PUYAN LUHA’ 18

Kasing lepoʹ Babil

1Uʹo ina pelaʹa akeʹ taʹan ca melikat nai kentaʹ cen langit. Bioʹ penyukat te, ngan serema pengaren ne tai tipo kusun tanaʹ ne. 2Bioʹ dau ue lemikaʹ kuma ha: “Lepa pekaliu ne lepoʹ Babil iaʹ Bioʹ ina, lepa nuyan ukoʹ jaka, ngan ukoʹ bali iaʹ jameng, ngan ukoʹ kadoʹ naʹan sui diaʹ jameng, ngan diaʹ ilu miʹi. 3Moʹ leto ina mejen naʹ jakan ne me mung dulu. Jakan iaʹ laʹit ina iaʹ pekaseng kimet dulu tai pekabu. Diaʹ paren kusun tanaʹ ini, lepa ne ida tai pemung nyelem ngan ne. Pekina pe kelunan diaʹ pebeli kusun tanaʹ tai kayaʹ moʹ kuʹun puyan nte mekum laleʹ neng puyan iaʹ jaʹat.”

4Kun nceʹ kenahan dau ca isiu cen langit kuma ha:

“Kelap ne ikem kelunan diaʹ anun nceʹ. Kelap cen leto ina.

Ayen ncem tai tabin neng penyalaʹ a.

Ayen ncem sihoʹ ukum pemung ngan ne.

5Uban penyalaʹ a tai kempau ukoʹ baʹan mpau langit are,

Allah petawai uban puyan jaʹat te ne.

6Nyuaʹ neng ia koʹ baʹan seʹ ban puyan ne neng ikem are,

nyuaʹ ia dua liwai neng puyan ne iaʹ lepa are.

Nyangan sawan ne man jakan laʹit iaʹ dua

liwai laʹit cen iaʹ ia lepa ban naʹ mikem.

7Naʹ tuyen ngan keta mia,

suaʹ ban puyan peniga ngan puyan ita iaʹ ia

lepa ban ngaham mia tengen are.

Moʹ lemuto ho pisiu neng ia tengen pekini dau:

‘Akeʹ ca leto paren. Madung ne akeʹ kini,

moʹ abeʹ keʹ ca balu,

nyahut ceʹ un ke tisen tekaʹ pengebampa ne.’

8Moʹ kuʹun dau isiu ue ne ke nai mung layu

nantaʹ ia neng ca tau ue ʹo.

Un pe penyakit, un pe keta, un pe lien ne.

Ke sihoʹ tutung pe ia ʹo,

uban penyukat Tuhan Allah iaʹ muhat ke

pebetep ukum mia.”

9Mung paren kusun tanaʹ diaʹ lepa tai pemung nyelem ngan mekum puyan ngan ne, penco re ngelalo mentung nange taʹan lepoʹ ina tai tutung, ngan sap pe nai kempau. 10Cen coʹ ne ida nekejeng, moʹ de takut penuyen ne. Un dau re: “Siʹau pe lepoʹ bioʹ, lepoʹ Babil iaʹ salet cen kena re. Adeʹ ban dalem ca jam le ukum nai nantaʹ ikoʹ.”

