PUYAN LUHA’ 17
17
Leto pedayang iaʹ bioʹ
1Uʹo ina kenai ca me diaʹ tujoʹ usa melikat dina iaʹ un tujoʹ de kiut ina, nai palaʹ akeʹ ngan kuma ha: “Nai ne, akeʹ ke peluhaʹ mikoʹ kumpin puyan ke pebetep ukum neng leto pedayang iaʹ bioʹ ina uʹo. Leto pedayang ina ilu pekata neng lepoʹ bioʹ, iaʹ tenedeng kata sekabeʹ lung sungai. 2Mung diaʹ laja kusun tanaʹ ini lepa pemung nyelem ngan leto pedayang ina. Ngan pekina pe kelunan kusun tanaʹ lepa tai mabuk kuʹun jakan pekabu ue.
3Nai kun Berua Tuhan mesun neng akeʹ, ngan melikat idai tai ngkin akeʹ neng ca tanaʹ lenga. Kina heʹ taʹan ca leto madung neng usun ca pun bala. Kadoʹ ngadan jaʹat senurat tipo usa pun ina. Pun ina un ulu ue tujoʹ de, uhung nge puloʹ de. 4Leto ina un gelam me silem ngan selubaʹ, un pe mat, ngan batu intan, ngan batu mutiara tipo ia. Neng ujoʹ o ia ngkang ca sawan mat iaʹ sangan kuʹun naʹan naʹan iaʹ jameng ngan sigut ban kuʹun puyan pekabu. 5Neng anang nge un senurat ngadan ne iaʹ suhuk sen, pekini dau ue: “Babil iaʹ Bioʹ, ina iaʹ tuʹa mung leto pedayang, ngan mung diaʹ ngelan uyat kusun tanaʹ.” 6Kun nceʹ taʹan leto ina mabuk kuʹun dahaʹ kelunan diaʹ anun Tuhan, ngan dahaʹ kelunan diaʹ ban semamet bayaʹ Yesus pa re matai are.
Tegoʹ keʹ taʹan ia ne, atek salam aleʹ tekaʹ keʹ. 7Kun melikat ina lemutu akeʹ: “Moʹ inu adeʹ koʹ salam tupe? Akeʹ ke badaʹ mikoʹ sen iaʹ suhuk neng puyan leto ina, ngan neng pun iaʹ baʹ ia ne, pun iaʹ tujoʹ de ulu ngan puloʹ de uhung nte ina. 8Pun iaʹ ikoʹ lepa taʹan idai, mudip cen kena are, abeʹ e mudip naʹkini. Kenai pia kempau laʹa ʹo cen lubang ntem ina, ngan ketai ie sihoʹ tasaʹ ʹo. Mung kelunan kusun tanaʹ ini diaʹ abeʹ un ban senurat ngadan dalem surat udip kena usun tanaʹ ini nuyan are, ke salam mung tekaʹ de uban taʹan pun ina. Mudip te ia cen naʹaʹ, ia iaʹ, abeʹ e mudip naʹkini, un sepuʹo kenai ie luhaʹ pelaʹa ʹo.”
9“Puyan ini ke ten penudi ngan penisen kelunan. Un tujoʹ de ulu ue, ina tujoʹ de mudung iaʹ kukoʹ leto ina madung, ngan pekina lete tujoʹ de laja. 10Lema re ida lepa laboʹ, petem lepe ca iaʹ ngaren naʹkini, ngan abeʹ un lepe iaʹ ca nai. Tegoʹ o nai uʹo, nai ie nuat tuaʹ le. 11Ngan pun jaʹat iaʹ ban mudip cen kena are, ngan abeʹ e mudip naʹkini, ia iaʹ ke aya laja iaʹ nai cen ahang diaʹ tujoʹ dina. Atek ketai lete ia sihoʹ tasaʹ uʹo.
12“Un puloʹ uhung iaʹ ikoʹ lepa taʹan are, ina puloʹ de laja diaʹ abeʹ un lepe ngkang pengaren nte. Un sepuʹo ida iaʹ ke alaʹ penyukat ke ngaren ukoʹ baʹan laja, nuat tuaʹ le, pemung ngan pun jaʹat ina. 13Mung nte kuaʹ ayo ke naʹ pengali re ngan penyukat de me pun jaʹat ina. 14Mung nte ke pepatai ngan Anak Dumba ina ʹo. Un sepuʹo Anak Dumba ina peging ngan kelunan iaʹ ia lepa mengin, iaʹ ia lepa lemileʹ, diaʹ semamet bayaʹ ia, ke un usun neng ida dina moʹ ia iaʹ atek pengebioʹ tuʹa, ngan pengebioʹ diaʹ paren.”
15Un dau melikat ina neng akeʹ pelaʹa: “Un sungai iaʹ ikoʹ taʹan kukoʹ leto pedayang ina madung, kidi kudaʹ kadoʹ naʹan gaham perinta, ngan mpun kelunan, ngan lepoʹ kelunan, ngan naʹan isiu kelunan ne. 16Un diaʹ un puloʹ uhung, ngan pun jaʹat ina iaʹ ikoʹ lepa taʹan ini, ke miʹi re neng leto pedayang ina ʹo. Kun nte magang mung inu ue, penco re ke pugai ia, ngan uman sin usa ha, ngan nutung ia man luten. 17Moʹ Allah iaʹ lepa uyan kimet de ke ti bayaʹ pengubaʹ a, apan nte ca le kimet ngan Allah ke naʹ penyukat de me pun jaʹat ina man ne ke ngaren, pa ketai tiraʹ Allah ke palup lan ʹo.
18“Un leto iaʹ ikoʹ lepa taʹan ina, ia lete lepoʹ bioʹ iaʹ ngkang pengaren mung paren kusun tanaʹ ne.”
Currently Selected:
PUYAN LUHA’ 17: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
