MATTHEU 13

Ülideipa Me Ngaoleppu

(Mk 4.1-9; Lk 8.4-8)

1 # Mk 4.1-9; Lk 8.4-8; 5.1-3. Tüonyih muh nok mepu Jesu yanne tai hüyange yengching nah me shot; 2hüyange ükhong üyong I tangte jem, tüokhei lisheng ja te ong hüyange tüome shot. Ükhong üshei yengnah yeme yong. 3Hüyange Iye ngaoleppu me maawe hüke i, “Ülideipa ja üli deine tai, 4Iye deiwante, üli ütam lamko te yei, hüyange awhalan pei hüyange toon küm. 5Üli ütam kahtok üyao üjingha ngohpu longpieng tangte yei, hüyange mamshe phao hangjingne hatüome kahyao luwe yenangpuwe tüopa mamshe phaowe ngai. 6Hüpoi aope wanghe hee yeonge sheam hüyange tüopa me üya luwe yenangpuwe hatüo mamshe kui mah. 7Üli ütam huhphüm yo te yei; hüyange huh-hüng jonge ngai iman shümme toi. 8Üli ütam kahtok ümei me yei hüyange gho ngoiye dewok ngoiye hüyange delüm ngoiye ülick maawe lick. 9Aome na nyim, Iye jaiyah.”

Ngaolep Jonpu Wongpong

(Mk 4.10-12; Lk 8.9,10)

10 # Mk 4.10-12; Lk 8.9-10. Tüophei me pinlan pei hüyange Ite i, “Nange iman phei hangne ngaolep puphei ngao nangki?” 11Iye janne i, “Wangdang ahngching me hanghe lowe ngoh tüopa shinglak jingne numante phayangki, hüyangpoi imante tüopa manpha. 12#Mk 4.25; Lk 8.18; Mt 25.29; Lk 19.26.Hangjingne aome ngohnang, Ite ünyei phalak, hüyange I me wangmanne ngohlak; hüyangpoi aome üjingha nehoi yenang, I me hanghe ngoh tüo nehoi yahteilak. 13Tüokhei Taowe imante ngaolep pume ngaonang, hangjingne iman-e nge-o ye ngepute leinang hüyange jai-o yejai shingo yeshingpute jainang. 14#Isa 6.9-10; Mk 8.18; Jn 12.39-41; Lam 28.26-27.Iman jingne Isaia hi-ngao ütahte ngainang:

“Numan-e jaipupa-a jailak, hüyangpoi mongte ye-onglak;

numan-e ngepupa-a ngelak, hüyangpoi yeshinglak;

15hangjingne tüolan kahta mong pomme meng;

hüyange iman na jeiteki;

hüyange iman-e iman mük ngoihteki.

Yejeshih ma-a, iman mük phei ngehah shepu

iman na phei jai hahshepu,

hüyange iman mongjang phei üpong tüohah shepu,

hüyange ü-tangte lüphah shepu, hüyange taowe iman meitamlak.”

16 # Lk 10.23-24; Jn 8.56; Heb 11.13; 1 Pet 1.10-12. Hüyangpoi numan mük moimanpupa, hangjingne numan mükke ngenang, hüyange numan na moimanpupa hangjingne iman-e jainang. 17Ütingpa me Taowe numante inang, hipalan maawe hüyange üjao kahtalan maawe, numan-e ngepulan ngehuwe mongngai, hüyangpoi iman-e tüopa ye-nge, hüyange numan-e hanghe jai tüopa jaihu, hüyangpoi iman-e tüopa yejai.

