MATTHEU 10

Lampulan Penme Ni

(Mk 3.13-19; Lk 6.12-16)

1 # Mk 6.7; 3.16-19; Lk 9.1; 6.14-16; Lam 1.13. Jesuwe yoi pinlan penme ni I tangte nyik hüyange ünu yahalan janglak, hüyange daktin hei daklakpu lili meilak wong imante pha. 2Lampulan penme ni min hatüolan ngoh: üwangpa-a Simon ao te Peter she nyik, hüyange Inao Andrew; Zebedee üha Jeams, hüyange Inao John; 3Philip hei Bartholomeo; Thomas hei Mattheu kahngin shaipa; Alphaeus üha Jeams, hüyange Thaddaeus; 4Kana mepu Simon, hei Judas Iskariot, aowe I phünne pha.

Pen-me-ni Toishao

(Mk 6.7-13; Lk 9.1-6)

5 # Lk 9.52; Jn 4.9; Lam 8.5,25. Tüolan pen-me-ni Jesuwe hatüolan wenneshaipu phei shonne tei: “Yinhulan yete taipu lamte tahtai, hüyange Samaria ching aote-o tahngoi; 6#Mt 15.24; 10.23.tüoleima-a mah ngohpu Israel nokphong nyeelan tangte taitüoh. 7#Lk 9.2; 10.9-11; Mt 4.17.Numan taiwante ‘Wangdang Ahngching owe peiteki,’ she nyüotüoh. 8Dakpalan meitam tüoh, lipulan yange yetamtüoh, ngonpalan jaowe tamtüoh, laalan jangtüoh. Numan-e ümee yephapute tüo; ümee yeyupe phatüoh. 9#Mk 6.8-11; Lk 9.3-5; 10.4-12; 22.35-36.Numan ngin nyekhok me hon, khüm yejema-a nginmei numan jingne tahyah; 10#1 Kor 9.14; 1 Tim 5.18.Yejema-a lam jingne nyekhok, yejema-a phakshaoh ni, yejema-a yashom yejema-a shengshaoh tahyah. Hangjingne toi lingpa jawe I hahying tüolak wangnang. 11Hangkihpu chingnyu yejema-a chingha te numan ngoilakei, tüome wangngoiye ao ngoh tongyah, hüyange numan yanne mantai mantai I phei ngohyah. 12Numan noksate ongwante ‘Toloimei ngohyah,’ she tahyah; 13hüyange tüopa noksa wangngoiye ngohma-a numan mepu toloimei ongne tamtüoh; hüpoi tüopa nok wangngoi-e yenangma-a, numan mepu toloimei numan tangte muh yetamtüoh. 14#Lam 13.51.Ütamme numan yeyah yejema-a numan ngao yejaima-a, aope numan tüopa noksa yejema-a ching mepu tailakei numan ya mepu tüpla kongtüoh. 15#Mt 11.24; Lk 10.12; Jud 7; 2 Pet 2.6.Ütingpa me Taowe numante inang, ngaophün nyih me tüopa chingshao yatuhshao phei-a Sodom hei Gomorrah yatuhshaopa nün oklak ne ngohlak.”

Shangne Tampu Peipu

(Mk 13.9-13; Lk 21.12-17)

16 # Lk 10.3; Kaht 3.1; Rom 16.19. “Hüowü, sholan yomepu nyeekih Taowe numan shonne teinang. Tüokhei pu kih deiyah hüyange awshu kih innyaipu ngohyah. 17#Mk 13.9-13; Lk 12.11-12; 21.12-19; Jn 16.2.Kahtalan jingne kentingyah, hangjingne iman-e numan pangshanlan yakme ngaophünlak jingne phünne phakülak hüyange iman synagogue me numante shetphalak; 18#Lam 25.24-26.hüyange numan Governorlan hei ahnglan sheshao me ü-min jingne, imante hüyange kahtoknyu te saki phalak jingne woipei phalak. 19Aope iman-e numan phünne phalakei, hangke numan-e ngaolak yejema-a numan-e hang ilak, mong tahshang; hangjingne hüwante numan-e hang ilak numante yahphalak. 20#Jn 16.7-11.Ngaopupa numan ne yeje, hüyangpoi aowe numante ngaowe tamnang numan üpa Yaha ngohnang. 21#Mt 10.35-36; Lk 12.52-53.Ijei inaowe yoijei yoinao li ne phünne phalak, hüyange üpawe yoiha, hüyange hayimlan-e yoi nyupa phei tüi-e yonglak hüyange iman li ne tamlak. 22#Jn 15.18; Mt 24.9.Ü-min jingne kahtalan-e numante nuphalak; hüyangpoi aowe üküm ngoiye yonge ngohlakei I yinlak. 23#Mt 16.27; 1 Thes 4.17.Aope iman-e numan ching ja me shange pongne tamlakei, japa chingte phet tüoh, hangjingne ütingpa me Taowe numan te inang, kahta üha yushao me Israel üshei yete numan yekempongpe ngohlak.

