PUYAN LUHA’ 14
14
Belian kelunan diaʹ Tuhan lepa nakau cen iaʹ jaʹat
1Uʹo ina kun nceʹ naʹat, idi Anak Dumba idai nekejeng neng usun Mudung Siun. Un kelunan ngan ne ca ato pat puloʹ pat ibu diaʹ un ngadan Anak Dumba ina, ngan ngadan Amai re neng anang nte. 2Ngan akeʹ kenahan dau ca isiu cen langit koʹ baʹan dau cen uʹung kasa are, ngan koʹ baʹan dau gerem iaʹ bioʹ cen langit. Un isiu, iaʹ akeʹ kenahan ina, koʹ baʹan dau dulu metit sampeʹ are. 3Kelunan diaʹ ca ato pat puloʹ pat ibu dina nekejeng sileʹ padung pengaren ina, ngan diaʹ pat usa diaʹ mudip dina, ngan mung diaʹ lataʹ dina. Penco re belian ca belian mading, iaʹ abeʹ ca usa kelunan senteng pekalai ina, bang ida, diaʹ Tuhan ban lepa nyuaʹ man dahaʹ a kaʹ usun tanaʹ ini le, iaʹ senteng pekalai ie. 4Ini kelunan diaʹ pubo usa re buheʹ moʹ de abeʹ un ubaʹ pepeto. Ida mudip luʹung tuaʹ. Kelunan dini diaʹ bayaʹ Anak Dumba kempi kempi ketai ie. Mung nte iaʹ Tuhan lepa nyuaʹ man dahaʹ a neng ahang kelunan kadoʹ. Kelunan dini iaʹ ading ca ncai palaʹ Allah, ngan palaʹ Anak Dumba ina. 5Abeʹ un palo isiu re, ngan abeʹ un pengejaʹat de.
Telu re melikat
6Uʹo ina akeʹ taʹan pelaʹa ca melikat madang kaʹ beluaʹ awang. Ia ngkin Denga Injil iaʹ ngeriman ke pedenga ha palaʹ mung kelunan kusun tanaʹ ne, iaʹ ina palaʹ singket lepoʹ, ngan puhoʹ, ngan naʹan isiu, ngan singket naʹan gaham perinta ne. 7Ngan bioʹ dau ue ngelengap: “Nyelumuk ne neng Allah. Pada ne seʹ pengebioʹ puyan ne, moʹ lepa abeʹ ne jakaʹ a ke pebetep ukum neng kelunan. Nyelama ne palaʹ Allah iaʹ lepa ban uyan langit, ngan tanaʹ, ngan sungai, ngan mung lubang tebut ne.”
8Uʹo ina pelaʹa nai ca melikat iaʹ kedua ha bayaʹ iaʹ ading are, mentung dau ue pisiu: “Lepa kasing ne lepoʹ Babil iaʹ bioʹ ina. Atek kasing ne lepoʹ iaʹ ban naʹ telang jakan ne me mung kelunan. Ia mejen cuk ida nisep pe. Puyan pekabu ngan pemung nyelem iaʹ seleket pengelaʹit te.”
9Uʹo ina pelaʹa nai ca melikat iaʹ ketelu ue, tai ie bayaʹ dau didai, mentung bioʹ dau ue ngelengap: “Buk aheʹ kelunan diaʹ ke nyelama palaʹ pun iaʹ jaʹat, peging ngan uyat te are, ngan alaʹ tedanaʹ neng anang nte, buk ke abeʹ un neng ujoʹ de, 10atek de ke nisep telang jakan cen Allah, iaʹ ina kenca Allah iaʹ ia lepa ban petenup ina. Abeʹ un kelet te dalem sawan ukum kenca ha. Mung kelunan dina ke tuyen dalem luten ngan tasap belirang nyeripa mung melikat diaʹ buheʹ, ngan nyeripa Anak Dumba ina. 11Sap luten iaʹ petuyen ida ne, ina iaʹ tai kempau lemuto-uto ʹo. Abeʹ un ahang tuyen ina, utung tau utung alem, neng kelunan diaʹ lemameʹ palaʹ pun jaʹat peging ngan uyat te ina, me ida diaʹ un tedanaʹ ngadan ne.”
12Kuʹun puyan ini ne ilu kelunan diaʹ anun Allah diaʹ nyemamet bayaʹ dau katuk ukum Allah, ngan tudep bayaʹ Yesus, tekep le nengayet neng penaru.
13Penco heʹ kenahan dau isiu cen langit kuma ha: “Nyurat ne pekini: Cen uʹo ini, bangen saheʹ ne mung kelunan diaʹ matai ahaʹ de ke matai dalem gayeng Tuhan.”
Dau ipa Berua Tuhan: “Lan ne pekina. Ida diaʹ pekenaʹ neng gayeng nte iaʹ bahat, uban ubo gayeng nte ina iaʹ ketai pampin ngan nte ʹo.”
Ajau kelunan kusun tanaʹ
14Kun nceʹ taʹan pelaʹa ca abun puteʹ. Neng usun abun ina un ca usa koʹ baʹan seʹ kelunan madung. Un ca tapung mat iaʹ paren neng ulu ue. Un pe ca bahing, nyahit le man ne majau, neng ujoʹ o. 15Uʹo ina pelaʹa nai melikat iaʹ ca, nai kawang cen umaʹ palan. Kun ne ngelengap bioʹ dau neng laki iaʹ madung neng usun abun ina. Un dau ue: “Majau ne man bahing ajau hoʹ ne, moʹ lepa abeʹ ne jakaʹ ke majau ne ini. Ajau kusun tanaʹ lepa sukung ne sak ke.” 16Penco laki iaʹ madung neng usun abun ina nepiru bahing ajau ue ne kusun tanaʹ. Kun ne majau usun tanaʹ.
17Uʹo ina akeʹ taʹan pelaʹa kenai ca melikat iaʹ nai kawang cen umaʹ palan iaʹ kaʹ surga. Ia pe ca ngkang bahing ajau iaʹ nyahit le.
18Uʹo ina nai pe ca melikat laʹa, iaʹ un penyukat neng luten iaʹ nai cen ukoʹ padung pencai ina. Kun ne ngelengap bioʹ dau neng melikat iaʹ ngkang bahing ajau iaʹ nyahit ina. Un dau ue: “Mihau ne man bahing ajau hoʹ ne. Metoʹ ne kelampu buaʹ anggur usun tanaʹ, moʹ lepa mesak ne buʹan ne.” 19Kun melikat ina kanan bahing ajau ue neng usun tanaʹ, sulo ho metoʹ buaʹ anggur dina cen inan ne, penco pet te kedalem tahan iaʹ bioʹ, iaʹ ina kukoʹ kenca Allah. 20Kun dulu menyut buaʹ anggur ina dalem tahan iaʹ un tahaʹ awang lepoʹ bioʹ. Kenai dahaʹ musa cen dalem tahan ina, pengecoʹ kenai ie ngalo dua ato batu, ngan kapan ne masaʹ ca depa.
Currently Selected:
PUYAN LUHA’ 14: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
