takulamusambisyeni ati umwalalume kani ali nemisisi itali, ifyo mupufyo kuli ye? 15Sombi umwanakasi, kani ali nemisisi itali, ifyo ŵuleme bwakwe; pakuti imisisi yakwe ilipelwe kuli ye mukumufimba. 16Sombi kani umbi ali koti wakupicisya, esiŵe ati fweŵo tatukwete ulwisiŵila ulwakuŵe'fyo neli lumo, nemakelesya aŵaLesa nao taakwete.

17Sombi, pakumufundeni ifyo, nsilukumucindikeni, pakuti mulawuŋgana ukwakuŵipa ukucila napakuwama. 18Pakuti, pakutaŋga, pakuwuŋgana mweŵo mwikelesya, ndomfwa ati pali imipaka iyakupicisya pakati pali mweŵo; kaŵili ndukucetekela ati fimbi fyacine. 19Pakuti neŵusambisi uŵusendeme naŵo ewuŋgawa pakati pali mweŵo, ati aŵo aŵasumininwe ŋgawabwenekesye pali mweŵo. 20Pakuti pali fyefyo, pakuwuŋgana pamo mweŵo, takuli mukulye'fyamulalilo waŵaSikulu; 21pakuti pakulya mwense mulataŋgo'kupoka ifyamulalilo fyenu mweŵene umo umo: popele umbi ali nensala, umbi naye alipendelwe. 22Ala! Kansi tamukwete amananda umwakulila nekunwa? Kani mulukupufya ikelesya lyaŵaLesa, nekuwaleŋgele'nsoni aŵo aŵataŵakwete-mananda? Mbandaŵile syani kuli mweŵo? Kani mutoteni paceŵo ici? Nsilukutota-po!

23Pakuti nalifipokele kuli ŵaSikulu ifyo ifi namupeleni namweŵo; ati ŵaSikulu Yesu, uŵusiku uŵo uŵu ŵaloŵelwe-mo, ŵaliŵulile siŋkwa; 24peŋka, ili ŵatotele, ŵalimukumawile, nekulaŵila ati: Uyu muŵili wanji uwakuli mweŵo: ifi mukalukucita ukundaŋguluka neŵo. 25Fyopele'fyo neŋkomeci, ili ŵalile, ŵalilaŵile ati: Iŋkomeci iyi kulayana kwaŵukumo mumilopa yanji, ifi nafyo efi mukalukucita mweŵo, impindi yonse pakunwa, ukundaŋguluka neŵo. 26Pakuti pampindi syonse apo apa mulukulya siŋkwa uyu, nekunwa kuŋkomeci iyi, nimfwa yaŵaSikulu mulukutulisya, ili tawaŋgesa, 27Pakuti pali fyefyo, aŵantu ŵonse ukesa-kulya siŋkwa nekunwa kuŋkomeci yaŵaSikulu ukutakwelelwe, uyo eukaŵa nemulandu wamuŵili nemilopa yaŵaSikulu. 28Sombi umuntu ŋgaalicentanye, peŋka nekulya siŋkwa nekunwa kuŋkomeci. 29Pakuti uyo ulukulya nekunwa, alukulya nekunwa ukulisinina, pakuŵulo'kwisiŵisyo'muŵili.

30Pakuti pali fyefyo, pali mweŵo aŵenji ŵafila, aŵenji ŵalwele; kaŵili aŵakukumana ŵalilele mutulo twamfwa. 31Sombi ŋga twaliliisiŵisye, ŋga tatwasininwe. 32Sombi pakusininwa, tulukupamwa kuli ŵaSikulu, twiŋgesa-kusininwa pamo neŵamucalo capansi. 33Pakuti pali fyefyo, mweŵakwasu, pakuŵuŋgana mukulukulya, mulukupembansyanya. 34Kani umbi ali nensala, ŋgaalye kwakwe kunanda; mwiŋgawuŋgana mukusininwa, lfintu ifyakusyala-po ŋkafiansika ili ŋkesa.

Currently Selected:

1 Aŵakolinto 11: AAL59

Highlight

Copy

Compare