MATTHEU 9

Jesuwe Yimtin Dakpu Kahta Meitam

(Mk 2.1-12; Lk 5.17-26)

1 # Mk 2.1-12; Lk 5.17-26. Tüokhei Jesu lisheng te ong, yeng kaiye tai hüyange yoi chingte pei. 2#Mt 9.22; Mk 6.50; 10.49; Jn 16.33; Lam 23.11; Lk 7.48.Iman-e yimtinne dakpu kahta ja lengme lamyange I tangte yahpei, hüyange Jesuwe iman ütinglakpu ngeye, yimtin dakpate i, “Üha, mengha yah! Nang ünulan winyangki!” 3Hüwante ngaokeng nyüopalan ütam-e iman pa me hüke ngaowe i, “Hatüo kahtawe Kahwang te yaonang.” 4Iman juteih ngeye Jesuwe i, “Hangne numan mongme ünu juteih ngohpu shi? 5Hangjingne ümpehepa she-o-lak? ‘Nang ünulan winyangki,’ yejema-a ‘lüotüoh hüyange kemtüoh,’ she ipu she-o-lak shi? 6Hüyangpoi numan-e kahta üha me kahtoknyu me ünu win oklak wong ngohnangki she shinglak nanjingne” - hüwante Iye yimtin dakpate i, “Lüotüoh, nang leng paiyah hüyange nokte yetüoh.” 7I lüo hüyange nokte ye. 8Aope ükhonge tüopa nge, iman nyam, hüyange aowe hükihpu üngan kahtate pha, tüopa Kahwang minyong.

Jesuwe Mattheu Nyikpu

(Mk 2.13-17; Lk 5.27-32)

9 # Mk 2.13-17; Lk 5.27-32; 15.1-2; 7.34. Jesuwe tüopa nyoi tüoh, hüyange I kem-e taiwante kahngin shaiye jemjing me Mattheu she minpu kahta ja Iye shotte nge, hüyange Iye Ite i, “Ü-pheite woikei.” Mattheu yong hüyange I pheite woi.

10Jesu Mattheu nok me khao me shotte ngoh, hüyange kahngin shaipalan maawe hüyange ünulan pei hüyange I hüyange I pinlan phei jamme shot. 11Aope Phariseelanne tüopa nge iman-e I pinlante i, “Hangne numan konnyüopawe kahngin shaipalan hei ünulan phei jamme hahpu shi?” 12Iye tüopa jai hüyange i, “Aoyin meiye ngoh iman jingne soihüngpa wongpong ne yemeng; hüyangpoi aoyin dak iman jingne wongpong. 13#Hos 6.6; Mt 12.7; 1 Tim 1.15.Taitüoh hüyange hatüo hanghete leppu shingyah, ‘Taowe shüpshe lengnang hüyangpoi toidopu yeje.’ Tao khakshupulan nyiklak jingne yeje, hüpoi ünulan nyiklak jingne pei.”

Nyaolepu Jeng Tongpu

(Mk 2.18-22; Lk 5.33-39)

14 # Mk 2.18-22; Lk 5.33-39; 18.12. Tüophei me John pinlan Jesu tangte pei hüyange i, “Hangne toman hüyange Phariseelan sha-a sha-a nyaole, hüyangpoi nang pinlan hangne yenyaolepu?” 15Jesuwe imante i, “Nyemthepa iman phei jamme ngohyange I shümpalan shaplak a? Hüyangpoi hipak ja peilak aope nyemthepa iman mepu yahteilak; hüwante iman nyaolelak. 16Aowe-o nye ülang me nye üla yenem. Hangjingne nempupawe ange ngohpupa hitte yahnang, hüyange üwo shemengpu ngainang. 17Hüyange kahtawe meishotük ülang me wuwüngti üla yehin; hüke iman-e lingma-a, meishotük phüplak, wuwüngti yünne taikümlak hüyange meisho mengnang; hüyangpoi iman-e wuwüngti üla meishotük üla me hinnang, hüyange moini meiye angnang.”