11Mung kelunan iaʹ pebeli kusun tanaʹ ini ke nange ngan nyidau ia, moʹ abeʹ un aheʹ iaʹ lemeli inu ida pebeli nuʹo. 12Abeʹ un aheʹ iaʹ ke lemeli mat de, ngan pirak, ngan batu intan, ngan batu mutiara re, pekina pe belasoʹ anyam, ngan belasoʹ silem, ngan belasoʹ setera, ngan belasoʹ selubaʹ de, pekina pe naʹan naʹan kayu iaʹ me baʹoʹ, ngan inu iaʹ ida ban uyan man sip pun, ngan mung kayu iaʹ mahan beli, ngan inu iaʹ ida ban uyan man jangin, ngan malat, ngan batu puteʹ, 13pekina pe kulit kayu me, ngan bekai, ngan lisan kemanyan, ngan lisan tumu, ngan kenyo. Un pe telang anggur, ngan teliseʹ buaʹ kayu, ngan napu gandum, ngan jelai gandum, ngan sapi, ngan dumba, ngan kuda, ngan asing kerita, ngan kelunan ulaʹ, ngan berua kelunan ne. 14Kun dau kelunan iaʹ pebeli ina neng leto ina: “Mung inu iaʹ ikoʹ ubaʹ mampin lepa salai ne cen ikoʹ. Mung pengekayaʹ ngan peniga hoʹ lepa pesau ne cen ikoʹ. coʹ are ke taʹan ida laʹa.” 15Un kelunan diaʹ pebeli dina, diaʹ lepa ban kayaʹ kuʹun lepoʹ ina, ida iaʹ nekejeng cen coʹ ne, moʹ de takut penuyen ne. Kun nte nange ngan nyidau. 16Un dau re: “Siʹau ne lepoʹ bioʹ ina. Ayoʹ o pegelam usa ha man sapai belasoʹ puteʹ, ngan belasoʹ silem, ngan belasoʹ selubaʹ, ngan un pe gelam me mat, ngan batu intan, ngan batu mutiara. 17Bang neng ca jam tuaʹ le mung pengekayaʹ a lepa salai.”

Mung kelunan diaʹ ngkang kapen, ngan diaʹ ngedung kidi, ngan kelunan ngalut, ngan mung diaʹ mita pengudip de kaʹ banget, ida iaʹ nekejeng cen coʹ. 18Tegoʹ re taʹan seʹ nai sap tutung leto ina, kun dau re: “Lepoʹ iaʹ mpi iaʹ kuaʹ ngan lepoʹ bioʹ ina taʹin?” 19Kun nte mesup abu neng ulu re, mentung nte lemikaʹ ngan nyidau. Un dau re: “Siʹau ne lepoʹ bioʹ ina. Moʹ mung kelunan diaʹ un kapen kaʹ banget lepa tai kayaʹ kuʹun lepoʹ ina. Bang neng ca jam tuaʹ le ketai mung inu ue salai.”

20Ikem lepoʹ surga tai bangen ne tawai hem uban lepoʹ ina salai. Tai bangen ne tawai hem, e ikem diaʹ anun Allah, ikem diaʹ lawa Injil ngan diaʹ pegawa Tuhan, moʹ Allah lepa pebetep ukum me lepoʹ ina suaʹ ban puyan ne neng ikem.

21Un ca melikat, iaʹ pali laleʹ le, ngayang ca batu bioʹ ukoʹ baʹan bioʹ ca lesung batu. Kun ne lemintet te kaʹ banget, mentung dau ue: “Pekini seʹ Allah ke pet lepoʹ Babil iaʹ Bioʹ ina uʹo. Nyahut ca kelunan are ke taʹan ne laʹa ʹo. 22Dau tuyau kelunan ti sampeʹ, ngan belian, ngan ti kedingut, ngan ti tekepip, nyahut dulu are kenahan ne laʹa dalem ikoʹ. Ngan pekina pe naʹan naʹan penudi gayeng kelunan, nyahut te abeʹ un neng ikoʹ ne laʹa. Ngan pekina pe dau tuyau dulu mecaʹ, nyahut dulu abeʹ un ke kenahan laʹa dalem ikoʹ. 23Ngan serema ca peritaʹ pe nyahut dulu abeʹ un ke taʹan ne dalem ikoʹ ne laʹa, ngan pekina pe dau isiu laki tai alaʹ leto, ngan leto diaʹ pepeto ngan laki, nyahut de abeʹ un ke kenahan dau re laʹa dalem ikoʹ. Moʹ kelunan diaʹ pebeli cen ikoʹ, ida iaʹ bioʹ laleʹ penyukat kusun tanaʹ ne, ngan man puyan pucau hoʹ are, ikoʹ pedaru mung lepoʹ kusun tanaʹ ini.”

24Ini iaʹ ukoʹ lepoʹ Babil sihoʹ ukum, uban dahaʹ diaʹ pegawa Tuhan, ngan dahaʹ kelunan diaʹ anun Tuhan lepa luhaʹ kidi, ngan pekina pe dahaʹ mung kelunan diaʹ dulu lepa lematai kusun tanaʹ ini.

Currently Selected:

PUYAN LUHA’ 18: KNT

Highlight

Copy

Compare