2 KURINTUS 1
1
1Cen Paulus iaʹ nuyan lawa Keristus Yesus kuʹun pengubaʹ kimet Allah, ngan pekina pe cen cenganak le Timutius —
Palaʹ Mpun diaʹ ngelan Allah kaʹ lepoʹ Kurintus, ngan palaʹ mung diaʹ anun Allah kempi kempi kaʹ tanaʹ Gerika.
2Awaʹ pe Allah iaʹ Amai le, ngan Tuhan Yesus Keristus, ke naʹ pengelesau ue ngan udip iaʹ tadan mikem.
Paulus nyuaʹ tiga saheʹ palaʹ Allah
3Tekep le nyuaʹ tiga saheʹ palaʹ Allah, iaʹ Allah ngan Amai Tuhan le Yesus Keristus. Iaʹ ina Amai iaʹ bioʹ pengelesau, iaʹ atek Allah iaʹ puʹun mung peniga, iaʹ ke petangen ilu. 4Kun ne petangen ilu neng mung naʹan penaru le, apan tangen iaʹ ilu alaʹ cen Allah ina, idi lete iaʹ ilu senteng kanan man le ke petangen dulu diaʹ sihoʹ naʹan naʹan penaru. 5Kuaʹ baʹan le lepa un tulat dalem kadoʹ naʹan penuyen Keristus, pekina lete bioʹ kuʹo ne tulat peniga iaʹ ke petangen ilu dalem Keristus. 6Buk meʹ sihoʹ tuyen, ina ne tuman iaʹ ke petangen ikem ngan neng udip iaʹ ke pudip ikem dalem Tuhan. Buk meʹ ban tangen, ina te iaʹ ke petangen ikem pe, sulo hem un pengali man ncem senteng alaʹ denaʹ tawai ngan nengayet dalau penuyen iaʹ kuaʹ baʹan penuyen iaʹ nantaʹ ameʹ te. 7Cen diaʹ pekina, salet ne tekaʹ tebelum meʹ neng ikem. Tisen te ameʹ moʹ kuaʹ baʹan puyan ncem un tulat dalem penuyen meʹ, kuaʹ ina lete ikem un tulat dalem tangen iaʹ ameʹ alaʹ ne.
8Ahaʹ cenganak cenganak, tekep lete ameʹ petawai ikem neng puyan taru iaʹ ameʹ lepa sihoʹ kaʹ dale Asia are. Puyan penuyen iaʹ sihoʹ ameʹ un baran laleʹ ngan bahat laleʹ pa ketai iʹut tawai meʹ ke mudip. 9Ameʹ kuma ban tebuku udip meʹ ketai kuʹo ne. Un sepuʹo puyan ina nuyan apan meʹ abeʹ un napi tawai palaʹ puyan usa meʹ tengen, di lareʹ palaʹ ia iaʹ pudip kelunan matai, iaʹ ina Allah tengen. 10Kediʹut laʹa ameʹ matai kuʹun puyan iaʹ baran laleʹ are, di lareʹ Allah iaʹ nakau ameʹ, ngan ia iaʹ ke nakau ameʹ laʹa. Moʹ ameʹ lepa pesente tebelum meʹ palaʹ ia, ina ukoʹ meʹ nebelum ia ke nakau ameʹ laʹa, 11mentung ikem diaʹ pepo ngan meʹ man puyan ncem lemameʹ me ameʹ. Pekina ban ne Allah ke mipa dau temameʹ diaʹ kadoʹ, diaʹ ikem lemameʹ me ameʹ, sulo ho ke naʹ peniga ha mameʹ, mentung kadoʹ kelunan ke nyuaʹ tiga saheʹ palaʹ Allah tuman ameʹ.
Sedep kimet Paulus tai pekaliu
12Ini iaʹ ukoʹ meʹ selum tekaʹ: uban un tekaʹ dalem penawai meʹ iaʹ pedengkep ameʹ neng uban pengudip meʹ kusun tanaʹ ini, ngan iaʹ atek dau meʹ, ina ne puyan meʹ pepanak ngan ncem. Allah iaʹ ban ngaren puyan ina uban ia iaʹ naʹ mameʹ tempa kimet ngan dema tawai, kuʹun ban penyukat pengelesau ue. Abeʹ e kuʹun ban pengencam kimet le kelunan ne. 13Ameʹ nyurat mikem isiu iaʹ ikem senteng baca ngan tisen pekimet. Bang ina tuaʹ le ameʹ nyurat. Ngan akeʹ nebelum ikem ke tisen ne neng iaʹ sukung tekaʹ, 14iaʹ ikem tisen pa beluaʹ naʹkini, apan tegoʹ Tau Tuhan Yesus ʹo, ikem iaʹ senteng selum tekaʹ kuʹun ameʹ, koʹ baʹan ameʹ ke selum tekaʹ kuʹun ncem.
15Bioʹ penina heʹ neng mung puyan ina are, ina ukoʹ keʹ pekimet kenai menoʹ ikem ading are, apan ncem senteng alaʹ peniga kedua liwai. 16Dalau idai are, un kimet ceʹ ubaʹ ke menoʹ ikem dalau ketai heʹ kaʹ tanaʹ Makedunia are, ngan pekina pe dalau heʹ nai ngeliwet laʹa. Uʹo ina senteng ngkem pepo ngan nceʹ ke mejo asat ceʹ kaʹ tanaʹ Yudia. 17Naʹ pe pekina sedep keʹ are, abeʹ e kimet ceʹ iaʹ luhai tai pekaliu. Dalau heʹ nekena ke pekimet puyan pengasat ceʹ, abeʹ keʹ bang pekimet tuk usa heʹ tengen le, penco kawaʹ dau kuma ha: “Ahaʹ, ahaʹ,” mentung pisiu: “Naʹun, naʹun.” 18Kuaʹ baʹan Allah iaʹ un telit kimet, un dau tuket ceʹ neng ikem are, abeʹ e “ahaʹ” mentung “naʹun.” 19Moʹ ameʹ telu Silas ngan Timutius lepa pedenga Yesus Keristus Anak Allah neng ahang ikem. Abeʹ e Yesus iaʹ kuma ha “ahaʹ ngan naʹun” are. Di lareʹ ia ne seleket isiu Allah iaʹ pisiu “ahaʹ” milu. 20Moʹ ia iaʹ ngahaʹ mung tuket Allah are. Ina tuman ilu pisiu “amin” man Yesus Keristus, apan le ke nyerema peniga Allah ne. 21Allah tengen iaʹ nyalet pengelan meʹ, kuaʹ ngan puyan ne nyalet pengelan ncem ngan badaʹ ban pengudip le pebeka ngan Keristus. Allah tengen iaʹ nengen ilu. 22Ia lepa ban metip ilu iaʹ badaʹ ia tengen iaʹ un ilu. Ngan laʹa ia lepa ban naʹ Berua Buheʹ dalem penawai le nuyan kedatung neng mung inu iaʹ ia mampin tuman ilu ne.
23Akeʹ nyat Allah ke nugen isiu heʹ lan, moʹ ia iaʹ tisen kimet ceʹ. Kimet ceʹ abeʹ un ubaʹ tai kaʹ lepoʹ Kurintus dalau idai are, moʹ tekaʹ keʹ malap dau heʹ ke nyakit ikem. 24Abeʹ meʹ ubaʹ ke lemejen ikem neng inu iaʹ tekep ikem ke ngelan, moʹ ikem iaʹ lepa salet dalem pengelan. Di lareʹ ameʹ pegayeng pemung ngan ncem, apan ke un pit bangen ncem.
Currently Selected:
2 KURINTUS 1: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
