MATTHEU 12

Sabbath Jingne Tongpu

(Mk 2.23-28; Lk 6.1-5)

1 # Mk 2.23-28; Lk 6.1-5. #Hin 23.25.Tüo hipak me Jesuwe Sabbath me kah linne tai. Hüwante I pinlan seanyao hüyange tahlick yitte hahne wang. 2Aope Phariseelan-e tüopa nge, iman-e Ite i, “Leihuyah! Nang pinlan-e Sabbath ngaokeng mengnangki,” 3#1 Sam 21.1-6; Lev 24.9.Iye imante i, “David hüyange I kahtalan aope iman seanyao Iye hanghe ling numan-e iye yelei a? 4Kahwang nokte I ong hüyange Kahwang te phapu an iman-e hah, hanghepa I yejema-a I kahtalan jingne ngaokeng me shupu yeje, hüyangpoi hatüo ngengpalan jing. 5#Lung 28.9-10.Khümjing me ngohpu ngengpalan-e Sabbath meng tüoyangpoi iman ümeng yenang she numan-e Mosa ngaokeng laime ye i a? 6#Mt 12.41-42; Lk 11.31-32.Taowe numante inang khümjing phei sheyongpu ülam ja tüome ngohnang. 7#Hos 6.6; Mt 9.13.Hatüo hanghe te lep numan-e shingma-a, Taowe phünne toidopu yeje shüpshe lengnang! Numan-e ümeng yenangpu kahta te ümeng yepha hah shepu. 8#Jn 5.1-18; 7.19-24; 9.1-41.Hangjingne Kahta Üha Sabbath tepu nokpu ngohnang.”

Yimdak Pheipu Kahta Ja

(Mk 3.1-6; Lk 6.6-11)

9 # Mk 3.1-6; Lk 6.6-11. Hüyange tüomepu I tai hüyange synagogue te ong. 10Tüome yakshok tephei kahta ja ngoh, hüyange iman-e I ümeng pholak jingne, Jesu te tong, “Sabbath me meitamlaka Ngaokhüm me shupu a?” 11#Lk 14.5.Iye imante i, “Leppu ja me numan yo me jawe nyeeha ja ngoh, hatüo Sabbath me jomte yei. Hatüo Iye jonyange shuwe yengailak a? 12#Mt 10.31.Hüma-a nyeeha ja phei kahta ja hangshin sheyongpu! Tüokhei Sabbath me toimei linglak shunang.” 13Tüophei me Iye kahta te i, “Nang yak notüoh.” Iye no, hüyange hatüo mei hüyange ülaopakih khongkümpu mei. 14#Mk 14.1; Jn 7.30; 8.59; 10.39; 11.53.Hüyangpoi Phariseelan nokshao te yu hüyange hangke I menge tamlak, I phei tüi-e iman-e taisho.

Kahwangpawe Lepu Shaoshanpa

15 # Mk 3.7-12; Lk 6.17-19. Tüopa shingyange Jesu tüomepu tai. Kahta maawe I pheite woi, hüyange Iye iman üshei meitam. 16I jeng aohi te-o shingne yetamlak jingne Iye imante ngaopha. 17Hatüowa Isaia hipa kaiye nyüoyangpu ütahte ngailak jingne:

18 # Isa 42.1-4. “Hüowü, ü-shaoshanpa ao Taowe le,

ü-mongkenpa, ao me ü-yaha monghah nang.

Taowe ü-yaha I tangme anglak,

hüyange jatlan tangte Iye ngao phünpu pongtam lak;

19Iye yeteelak yejema-a yewünlak,

yejema-a chingyang me I ngaowüng aowe-o yejailak.

20Iye ngaotingpa-a okpu me yah manpei manpei

khuh tawe ngohpu hong ja nehoi Iye yephaklak,

hüyange vünkhuh ngaipu vüntük Iye yemeilak.

21Hüyange I min me jatlan-e#Yinhulan she-o ngelak mongmeilak.”

Jesu Hüyange Beelzebul

(Mk 3.20-30; Lk 11.14-23)

22 # Mk 3.22-27; Lk 11.14-22. #Mt 9.32-33.Tüophei me mükmüo hüyange ngao ye-i-okpu laa ngohpu ngao-ükpa ja I tangte woipei, hüyange Iye I meiyetam, hüwante ngao-ükpa kahtawe ngaowe ok hüyange nge ok. 23Ükhong üsheiye yashan hüyange i. “Hatüo kahta David üha a?”

24 # Mt 9.34; 10.25; Jn 7.20; 8.52; 10.20. Hüyangpoi aope Phariseelan-e jai, iman-e i, “Hatüo kahtawe laalan janglak jingne, ülao yeje laa ahngpa Beelzebul jonnang.” 25Iman juteih shinge Iye imante i, “Hanghe ahngching yoi nying nyingke teitam yange teih oklakei jin yelaolak, hüyange hanghe chingnyu yejema-a noksa yoi nying nyingke tampu ngailakei yonge yengohlak. 26Satan-e satan jange teima-a, Iye yoi nying nyingke tamyangki; hüma-a I ahngching hangke yonge ngohlak? 27Hüyange Taowe laalan janglak jingne Beelzebul jonma-a numan hayimlan-e ao jonyange jang nangki? Tüokhei iman-a numan ngaophünpalan-e menglak. 28Hüyangpoi Taowe Kahwang yahawe laalan jangküma-a, hüma-a Kahwang ahngching numan tangte peiteki. 29Kahta jawe üwangne wongnangpu kahta phowe yeshapute, hangke inok te peipu ok; hüyange I toinan nyieyahpu oklak? Phowe shayang pheime nakshih Iye inok nyieyahpu oklak. 30#Lk 11.23; Mk 9.40.Ao ü-phei yengoh I ü-phei tüi-e ngohnang, hüyange aowe ü-phei jamme yejem Iye shai tamnang. 31#Mk 3.28-30; Lk 12.10.Tüokhei Taowe numante inang, ünu hüyange phoiwümpu üshei kahtalan te winlak, hüyangpoi Yaha phei tüi-e phoiwümpu yewinlak. 32Aoyinne kahta üha phei tüi-e ngaoyangki ünu winpu oklak; hüyangpoi aoyinne Yaha Üjao phei tüi-e ngaoyangki imante hatüo jin me jeyah yejema-a ngoikülak jin me jeyah ümeng yewinlak.”

