MATTHEU 14

Baptipa John Lipu

(Mk 6.14-29; Lk 9.7-9)

1 # Mk 6.14-16; Lk 9.7-9; Mk 8.28. Tüopa nyih hei hipak me Herod Tetrarch-e Jesu jeng ipu jai, 2hüyange I shaoshanpa lante i, “Hatüowa baptipa John; I lipu mepu yange yenang, tüokhei üngan toi üyong Iye lingnang.” 3#Mk 6.17-18; Lk 3.19-20; Lev 18.16; 20.21.Hangjingne Inao Philip sheko, Herodia jeng me Herodte John pho, Ite sha hüyange I küpnok me ang; 4hangjingne John ne Ite hüke i, “Nange yha yahlak yeshu.” 5#Mk 6.19-29.Herod-e I toihuwe teih hüyangpoi ükhongte nyam, hangjingne iman-e I hipa ja she shing.

6Hüpoi Herod puhpu nyih mo me Herodia üha sheko nahawe yinpalan sheshao me polok hüyange Herod mongmei ne tam; 7tüokhei yhawe hangheyin yulakei phalak she Iye jiengpu pha. 8Inyuwe hengpuwe yhawe hüke i, “Hatüo me üte shengja me Baptipa John shang heyange yahkei.” 9Ahngpa mongmeng, hüyangpoi Iye jiengyangpu jingne hüyange Iphei jamme khaome shotyange ngohpu yinpalan phei yewüolak jingne tüopa phalak jingne Iye ngaopha. 10Iye shon hüyange küpnok me John shangphün. 11I shang shengja me yüo hüyange sheko nahate pha, hüyange yhawe tüopa Inyu tangte yahpei. 12I pinlan pei hüyange mang yahtai, hüyange iman-e I mu; tüophei me iman ye hüyange tüopa jeng Jesute i.

Jesuwe Haja Nga Uh

(Mk 6.30-44; Lk 9.10-17; Jn 6.1-14)

13 # Mk 6.32-44; Lk 9.10-17; Jn 6.1-13; Mt 15.32-38. Aope Jesuwe tüopa ngaolan jai, tüopa nyoi tüohyange lisheng ja te ong hüyange wanwüng jeng yamme I shaha tai. Ükhonge tüopa jai hüyange ching mepu yalam me iman I phei te woi. 14I yengnah te ngaiwante ükhong üngang Iye nge, hüyange iman ngeye I yeonge yayenge lei hüyange Iye iman dakpu meiye tam. 15Aope ün ngoi pinlan I tangte pei hüyange i, “Hatüowa wanwüng jeng, hüyange wanghe shaaji nyüpteki, chingshao yinte taiye hüyange yoi yoi jingne hahying min shak yahne, ükhong yanne tamtüoh.” 16Jesuwe imante i, “Iman tailak wongpong yenang. Numan-e imante hahlak ütam phatüoh.” 17Iman-e Ite i, “Toman me hango yenang hüpoi ankhüo nga hüyange nyah ni shaha ngohnang.” 18Iye i, “Tüolan ü-tangte tüome yahpeikei.” 19#Mk 14.22; Lk 24.30.Iye ükhongte hüng tangme shotlak jingne ngao pha. Tüophei me Iye ankhüo nga hüyange nyah ni jon, wangdang yete lei hüyange Kahwangte minyong pha; hüyange aope Iye an paikhoih pinlante Iye pha, hüyange pinlan-e ükhongte pha. 20Iman manmoh manmoh hah; hüyange topu ükhoih ünyai iman-e shaijem-e yowante, muhto penme ni maawe ngoh. 21Hahpalan, sheko hei nahalan ye ipe kahta haja nga nanjing ngoh.

Jesu Yengtangme Kem

(Mk 6.45-52; Jn 6.15-21)

22 # Mk 6.45-46; Jn 6.15-17. Tüophei me Iye ükhong yanne teine tamwante, pinlan lisheng ja me ongyange yengjan yete I sheshao me tailak jingne henge tei. 23Kahtalan teine tam hüyange I shaha kahtang yete yoplak jingne ong. Aope ün ngoi I shaha tüome ngoh.

24 # Mk 6.47-52; Jn 6.16-21. Shaaji yengnah mepu nangjange taiteiye, lishenga yengmokh-e yeonge lüppe shüp, hangjingne sheshao yemepu wangyang pei. 25Napning awka jume I pinlan tangte yengme kemme pei. 26#Lk 24.37.Aope pinlan-e I yengching tangme kemme nge, iman nyam hüyange hüke i, “Hatüowa mieng;” hüyange nyampu kaiye iman-e üngwün. 27Tüoyangpoi Jesuwe imante hüke i, “Wongnang yah! Tao üja, Tahnyam.”

28Peterwe Ite jan, “Youngwanpa, hatüo ütingme nangne mengma-a, nang tangte yengme kemme wenlak üte ngao phakei.” 29#Jn 21.7.Iye i, “Wenkei.” Lisheng mepu Peter yu, yengme kem hüyange Jesu tangte wen. 30Hüpoi wangyang ngeye I nyam, hüyange I yengmong te hümne she ngohwante Iye üngwünne i, “Youngwanpa, tao yinpha.” 31#Mt 6.30; 8.26; 16.8.Mamshe Jesuwe I yak nowe Ite jon hüyange i, “Nangme hangne ütinglakpu üjingha ngohpu! Hangne nang mong apu?” 32Aope imni lisheng te ong wangyang lak. 33#Mt 28.9,17.Aoyin lisheng me ngoh Ite ümme khüm, hüyange i, “Ütingme nang Kahwang üha.”

Gennesaret Me Jesuwe Dakpa Meitam

(Mk 6.53-56)

34 # Mk 6.53-56; Jn 6.22-26. Aope iman yengjan ngoi Gennesaret me ngai. 35Tüome ngohpu kahta lan-e I shing hüyange tüopa kahmük chingyo yupi üshei yete ngaolan shontei, hüyange iman-e I tangte dakpalan üshei yahpei, 36#Mk 3.10; Lung 15.38; Mt 9.20.hüyange I nyejeng te nehoi jonlak jingne iman-e tonge i. Aoyinne jon iman üshei meitam.

Currently Selected:

MATTHEU 14: KONYBSI

Highlight

Copy