PUYAN LUHA’ 15
15
Melikat diaʹ ngkin tujoʹ naʹan layu iaʹ kebayaʹ a
1Lepa ina akeʹ taʹan pelaʹa nai ca tedanaʹ bulen iaʹ bioʹ luhaʹ kaʹ langit. Salam laleʹ tekaʹ keʹ kidi. Un tujoʹ melikat diaʹ ngkin tujoʹ naʹan layu. Ina ne layu iaʹ ngebayaʹ lan, moʹ puyan ini ne iaʹ ke pekuʹo puyan ia peluhaʹ kenca Allah.
2Uʹo ina pelaʹa akeʹ taʹan koʹ baʹan seʹ banget, koʹ seʹ kelingai pekelet ngan luten are. Kun nceʹ taʹan mung kelunan diaʹ ban lepa un usun neng pun jaʹat ina, peging ngan uyat te, ngan iaʹ ban un lumpun ngadan ne are. Kun nte nekejeng kaʹ sada bahi banget iaʹ ukoʹ seʹ kelingai ina. Un nte ngkang sampeʹ de iaʹ Allah ban naʹ singket ida are. 3Kun nte belian dau belian Musa, iaʹ pegayeng me Allah ina, ngan belian Anak Dumba idai lete. Un dau re:
“Ahaʹ Tuhan Allah iaʹ Atek Bioʹ Penyukat,
atek bioʹ aleʹ ban pemuyan ncoʹ,
ngan salam tekaʹ meʹ kidi.
Ahaʹ laja mung lepoʹ,
teneng ngan telit janan ncoʹ.
4Ahaʹ Tuhan, aheʹ diaʹ abeʹ un nyelumuk ikoʹ?
Aheʹ diaʹ leko ke badaʹ pengebioʹ puyan ncoʹ tupe?
Uban ikoʹ tengen iaʹ buheʹ.
Mung lepoʹ kelunan kenai
lemameʹ palaʹ ikoʹ,
uban pemuyan ncoʹ iaʹ teneng lepa luhaʹ kata kelunan mung.”
5Uʹo ina pelaʹa akeʹ taʹan iaʹ atek luhaʹ dalem umaʹ palan pesik kaʹ surga, peging ngan buhan kedalem me, iaʹ badaʹ tugen ban Allah un ngan nte. 6Idi kenai tujoʹ usa melikat diaʹ ngkang tujoʹ de naʹan layu ina, nai re kawang cen umaʹ palan ina. Un gelam nte belasoʹ puteʹ iaʹ buheʹ ngan nyerema. Neng usuk de, sebileng mat kidi. 7Penco ca usa mida pat diaʹ mudip didai naʹ tujoʹ kiut mat me tujoʹ usa melikat dina, sangan kiut dina kuʹun kenca Allah iaʹ mudip pa majan. 8Umaʹ palan ina sangan kuʹun sap cen serema peniga ngan penyukat Allah. Abeʹ un aheʹ iaʹ senteng tai kedalem umaʹ palan ina pa ketai kuʹo tujoʹ layu diaʹ tujoʹ melikat dina ngkin didai.
Currently Selected:
PUYAN LUHA’ 15: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
