PUYAN LUHA’ 9
9
1Uʹo ina melikat iaʹ kelema mempo tekepip pe. Akeʹ taʹan ca betuʹen nai laboʹ cen langit abeʹ kaʹ tanaʹ. Kun nte naʹ kusi lubang ntem mia. 2Kun betuʹen ina mesik lubang ntem ina. Belekaʹ ngesiben kenai sap, koʹ baʹan ca sap kelahun luten iaʹ bioʹ are, pa mata tau ngan awang tai lirem kuʹun sap cen lubang ntem ina. 3Uʹo ina kenai pahu tugung sap ina, nai kusun tanaʹ. Kun nte naʹ penyukat laʹit me pahu dina, koʹ baʹan laʹit lipan busung. 4Kun nte badaʹ mida ayen ngejaʹat udu kusun tanaʹ, pekina pe kayu, pekina pe inu pula. Bang iaʹ senteng ida ngejaʹat, ina ne kelunan diaʹ abeʹ un tedanaʹ penyalet Allah neng anang nte. 5Pahu dina abeʹ de senteng lematai kelunan dini, un sepuʹo bang petuyen ida dalem lema bulan majan ne. Sakit ina koʹ baʹan seʹ kelunan seninget lipan busung are. 6Dalem lema bulan ina, ubaʹ kelunan dina mita patai. Abeʹ pe ida senteng. Ubaʹ pe ida tai matai, un patai kelap neng ida.
7Un seʹ puyan pahu dina koʹ baʹan seʹ kuda diaʹ petenup ubaʹ ketai pepatai are. Neng usun ulu re un koʹ baʹan seʹ tapung paren iaʹ un mat. Silung nte koʹ baʹan silung kelunan are. 8Puk de koʹ baʹan seʹ puk leto are, ngan jipen de koʹ baʹan jipen lencau are. 9Neng usuk sapai re un ukoʹ baʹan diseʹ tingang malat are. Dau tuyau kapit de ngesare koʹ baʹan dau kasa kuda kadoʹ mihit asing kerita buk dulu pepatai are. 10Toʹ pahu dina un iko re koʹ baʹan iko lipan busung iaʹ un tahat kidi. Neng iko re un penyukat laʹit, man nte ngejaʹat kelunan pa dalem lema bulan majan ne. 11Un ca laja iaʹ man ida, ca melikat iaʹ ngkang lubang ntem ina. Ngadan ne kuʹun isiu Iberani, Abadun, ngan dalem isiu Gerika, Apuliun, (iaʹ sen ne “Laki iaʹ Nasaʹ”).
12Un penaru iaʹ ading ina lepa lapa. Nai dau taru iaʹ ke ngebayaʹ laʹa.
13Kun melikat iaʹ kenem mempo tekepip pe. Penco heʹ kenahan dau isiu nai cen pat sawing padung mat, ukoʹ pencai iaʹ nyeripa Allah ina. 14Kun dau ue neng melikat iaʹ kenem ina, iaʹ ngkang tekepip ina: “Nakau ne pat usa melikat diaʹ peput kaʹ sungai Iperat iaʹ bioʹ ina.” 15Penco re nakau pat usa melikat dina. Un diseʹ ban nte lepa petenup kenai kawang tegoʹ jam ini, ngan tau ini, ngan bulan ini, ngan uman ini, apan nte ke lematai ca tulat telu kelunan mung. 16Kun nceʹ kenahan dau cap ketoʹ kadoʹ sedadu diaʹ ngedung neng kuda dina, dua ato juta pengekadoʹ de. 17Dalem penaʹat ceʹ ina, akeʹ taʹan diseʹ kelunan dina ngan kuda re. Pekini diseʹ de: neng palai un seʹ tingang malat neng sapai re bala koʹ baʹan seʹ luten, ngan neng palai un pe seʹ sebileng mepo, ngan neng palai un seʹ iaʹ memit koʹ baʹan belirang. Ulu kuda dina koʹ baʹan diseʹ ulu lencau are. Cen paʹ de kenai luten, ngan sap, ngan tasap belirang pe. 18Moʹ ca tulat telu mung kelunan matai kuʹun telu naʹan layu ina, iaʹ ina luten, ngan sap, ngan tasap belirang, iaʹ nai cen paʹ kuda dina. 19Moʹ penyukat mung kuda dina un kedalem paʹ de, ngan neng iko re. Moʹ iko re koʹ baʹan seʹ ncung ulai iaʹ un ulu man nuduk kelunan are.
20Mung kelunan diaʹ ca, diaʹ abeʹ un matai kuʹun layu telu dini, abeʹ pe ida nyepuleʹ kimet de cen puyan pemuyan nte. Abeʹ de tai pekenaʹ puyan lemameʹ palaʹ bali, ngan uyat mat, ngan uyat pirak, ngan uyat temaga, ngan batu, ngan kayu. Abeʹ pe uyat dina taʹan. Abeʹ pe ida kenahan. Abeʹ pe ida tai masat pe. 21Abeʹ pe kelunan dina tai nesen ngan nyepuleʹ kimet de neng puyan lematai kelunan, ngan puyan pucau, ngan puyan pemung nyelem, ngan puyan ngelau.
Currently Selected:
PUYAN LUHA’ 9: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
