PUYAN LUHA’ 8
8
Penyalet iaʹ ketujoʹ o
1Tegoʹ Anak Dumba ina lemasi mesik penyalet iaʹ ketujoʹ o, belinga tuaʹ ne, abeʹ un dau isiu ngan tuyau kaʹ surga, pa beluaʹ ca jam kihoʹ pengemajan ne. 2Akeʹ taʹan tujoʹ de melikat diaʹ nekejeng nyeripa Allah. Tujoʹ de tekepip, dulu naʹ mida.
3Nai kun ca usa melikat diaʹ ca nekejeng dudo padung pencai. Ia ngkang ca kiut mat, ukoʹ nutung lisan kemanyan iaʹ me baʹoʹ. Kadoʹ lisan kemanyan ida naʹ mia, apan ne ke mencai ie pemung ngan temameʹ mung kelunan diaʹ anun Allah, ngan naʹ a neng usun padung ncai mat iaʹ pedeng kata padung pengaren ina. 4Un sap kemanyan ina, pemung ngan temameʹ kelunan diaʹ anun Allah, ketai kempau cen ujoʹ melikat iaʹ nekejeng nyeripa Allah ina. 5Kun melikat ina alaʹ kiut kemanyan ina, meseʹ luten kidi cen padung pencai ina, penco ho lemintet te kusun tanaʹ. Belekaʹ nuyan dau gerem, ngan dau tuyau langit, ngan bekilet, ngan puyan liung tanaʹ.
Tujoʹ de tekepip
6Uʹo ina mung tujoʹ melikat diaʹ ngkang tujoʹ tekepip dina ke petenup ke mempo ho.
7Iaʹ ading mempo tekepip pe. Penco kenai ujan batu pemung ngan luten, pekelet ngan dahaʹ, nai pubeʹ kusun tanaʹ. Ca tulat telu usun tanaʹ ini iaʹ tutung, ngan ca tulat telu kayu tutung, peging ngan udu kusun tanaʹ ne.
8Uʹo ina kun melikat iaʹ kedua ha mempo tekepip pe. Un ca luten koʹ baʹan seʹ ca mudung bioʹ iaʹ tutung, tai pintet kaʹ banget. Penco ca tulat telu banget tai ngaliu dahaʹ, 9ngan ca tulat telu mung inu iaʹ mudip dalem banget ina matai. Ngan tai tasaʹ ca tulat telu mung kapen ne.
10Uʹo ina kun melikat iaʹ ketelu mempo tekepip pe. Penco kenai betuʹen bioʹ le laboʹ cen langit. Ia tutung koʹ baʹan ca titiu are. Betuʹen ina iaʹ nai nantaʹ neng ca tulat telu mung alo sungai, ngan mung lubang sungai. 11Un ngadan betuʹen ina, dulu pisiu Batu Paʹit. Ca tulat telu sungai ina mung tai ngaliu paʹit. Kadoʹ kelunan diaʹ nisep sungai ina matai, moʹ sungai ina ukoʹ baʹan laʹit saloʹ de.
12Kun melikat iaʹ kepat mempo tekepip pe. Penco tulat telu mata tau sihoʹ tasaʹ ne, ngan ca tulat telu pe bulan sihoʹ o, ngan ca tulat telu pe betuʹen sihoʹo, pa ketai ca tulat telu dema ha pesau. Ina ukoʹ o naʹ tau ca tulat telu ue mentem, pekina pe ngahu.
13Kun nceʹ naʹat, mentung kenahan dau ca sui atung iaʹ madang kaʹ beluaʹ awang, iaʹ bioʹ dau ngelengap kuma ha: “Pincaʹ, pincaʹ, pincaʹ mung kelunan diaʹ mudip kusun tanaʹ tegoʹ kenai tuyau cen telu melikat diaʹ ca iaʹ mempo tekepip de uʹo.”
Currently Selected:
PUYAN LUHA’ 8: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
