PUYAN LUHA’ 19
19
1Uʹo ina akeʹ kenahan bioʹ dau kahi koʹ baʹan dau mpun bioʹ kelunan kadoʹ kaʹ surga kuma ha: “Aliluya, pada Allah, moʹ un puyan iaʹ pudip ilu ngan puyan serema peniga ngan puyan penyukat iaʹ anun Tuhan Allah le. 2Mung ukum tiraʹ a telit ngan teneng. Moʹ ia lepa pebetep ukum neng leto pedayang iaʹ bioʹ ina, iaʹ lepa ngejaʹat usun tanaʹ ini man puyan pemung nyelem me. Allah lepa mukum ia suaʹ a lematai kelunan diaʹ pegayeng me Allah.” 3Ca liwai pelaʹa kun nte ngelengap. Un dau re: “Aliluya, pada Allah. Sap tutung lepoʹ ina ngesiben pa majan.” 4Un diaʹ lataʹ, dua puloʹ pat usa didai, ngan diaʹ pat naʹan diaʹ mudip didai, kun nte muʹup lemameʹ palaʹ Allah iaʹ madung neng usun padung pengaren ina. Un dau re: “Amin, Aliluya, pada Allah.”
Bunut pepeto Anak Dumba
5Uʹo ina kenai dau ca isiu cen padung pengaren ina kuma ha: “Pada Allah le, mung ngkem dia pegayeng mia, ngan mung diaʹ nyelumuk ia, diaʹ lataʹ pekina pe diaʹ dumit.” 6Kun nceʹ kenahan dau pelaʹa koʹ baʹan dau kahi mpun kelunan kadoʹ, ngan ukoʹ dau tengo uʹung iaʹ kasa are, ngan gerem langit iaʹ bioʹ dau kuma ha: “Aliluya, pada Allah, moʹ Tuhan Allah le iaʹ Atek Bioʹ Penyukat, ia iaʹ Paren le. 7Tiga le bangen ngan saheʹ kimet pada neng pengebioʹ puyan ne. Lepa abeʹ ne jakaʹ Anak Dumba ina ke pepeto, moʹ leto ho, lepa ban petenup ne ia. 8Allah lepa cuk leto ho ne un gelam belasoʹ puteʹ iaʹ nyerema ngan buheʹ.” (Gelam belasoʹ puteʹ ina ca kata pemuyan iaʹ teneng, iaʹ kelunan diaʹ anun Allah uyan.)
9Un dau melikat neng akeʹ: “Nyurat ne ikoʹ neng tiraʹ ini: Bangen saheʹ ne mung kelunan diaʹ Tuhan mengin tai kaʹ bunut pepeto Anak Dumba ina.” Un dau isiu melikat ina laʹa: “Ini iaʹ atek lan tiraʹ Allah.”
10Kun nceʹ muʹup kata taket melikat ina ke lemameʹ palaʹ ia. Un dau ue neng akeʹ: “Ayen ti pekina, akeʹ ne ca ulaʹ Allah pekuaʹ ngan ncoʹ lete, pekuaʹ ngan cenganak koʹ iaʹ mampin katuk telit, iaʹ nai luhaʹ kuʹun Yesus. Bang Allah le ilu lemameʹ.”
Kuʹun katuk telit iaʹ Yesus peluhaʹ milu, ina iaʹ petangen pegawa Tuhan ke penco katuk milu.
Laki iaʹ ngedung neng usun kuda puteʹ
11Uʹo ina heʹ taʹan surga pesik, idi kenai ca kuda puteʹ. Un laki iaʹ ngedung kidi un ngadan ne Semamet ngan Teneng, moʹ o ngkang puyan iaʹ telit man ne ke pepatai ngan ke pebetep ukum tiraʹ. 12Un seʹ mata ha koʹ baʹan seʹ lahang luten are. Kadoʹ tapung paren neng ulu ue. Un ca ngadan senurat neng ia. Abeʹ un ca kelunan iaʹ tisen ngadan ina, bang ia tengen le tisen ne. 13Un sapai dadoʹ o tipo kuʹun dahaʹ. Kun dulu pisiu ia: “Tiraʹ Allah.” 14Mung bawa diaʹ kaʹ surga nai bayaʹ ia, ngedung neng kuda puteʹ de. Sapai re belasoʹ puteʹ buheʹ. 15Neng paʹ laki ina un bahing iaʹ nyahit, man ne ke nyupeʹ gaham perinta kelunan. Ia ke ngaren ida man petung malat te ʹo. Ia ke menyut kelunan neng tahan buaʹ anggur, ina seleket ukoʹ pengelaseʹ kenca Allah iaʹ Atek Bioʹ Penyukat. 16Neng sapai ie ngan neng taket te un ngadan ne senurat kidi: “Iaʹ Pengebioʹ Paren, ngan Iaʹ Pengebioʹ Tuʹa.”
17Uʹo ina akeʹ taʹan pelaʹa ca melikat nekejeng kedalem mata tau. Kun ne lemikaʹ bioʹ le palaʹ mung sui iaʹ madang kaʹ beluaʹ awang: “Nai ne ikem pempun uman bunut bioʹ iaʹ anun Allah. 18Idi hem uman sin diaʹ paren ʹo, ngan sin diaʹ kepala sedadu, ngan diaʹ sedadu pe, ngan sin kuda, ngan sin kelunan iaʹ ngedung kidi, ngan sin mung kelunan, diaʹ ulaʹ ngan diaʹ abeʹ un ulaʹ, diaʹ lataʹ ngan diaʹ dumit pe.”
19Uʹo ina akeʹ taʹan pelaʹa pun jaʹat idai, pemung ngan diaʹ paren kusun tanaʹ, peging ngan bawa ha. Seʹ de pempun ubaʹ ke pepatai ngan laki iaʹ ngedung neng kuda ina, peging ngan bawa ha. 20Kun diaʹ anun Tuhan nyalut pun jaʹat ina, peging ngan pegawa palo iaʹ lepa uyan nyingan kata pun jaʹat ina. (Man puyan nyingan ina pegawa palo lepa pelingu kelunan diaʹ un tedanaʹ pun jaʹat ina, ngan kelunan diaʹ lemameʹ palaʹ uyat pun ina.) Kun nte pet pun ina peging ngan pegawa palo ina, petem nte mudip, kedalem bawang luten iaʹ ngelahang kuʹun batu belirang. 21Mung bawa re dua matai kuʹun bahing iaʹ nai cen paʹ laki iaʹ ngedung neng kuda ina. Mung sui beso uman sin nte.
Currently Selected:
PUYAN LUHA’ 19: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