Ülideipame Ngaoleppu Khoih-inang

(Mk 4.13-20; Lk 8.11-15)

18 # Mk 4.13-20; Lk 8.11-15. “Hüma-a, üli deipa me ngaoleppu numan-e jaiyah. 19Aope kahta ütam-e wangdang ahngching ngaolan jai hüyange tüopa yeshing, hüwante ümengpa peinang hüyange mongjang me hanghe dei tüopa nyieye yahtai nang. Hanghe üli lamko me dei hatüowa I. 20Aoyinne wangdang ahngching ngaolan jai hüyange mamshe mongmeiye yah, tüolan-a longpieng tangme deipu üli she hüonang. 21Ime üya yuwe yenang hüyangpoi hipak ütenja pu jingne ngoh, hüyange aope pungao ümei jingne shaoshipu yejema-a shange tampu pei, mamshe I lakke mahnang. 22#Mt 19.23; 1 Tim 6.9-10,17.Hanghepa üli huh-hüng yo me dei, hatüowe aowe ngaowa jai, hüyangpoi kahtoknyu üyin lengpu, hüyange kahtoknyu moth te kenpu kaiye ngaowa mahne tam, hüyange hatüowe ülick yelickpu lepnang. 23Aowe pungao ümei jai hüyange hatüo jeng shing, tüopa-a kahtok ümei me deipu üli. Hatüowa I aowe ülick gho ngoiye, dewok ngoiye, hüyange delüm ngoiye lickke tam.”

Yantihüng Me Ngaolep

24 # Mk 4.26-29. Iye imante ülao ngaolep ja hüke i, “Wangdang Ahngchinga kahta jawe I kahme üli ümei deipu lenang; 25hüyangpoi aope kahta lili shimah, I wepa pei hüyange tah yo me yantihüng dei hüyange taimah. 26Aope üphao jong hüyange ülick ling, yantihüng-o ngai. 27Nokpu shaoshanpalan pei hüyange Ite i, ‘Üyongpa, nenok kahme nange deipu üli ümei yeje a? Yantihüng ümeken mepu ngaipu shi?’ 28Iye imante i, ‘Wepa jawe hatüo ling.’ Shaoshanpalan-e Ite i, ‘Hümma-a toman taiye hatüo bheiye yotamhuya?’ 29Hüpoi Iye i, ‘Tah, hangjingne numan-e yantihüng bheiwante tah-o omme bhei ngohlak yang. 30Tah manyah manyah moini jamshe jongne tamtüoh, hangjingne tahyah wante tah yahpalan te Taowe ilak, üwangne yantihüng yahtüoh, hüyange vünme jaklak jingne ütüp-ütüp shatüoh, hüyangpoi tahmei lan-a tenok bung te peikei.’ ”

Yanhoi Li Me Ngaolep

(Mk 4.30-32; Lk 13.18-21)

31 # Mk 4.30-32; Lk 13.18-19; Mt 17.20. Iye ülao ngaoleppu ja imante hüke i, “Wangdang Ahngching yanhoi li ja lenang, hanghe kahta jawe yah hüyange inok kahte dei. 32Hatüo ülao üli üshei yo me sheshoipupa, hüyangpoi aope hatüo jong ülao deili phei i shejong nang hüyange pee ne mengnang, tüone menge wangdang awhalan peinang hüyange üquilan me ülüp lingnang.”

Do Me Ngaolep

33 # Lk 13.20-21; Gal 5.9; Kaht 18.6. Iye imante ülao ngaoleppu ja i, “Wangdang ahngching do lenang; ao shekowe yah hüyange anhüng shengtak lüm phei nyütyange an ne bunge manngai manngai angnang.”

Jesuwe Ngaolep Jon

(Mk 4.33,34)

34 # Mk 4.33-34; Jn 10.6; 16.25. Jesuwe ükhong te tüolan khongkümpu ngaoleppu me ngao yangki; ngaoleppu ye-ompe Iye imante hango yengao. 35#Tüo 78.2.Hipa kaiye ngaoyangpu ütahte ngailak jingne hatüo ngai:

“Ngaolep pume taowe ü ju eplak, kahtamyenghan memuh jüowe angpu ngao taowe wünne ilak.”