Üyongpa Üha Hüyange Jesu Inkhekme Jonpu Sheko

(Mk 5.21-43; Lk 8.40-56)

18 # Mk 5.21-43; Lk 8.40-56. #Mt 8.2; 15.25; 18.26; 20.20; Jn 9.38.Aope Iye imante ngaowe ngoh, hüowü, Jehudi wanglam lampa ja peingoi hüyange I sheshao me ümme khümme i, “Üha sheko naha, sha-a meimei liteki; hüyangpoi peikei hüyange yha tangme nang yak angtam pha, hüyange yha yanglak.” 19Jesu yong hüyange I pheite woi hüyange I pinlan-o I phei tai.

20 # Lung 15.38; Hin 22.12; Mt 14.36; Mk 3.10. Hüyange hüowü, sheko ja ao wangpeng penme ni yelakpe iy taipu ngoh, tokphei yeme pei hüyange I jing inkhek jengte jon; 21hangjingne yhawe yoi nying nyingke hüke i, “Taowe I jing inkhek jengte nehoi jonma-a tao meipu oklak.” 22#Mk 10.52; Lk 7.50; 17.19; Mt 15.28; 9.29.Jesu lüppe ye, hüyange yha ngeye Iye i, “Monghah yah, Üha! Nang ütinglakpuwe nang meiteki.” Hüyange shekonyu hatüo hipak memuh mei. 23Hüyange aope wanglamlampa nokte Jesu pei, hüyange nyawong hei shengli wüngpu hei kahta üngang moppe ngoh pu ngeye, 24Iye i, “Moilan yantüoh, yhameinyu lipu yeje; yha shinang.” Hüwante iman-e Ite nyiye tam. 25Hüpoi aope ükhong nokshaote yuwe küm, I tüpsate ong hüyange yha yak me shu, hüyange naoyhanyu lüo. 26Hatüo ngaolan tüopa kahmük üshei yete yan tai.

Jesuwe Mükmüopa Ni Meitam

27 # Mt 20.29-34. Jesuwe tüopa nyoi tüoh, hüyange I kemjang kemme ngohwante mükmüopa ni I pheite woi, üngwünne hüyange hüke ngaowe i, “David üha, tomante shüpshe pha.” 28Aope I noksa ja te ong mükmüopa ni I tangte pei, hüyange Jesuwe imnite i, “Taowe hatüo linge oklak she numan-e ütinglak nang kü a?” Imniye Ite i, “Üm, üyongpa.” 29Tüophei me Iye imni mükte jonne i, “Nangniye ütinglakpu kih hatüo nang nite ngaitüoh.” 30Imni mük ep, Jesuwe imnite kentinglak ne ngao, hüyange i, “Aote-o tüopa shingne tahtam.” 31Hüyangpoi imni yanne tai hüyange tüopa kahtok üshei yeme I jeng meiyange jalunne jaine tam.

Jesuwe Ngao-ükpa Meitam

32 # Lk 11.14-15; Mt 12.22-24; Mk 3.22; Jn 7.20. Aope iman yanne tai, laa ompu ngao-ükpa ja üne-o I tangte woipei. 33Aope laa jange tei ngao-ükpa kahtawe ngaopu ok. Ükhong yashan hüyange hüke i, “Israel me hatüo kih ngaipu aope-o mannge.” 34Hüyangpoi Phariseelan-e i, “Laalan janglak jingne Iye laa Ahngpa jon tüohpu üja.”

Tah Maawe Nyinteki, Kahtawe Yewang

35 # Mt 4.23; Mk 6.6. Jesuwe chingnyu hei chingha üshei yete iman synagogue me konnyüowe, ahngching pungao ümei konnyüowe hüyange dakpalan hüyange daktin ülam maapu meiye kem.

36 # Mk 6.34; Mt 14.14; 15.32; Lung 27.17; Zekh 10.2. Aope Iye ükhong nge iman jingne I mongshange teih, hangjingne “Nyeeyompa ja yenangpu nyee kih,” iman mongshang hüyange ülam yenang. 37#Lk 10.2; Jn 4.35.Hüwante Iye yoi pinlante i, “Tah maawe nyinteki, hüyangpoi nanpalan yewang. 38Tüokhei tah nokpupawe I tah yahlak nanpalan shonlak jingne yoptüoh.”

Currently Selected:

MATTHEU 9: KONYBSI

Highlight

Copy