Peeja Hüyange Imepu Ülick

(Lk 6.43-45)

33 # Lk 6.43-45; Mt 7.16-20; Jas 3.11-12; Mt 15.18. “Ülick ümei ngailak jingne pee ümei ne menglak, üpüm yemeima-a ülick-o yemei. Hangjingne peeja-a I ülick kaiye shingnang. 34Numan pu hayim, numan yemeipe ngohyange, hangke ümei ngaowe oklak shi? Hangjingne mongsa me hanghe maawe ngai, juwe tüo ngaonang. 35Kahta ümeiye yoi moth ümei angpu nok mepu toimei ngainang, hüyange kahta ümenge yoi moth ümeng angpu nok mepu toimeng ngainang. 36Taowe numante inang, ngaophünpu nyih kahtalan-e iman-e ngaoyangpu ngaomeng lili tüolak. 37Hangjingne nang ngaowe nang shuwe linglak, hüyange nang ngaowe nang yeitamlak.”

Jona Füo Yashantoi

(Mk 8.11,12; Lk 11.29-32)

38 # Lk 11.16,29-32; Mk 8.11-12; Mt 16.1-4; Jn 2.18; 6.30; 1 Kor 1.22. Hüwante ngaokeng nyüopalan hüyange Phariseelan-e Ite i, “Konnyüopa, toman-e nang mepu kahnyingwüngha füo ja ngehu nangki.” 39Hüpoi Iye imante janne i, “Ünupa hüyange üting yenangpu jinne kahnyingwüngha füo yamnang, hüpoi Jona hipa füo tokte kaiye ülao füo hango yephalak. 40#Jon 1.17.Hangjingne Jona yengching hoyong sea me nyihlüm hüyange phalüm ngoh, kahta üha-o nyihlüm hüyange phalüm kahtok ümongme ngohlak. 41#Jon 3.5.Ngaophün nyih me Nineveh kahtalan tüopa jin kahtalan phei yonglak hüyange tüolan yeitamlak, hangjingne Nineveh lan-e Jona konnyüopu me monglüp hüyange hüowü, Jona phei ünyei yongpu ülam ja tüome ngohnang. 42#1 Ahng 10.1-10; 2 Put 9.1-12.Ngaophün nyih me heye mepu Ahngyha yonglak hüyange numan yeitamlak, hangjingne Solomon konngao jailak jingne kahtoknyu ükao ja lam khongkümpu te kemme yha peiyangki; hüyange Solomon phei ünyei yongpu ülam ja tüome ngohnang.”

Ünu Yaha Leihyepu

(Lk 11.24,25)

43 # Lk 11.24-26; 2 Pet 2.20. “Aope kahta ja mepu ünu yaha yanne tailakei, toloimei jing yamme yeng yenangpu kahtang te waakem nang hüyange hatüo yetüo. 44Hüwante Iye inang, ‘Ü-nok ümeken mepu tao ngai tüo tangte yelakei.’ Hüyange aope I leihye hatüo ükeng me, mak moiyange, hüyange üyin shinne tümyange Iye nge. 45Hüwante I tainang hüyange I phei shemengpu ünu yaha nyit ngoiye I phei woi peinang, hüyange iman tüote ongnang hüyange tüome ngohnang; hüyange tüopa kahta yafün üwangpa phei ükümpa yafün shemeng nang. Tüokhei tüopa ünu jin phei-o hatüokih ngohlak.”

Jesu Ünyu Hüyange Inaolan

(Mk 3.31-35; Lk 8.19-21)

46 # Mk 3.31-35; Lk 8.19-21. #Jn 2.1-12; 19.25-27; 7.1-10; Mk 6.3; 1 Kor 9.5.Aope I ükhong phei yelakpe ngaowe ngoh, Inyu hei Inaolan I phei ngaohuwe yamme nokshao me ngoh. 47Ütam-e Ite i, “Leihuyah, nangnyu hei nang naolan nangphei ngaohuwe yamme nokshao me yong ngohnang.” 48Aowe Ite ngao tüopa kahtate Iye hüke janne ye, “Ünyu ao shi? hüyange ünaolan-a aoyin shi?” 49Hüyange Iye yoi pinlan yekaote yak nowe hong hüyange i, “Ünyu hüyange naolan hatüo me! 50#Jn 15.14.Hangjingne aoyinne wangdang me ngohpu üpawe mongpu linglakei Iya ünaolipa, ünaolinyu, hüyange ünyu.”

Currently Selected:

MATTHEU 12: KONYBSI

Highlight

Copy