Jesuwe Hüngme Leppu Ngao Khoih-inang

36Tüophei me Jesuwe ükhong tüohyange noksa te ong; hüyange I pinlan I tangte pei, hüyange i, “Tomante kah mepu yantihüng te leppu khoih ipha.” 37Iye jan, “Aowe üli ümei dei, tüowa Kahta Üha, 38#Jn 8.44; 1 Jn 3.10.Kahte leppuwa kahtoknyu. Üli ümeiya Ahngching halan; yantihünga ümeng halan ngohnang. 39Wepa aowe dei hatüowa kahshih; tah yahpuwa jin üküm; tah yahpalan-a wangdang shongmokpalan. 40Yantihüng shai jem hüyange vün me jakpu kih, jin üküm nyih me ngohlak. 41#Mt 24.31.Kahta Ühawe yoi shongmokpalan shonlak, hüyange iman-e yoi ahngching me yashah hüone tampalan hüyange ngaokeng kaiye toilingpalan üshei shai jemlak. 42#Mt 13.50; 8.12; 22.13; 24.51; 25.30; Lk 13.28.Hüyange iman-e tüolan kahta yemahpu loonge ngohpu vün me shüplak; tüome shappu hei fa ngaopu ngohlak. 43Hüwante khakshupalan-e iman üpa Ahngching me wanghe ke teelak. Ao me na nyim, Iye jaiyah.”

Shengngin Jüopume Ngaolep

44“Wangdang Ahngching kah me ngin jüowe angpu lenang; hanghepa kahta jawe tüo hüyange Iye nishe jüowe tüoh. I mongmei me ye, I me nangpu khongküm yao hüyange tüopa kah shak.”

Yüknyu Me Ngaolep

45“Üne-o, wangdang ahngching pheeinyu leihpawe yeonge meipu yüknyu yampu lenang. 46Ye-onge shangpu yüknyu ja Iye tüoyange I tai, Ime nangpu khongküm yao hüyange tüopa shak.”

Shaanme Ngaolep

47 # Mt 13.40-42. “Üne-o wangdang Ahngching shaantünpu lenang, hanghe shaan yengching te shüp hüyange nyah ülam lili om. 48Aope tüopa maa iman-e yengnah yete shuwe yenang, hüyange shotnang hüyange ümeilan tükja me leye ang, hüyangpoi ümenglanna win. 49Tüokih-e tüopa jin üküm nyih me ngohlak. Wangdang shongmokpalan yulak hüyange üjaolan mepu ümenglan yantamlak; 50hüyange iman loonge ngohpu vünme shüplak; tüome shappu hüyange fa ngaopu ngohlak.”

Üla hei Ülang Moth

51“Numan-e tüolan khongkümpu shingman?” Iman-e Ite i, “Shingteki.” 52Iye imante i, “Tüokhei ngaokeng nyüopalan aoyin wangdang ahngching pinne meng, yoi angpu mepu üla hei ülang yah ngaipu nok nokpu ja lenang.” 53#Mt 7.28; 11.1; 19.1; 26.1.Aope Jesuwe ngaolep iye sho Iye tüopa nyoi tüoh.

Nazareth me Jesu Yeyahpu

(Mk 6.1-6; Lk 4.16-30)

54 # Mk 6.1-6; Lk 4.16-30. I yoi nyupuh chingshao te pei hüyange imante synagogue me nyüo, tüokhei iman yashan hüyange i, “Iye tüolan konngao hüyange tüolan üngantoi ümeken mepu tüoyapu? 55Pee aijonpa üha I yejepu a? Inyu te Mary, hüyange Inaolan Jeams, Joseph, Simon, hüyange Judas yeje pu a? 56Hüyange Inao shekolan khongküm teman phei ngohpu yeje a? Hüma-a Iye tüolan toishao üshei ü-mepu tüo?” 57Iman-e Ite üting yelak. Tüokhei Jesuwe imante i, “Hipa ja yoi chingshao hüyange yoi noksa kahtalan tokte kaiye ükenphe me yihluwe yah.” 58Iman ütingyelakpu ngeye tüoyeme Iye üngantoi meiyange yeling.

Currently Selected:

MATTHEU 13: KONYBSI

Highlight

Copy