1 KURINTUS 16
16
Pencai iaʹ mepo diaʹ cenganak dalem Tuhan kaʹ tanaʹ Yudia
1Un dau heʹ neng puyan pempun ligit man le ke mepo cenganak le diaʹ anun Allah kaʹ tanaʹ Yudia. Koʹ baʹan dau heʹ lepa cuk mung Mpun Tuhan kaʹ tanaʹ Galatia are, pekina lete ikem uyan bayaʹ dau ina. 2Neng singket Tau Mingku, tekep ne singket usa hem mahung palai ligit bayaʹ ban pengekadoʹ penalan ncem are. Tiga hem peremun ne, idi dalau heʹ nai ʹo, abeʹ e titin le papit ligit ne. 3Dalau lepa heʹ abeʹ ʹo, kimet ceʹ ubaʹ ke cuk kelunan, diaʹ ikem lepa ngelan ke ngkang gayeng ini, ketai ngkin pencai hem ina peging surat iaʹ ke badaʹ ngadan nte kaʹ Yerusalim. 4Buk ke tekep tekaʹ kimet le kuma akeʹ iaʹ ketai, tiga ne ida nai serengan akeʹ ʹo.
Sedep Paulus
5Un sepuʹo ke kenai te akeʹ palaʹ ikem buk keʹ ketai pelapa tanaʹ Makedunia, moʹ keʹ ketai pelapa tanaʹ Makedunia naʹkini ʹo. 6Kimet ceʹ ke ngelineʹ majan kediʹut de ngan ncem, masaʹ pe ngajan awang sengim ini ʹo. Uʹo ina ikem senteng pepo ngan nceʹ neng puyan pengaset ceʹ, mele kempi ketai heʹ masat laʹa ʹo. 7Kimet ceʹ, abeʹ keʹ ubaʹ ke menoʹ ikem nuat tuaʹ le, di lareʹ tebelum ngkeʹ ke ngelineʹ majan ngan ncem buk Tuhan dayo.
8Un sepuʹo ke ngelineʹ keʹ kaʹ lepoʹ Ipesus pa abeʹ neng Tau Pentakusta te. 9Moʹ lepa pesik makeʹ ca janan ke menco gayeng Tuhan, seleket ca pamen iaʹ bioʹ ngan nawa, naʹ pe un kadoʹ diaʹ nyakat kidi.
10Buk Timutius nai palaʹ ikem, tiga hem nyelama alaʹ ia, moʹ ia pegayeng me Tuhan koʹ baʹan akeʹ lete. 11Tuman ina ayen buhaʹ aheʹ kelunan muau neng ia. Un sepuʹo tekep kem pepo ngan ne, apan ne ke metuk pengasat te ngan saheʹ saheʹ tekaʹ, sulo ho nai uleʹ palaʹ akeʹ. Moʹ akeʹ ke pekena kenai ie pemung ngan diaʹ cenganak didai.
12Dau heʹ neng cenganak le Apulus, kudaʹ liwai pe akeʹ petangen ia tai menoʹ ikem, tai serengan cenganak diaʹ ca dina. Abeʹ e un tekaʹ a tekep kenai naʹkini, un sepuʹo kenai te ia tegoʹ un ca awang iaʹ tiga.
Kebayaʹ dau isiu
13Jagaʹ tiga tiga le, nekejeng salet dalem pengelan ncem. Lemuto makang ngan pali ne. 14Mele inu pemuyan ncem, ti ie mung dalem seʹ puyan pengemalaʹ.
15Ikem tisen Stipanus de telu pemanak, kumpin ban puyan nte ading ngelan Tuhan kaʹ tanaʹ Gerika are. Ida diaʹ nyuluk usa re tai pubo kelunan diaʹ anun Allah. 16Akeʹ nyat cem cenganak cenganak keʹ apan ncem tunuk ngan bayaʹ dau kelunan diaʹ pekina. Pekina lete tekep tekaʹ kem neng aheʹ diaʹ ca diaʹ pemung pegayeng ngan nte ke menco gayeng Tuhan.
17Bangen tekaʹ keʹ neng kenai tantaʹ Stipanus ngan Putunatus ngan Akikus. Seʹ de ban pesukung inu iaʹ tepa tahaʹ ikem. 18Ida pebioʹ saheʹ keʹ, kuaʹ baʹan nte lepa pebioʹ saheʹ kem are. Tekep lete ilu un bioʹ tapi neng kelunan kuaʹ dina are.
19Mung Mpun Tuhan diaʹ kaʹ tanaʹ Asia ngatu tiga saheʹ palaʹ ikem. Akila ngan Periskila, peging ngan Mpun iaʹ pempun dalem amin nte dina, ngatu bioʹ tekaʹ tiga saheʹ palaʹ ikem.
20Mung cenganak le kini ngatu tiga saheʹ palaʹ ikem.
Tiga hem selama le neng ikem semaheʹ apan, man puyan paʹoʹ ukoʹ baʹan iaʹ tekep diseʹ ilu diaʹ pecenganak are.
21Man ujoʹ keʹ tengen akeʹ nyurat ini: “Tiga saheʹ cen Paulus.”
22Aheʹ iaʹ abeʹ un malaʹ Tuhan, talan ne ia sihoʹ ukum iuten. Maranata – Ahaʹ Tuhan meʹ, nai ne!
23Pengelesau Tuhan Yesus un ngan ncem.
24Pengemalaʹ keʹ ke un ngan ncem mung kaʹ dalem Keristus Yesus.
Currently Selected:
1 KURINTUS 16: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
