PUYAN LUHA’ 7
7
144,000 kelunan lepoʹ Israil
1Uʹo ina akeʹ taʹan pat usa melikat nekejeng neng pat tikung usun tanaʹ. Ida mepen pat lubang bahiu usun tanaʹ ne, apan bahiu abeʹ un nai lemalit kusun tanaʹ, pekina pe kaʹ banget, pekina pe neng inan kayu ne. 2Ngan akeʹ taʹan pe kenai melikat diaʹ ca kempau cen sek tau, iaʹ ngkang penyalet Allah iaʹ mudip. Kun melikat ina lemikaʹ bioʹ dau palaʹ pat usa melikat dina, diaʹ Allah lepa naʹ penyukat mida apan nte senteng ngejaʹat tanaʹ ngan sungai ina. 3Kun dau melikat ina: “Ayen ngejaʹat tanaʹ, ngan sungai, ngan kayu, kena meʹ ke nedanaʹ diaʹ pegayeng me Allah le man ca penyalet neng anang nte.” 4Un ne badaʹ makeʹ pengekadoʹ kelunan ia nedanaʹ man tedanaʹ penyalet Allah neng anang nte. Pengekadoʹ de ca ato pat puloʹ pat ibu, kenai re cen singket lepoʹ Israil. 5Cen lepoʹ Yahudi, puloʹ dua ibu ia nedanaʹ man penyalet ina. Cen lepoʹ Rubin, puloʹ dua ibu; cen lepoʹ Gat, puloʹ dua ibu; 6cen lepoʹ Asir, puloʹ dua ibu; cen lepoʹ Naptali, puloʹ dua ibu; cen lepoʹ Manase, puloʹ dua ibu; 7cen lepoʹ Simiun, puloʹ dua ibu; cen lepoʹ Liwi, puloʹ dua ibu, cen lepoʹ Isakar, puloʹ dua ibu; 8cen lepoʹ Sebulun, puloʹ dua ibu; cen lepoʹ Yusup, puloʹ dua ibu; cen lepoʹ Benyamin, puloʹ dua ibu.
Ca Mpun bioʹ
9Lepa ina, kun nceʹ taʹan kadoʹ laleʹ diseʹ kelunan. Abeʹ un aheʹ iaʹ senteng pecap ketoʹ pengekadoʹ kelunan dina. Kenai re cen singket lepoʹ, ngan singket puhoʹ, ngan naʹan kelunan, ngan naʹan isiu. Mung nte nekejeng nyeripa padung pengaren ina ngan Anak Dumba ina. Gelam nte sapai puteʹ dadoʹ. Un daʹan tung nyo neng ujoʹ de. 10Bioʹ dau re ngelengap kuma: “Cen Allah kenai puyan iaʹ pudip ameʹ dalem Tuhan Allah iaʹ madung neng usun padung pengaren ina, ngan cen Anak Dumba lete.” 11Mung melikat nekejeng teliling padung pengaren ina, pemung ngan diaʹ lataʹ dina, ngan diaʹ pat naʹan diaʹ mudip dina. Penco re pengkup nyeripa padung pengaren ina ngan nyelama Allah, 12kuma: “Amin. Pada, ngan serema peniga, ngan tudi penisen, ngan puyan nyuaʹ tiga saheʹ, ngan selama, ngan penyukat, ngan pengali, un neng Allah le pa abeʹ majan ʹo. Amin.”
13Un dau ca diaʹ lataʹ dina lemutu akeʹ: “Aheʹ kelunan diaʹ un gelam sapai puteʹ dadoʹ dini? Cen mpi kenai re tupe?”
14Un dau heʹ neng ia: “Abeʹ keʹ tisen amai. Ikoʹ iaʹ tisen.”
Un dau ue neng akeʹ pelaʹa: “Ini re kelunan diaʹ lepa ban nai lapa penaru iaʹ bioʹ ina. Lepa ne ida muheʹ sapai re ngan ngeputeʹ e man dahaʹ Anak Dumba ina. 15Ina ukoʹ de nekejeng nyeripa padung pengaren Allah ina, ngan sebayang mia, naʹ tau ngan ngahu, dalem umaʹ palan ne. Ngan ia iaʹ madung neng usun padung pengaren ina, ia tengen iaʹ ke ngelidung ida. 16Abeʹ de tisen laʹu laʹa, pekina pe muhang. Pekina pe abeʹ de ke sihoʹ pana katan tau, mele inu iaʹ ke pelasoʹ ida. 17Moʹ Anak Dumba, iaʹ un neng beluaʹ padung pengaren ina, ia iaʹ ke tai tuʹa mengau ida, ngan ketai ajak ida palaʹ kudaʹ lubang tebut sungai iaʹ ngeriman. Ngan Allah pe iaʹ ke miʹit singket singket luloʹ cen mata re.”
Currently Selected:
PUYAN LUHA’ 7: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