24 # Lk 6.40; Jn 13.16; 15.20. “Pin ja-a Ite konnyüopupa phei yongpu ne yeje, yejema-a rha ja-a I nokpu phei yongpu ne yeje. 25#Mt 9.34; 12.24; Mk 3.22; Lk 11.15; 2 Ahng 1.2.Pin ja-a Ite konnyüopupa shinne ngohma-a wangpu, hüyange rha ja I tepu nokpu shinne ngohma-a wangpu. Iman-e noktepu nokpupa te Beelzebul she nyikma-a, hangshin nyeiye iman-e inok mepu lante nyiklak!”

Aote Nyamlak

(Lk 12.2-7)

26 # Lk 12.2-9. #Mk 4.22; Lk 8.17; Eph 5.13.“Tüokhei imante tahnyam hangjingne ütahte yengailak hango küppe yenang, hüyange yeshingpe anglak hango jüowe yenang. 27Taowe hanghe numante wangnyak me inang wangngai me ngaiye itüoh, hüyange numan-e hanghe lowe ipu jainang, noktok me üngwün tüoh. 28#Heb 10.31.Aoyinne püm toipu ok hüyangpoi Yaha toine ye-ok imante tahnyam. Tüoleima aowe yaha hei püm moini molovün me meine ok tüopa Kahwang te nyamtüoh. 29Poisa ja jingne awhao ni yeyao a? Tüoyangpoi tüolan ja nehoi numan üpawe yeshingpe kahtok te yeyeilak. 30Numan jingne, numan shangme ngohpu shangmin nehoi iyange ngohnang. 31#Mt 12.12.Tüokhei tahnyam, awhaolan maapu phei numan ünyei sheyongpu.”

32 # Mk 8.38; Lk 9.26; Ütah 3.5; 2 Tim 2.12. “Tüokhei aoyinne kahtalan sheshao me Tao janlakei, Taowe-o wangdang me ngohpu üpa sheshao me I jingne janlak. 33Hüyangpoi aoyinne kahta sheshao me Tao yejanlakei Taowe-o wangdang me ngohpu üpa sheshao me I yejanlak.”

Chingmei Yeje Hüpoi Yanglow

(Lk 12.51-53; 14.26-27)

34 # Lk 12.51-53; Mt 10.21; Mk 13.12; Mik 7.6. “Kahtoknyu me chingmei peilak jingne Tao peipu she tahteih; chingmei peine yeje hüyangpoi yanglow ngaine Tao pei. 35Hangjingne kahta jawe yoipa phei tüi-e, naoyhawe yoinyu phei tüi-e, nyemnyanyuwe yoi nyei phei tüi-e yongtam lak jingne Tao pei; 36hüyange kahta ja jingne wepa ümeng ne Inoksa kahtalan menglak.”

37 # Lk 14.25-27; 17.33; 9.23-24; Mt 16.24-25; Mk 8.34-35; Jn 12.25. Aowe Ü-phei shenyei she yoipa yejema-a yoinyu te kenlakei I üjingne wangpu yeje, hüyange aowe ü-phei shenyei she yoiha yejema-a yhala lante kenlakei I üjingne wangpu yeje. 38Aowe yoi tangpem paiyange hüyange ü-phei te yewoi I üjingne wangpu yeje. 39Aoyinne yoi üyin tüo mahlak, hüyange aowe üjingne I üyin mah hatüo tüolak.

Khintak

(Mk 9.41)

40 # Lk 10.16; Jn 13.20; Gal 4.14; Mk 9.37; Mt 18.5; Lk 9.48. “Aowe numan yahlakei Iye Tao yahnang, hüyange aowe Tao yahlakei Iye Tao aowe shon I yahnang. 41Aowe hipa ja min me peipu yahlakei Iye hipa khintak tüolak, hüyange aowe khakshupupa kahta ja min me peipu yahlakei Iye khakshupu kahta khintak tüolak. 42#Mk 9.41; Mt 25.40.Ütingme Taowe numan te inang, aowe hatüo üjoipa yo mepu ja te nehoi ü-pin min me yengwüng wan ja nehoi phalakei, Iye yoi khintak yemahpe tüolak.”

Currently Selected:

MATTHEU 10: KONYBSI

Highlight

Copy