PUYAN LUHA’ 16
16
Tujoʹ kiut sangan kuʹun kenca Allah
1Akeʹ kenahan pelaʹa dau ca lengap, iaʹ bioʹ dau cen umaʹ palan ina, pisiu diaʹ tujoʹ melikat dina. Un dau ue: “Tai ne mubeʹ tujoʹ kiut kenca Allah kusun tanaʹ.”
2Sulo ketai melikat iaʹ ading nge mubeʹ kiut te neng usun tanaʹ. Belekaʹ kenai ca penyakit tukoʹ iaʹ madam ngan jaʹat neng kelunan diaʹ un tedanaʹ pun jaʹat ina, ngan neng diaʹ lemameʹ palaʹ uyat te ne.
3Un melikat iaʹ kedua ina laʹa, kun ne mubeʹ kiut te neng banget. Penco banget ina tai ngaliu dahaʹ koʹ baʹan dahaʹ kelunan matai are. Mung inu diaʹ mudip kedalem banget ina matai.
4Un melikat iaʹ ketelu ina pelaʹa, kun ne mubeʹ kiut te neng mung alo sungai ngan lubang tebut. Tai sungai ina ngaliu dahaʹ. 5Penco heʹ kenahan dau melikat iaʹ un penyukat neng sungai kuma ha: “Ahaʹ Tuhan, teneng uban puyan ncoʹ pebetep ukum dini. Ikoʹ iaʹ atek buheʹ. Ikoʹ iaʹ un naʹkini, ngan iaʹ lepa ban un. 6Moʹ kelunan dina lepa pemusa dahaʹ kelunan diaʹ anun Allah, ngan diaʹ pegawa didai are. Ikoʹ iaʹ cuk ida nisep dahaʹ. Tekep de ke sihoʹ neng puyan ina.” 7Kun nceʹ kenahan pelaʹa dau cen padung pencai iaʹ kuma ha: “Ahaʹ Tuhan, Allah iaʹ Atek Bioʹ Penyukat, telit ngan teneng seʹ koʹ pebetep ukum ina.”
8Uʹo ina melikat iaʹ kepat ina pelaʹa, kun ne mubeʹ kiut te neng mata tau. Penco mata tau ina un penyukat sukat nutung kelunan, moʹ katan laleʹ tau ina. 9Lasoʹ ne kelunan kuʹun tau katan ina, penco re nunoʹ ngadan Tuhan iaʹ ngkang penyukat mung layu ina. Abeʹ pe ida tai nesen ngan nyepuleʹ kimet cen penyalaʹ de, ngan pempau seʹ pengebioʹ puyan Allah pelaʹa.
10Uʹo ina melikat iaʹ kelema ina, kun ne mubeʹ kiut te neng usun padung pengaren pun jaʹat ina. Penco mung tanaʹ iaʹ pun ina ngkang tai mentem. Sulo kelunan dina nyemaʹat jelaʹ de tengen moʹ de tuyen. 11Mentung dau re nunoʹ Allah kaʹ surga uban tuyen tekaʹ de sakit tukoʹ ina. Naʹ pia pekina, abeʹ pe ida nyepuleʹ kimet de cen puyan jaʹat de ne.
12Uʹo ina melikat iaʹ kenem ina mubeʹ kiut te neng sungai Iperat iaʹ bioʹ ina. Penco tai sungai ina meti, moʹ ke pawang janan me diaʹ laja diaʹ ke nai cen tanaʹ tahaʹ sak tau. 13Kun nceʹ taʹan telu usa bali jameng iaʹ koʹ baʹan diseʹ uang kup are, nai re kawang cen paʹ bali sungai ina, pekina pe cen paʹ pun jaʹat ina, pekina pe cen paʹ pegawa palo ina. 14Ida telu dina berua bali jaʹat iaʹ senteng uyan puyan nyingan. Ida telu diaʹ tai palaʹ mung laja kusun tanaʹ, moʹ de ubaʹ ke kelimpun ida, apan nte pepatai tegoʹ tau bioʹ Allah iaʹ Atek Bioʹ Penyukat ina.
15Un dau ca isiu: “Ngeringa hem, kenai heʹ nini koʹ baʹan seʹ kenai iaʹ ngelau are. Bangen saheʹ ne tekaʹ kelunan diaʹ petem maga ngan nubo gelam nte, apan nte abeʹ un tai masat ugai ngan saʹe neng ahang dulu uʹo.”
16Uʹo ina kun nte telu berua bali dina ngkin mung laja dina kelimpun kukoʹ iaʹ un ngadan dalem isiu Iberani Amagidun.
17Uʹo ina melikat iaʹ ketujoʹ ina mubeʹ kiut te kaʹ beluaʹ awang. Penco heʹ kenahan dau lengap nai cen padung pengaren dalem umaʹ palan ina, kuma ha: “Lepa palup ne.” 18Sulo kenai bekilet, ngan dau tuyau langit, ngan dau gerem, ngan tekaʹ sarem liung tanaʹ. Cen tading Allah nyelung uyan kelunan kusun tanaʹ ini, abeʹ un lepe liung tanaʹ iaʹ sarem tekaʹ kuaʹ baʹan ini ne. 19Lepoʹ bioʹ ina tai pasi petulat telu. Mung lepoʹ bioʹ kusun tanaʹ ini tai tasaʹ pe. Petawai lepe Allah neng lepoʹ Babil ne iaʹ bioʹ ina. Ina ukoʹ o cuk lepoʹ Babil ina nisep jakan cen sawan Tuhan, iaʹ ina jakan kenca ha iaʹ laseʹ. 20Mung lioʹ tai salai, ngan mudung abeʹ un laʹa. 21Kenai ujan batu luhoʹ cen langit sihoʹ kelunan; batu ina pekece ca pikun pengebahat te. Kun kelunan nunoʹ Allah suaʹ layu ujan batu ina, moʹ jaʹat laleʹ layu ina.
Currently Selected:
PUYAN LUHA’ 16: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
