Nahumu 3
3
1Ghutsoghaya ghumji ighukoma iwanu!
Ighumemile ughutsu na ipfinu pfa ukuboka iwanu,
ing'aghuleka ukughogha iwanu.
2Tegheletsa litsi lya ghumjeledi,
na ipfisindo pfa ghamagadi, na falasi iwopalula, na imituka ya ing'ondo itsumatsuma.
3Wadina falasi wopfamila,
lipanga lyomeletseka,
imigoha yopulika pulika.
Iwakomighwe ng'awopeteka baye,
na tsing'uli tsawo tsikala malundolundo mbaka iwanu wekwala mna itsing'uli atso.
4Aghano ghose gholawila kwaapfila Ninawi, itenda utsinzi,
ipinga iyanoghile iyali mhawi iyoutsa tsiisi kwa utsinzi wake,
na tsikolo tsa iwanu kwa uhawi wake.
5IMNDEWA yana tsingupfu tsose kolonga,
“Lola nene sili hamwe naghwe baye,
nitsokukudula ligaoni lyako mbaka lighubike ichihanga chako,
nitsowaleka iwanu wa tsiisi walole pfaukala chidako,
na tsifalume tsone pfaughela chinyala.
6Nitsokwasila inapwa na kukutenda ubetsighwe,
na nitsokutenda uwe chiloja kwa iwanu.
7Kuya awala iwotsokwona watsokutsuma aku wolonga,
‘Ghumji ghwa Ninawi ghuhinyighwa,
angu yuhi iyatsoghulilila?
Angu nitsompata kwani imunu wa kughukanza?’”
8Pfihi ghweghwe Ninawi kunogha kubita Tebesi ghumji ighutsengighwe hambalimbali ha ghumto Nili? Ghumji ghwa Tebesi tsaghutsungulukighwa na ghamatsi, ibahali tsaikala ngimitso yake, na ghamatsi tsaghakala ubanda wake. 9Isi ya Kushi na Misiri tsatsikala ngupfu tsake, pfipfila isi ya Puti na Libya tsatsiwapfila. 10Hata apfo tsaghusolighwa, iwanu wake tsawaghalighwa kutali. Pfipfila iwanaghe tsawahondighwahondighwa na kwikighwa mnanzila ng'ulu.
11Ninawi naghwe pfipfila kutsopatika kutsompfuka aduwi yako na kwitsepfisa. 12Tsingome tsako tsose tsitsakuwa ka tini tsikwandusa ukwipfa, tsing'ahighisighwa tsomlaghalila mna ghumlomo imunu iyakuja. 13Walole maasikali wako, wakala wogha ka wapinga, ghamalango gha isi yako ghamwatsi hachihanga ha iwabaya wako; ghumoto ghulakatsa ghendo ighamachuma gha ukuhindila ghamalango. 14Mdeghe ghamatsi na mwiyandae kwa ing'ondo, tsingome tsenu mtsitende tsiwe na ngupfu. Mpfulughe likando mkandike litanuli lya ukokela ghamatofali. 15Pfipfila ako ghumoto ghutsowalakatsa, lipanga litsowagana ghendo, litsowamalitsa ka wanzighe pfawakuja. Mwitende wongetseke ka wanzighe, mwongetseke ka lung'wawa!
16Iwachuutsi wako tsawongetseka kubita tsinondo, lekeni sambi wahupa ka pfawoghuluka wanzighe. 17Iwakulu wako wakala ka nzighe, maasikali wako wakala ka pfunge lya pfidanukila, chipindi cha chipfeghetsi wokala mna mitsani, lekeni litsuwa ling'alawila woghuluka, wala kuduhu iyomanya kwawaghendile.
18Ghweghwe mfalume wa Ashuru iwadimi wako wawasa, pfilongotsi wako wodongila, wapwililika kuna ipfidunda wala kuduhu wa kuweka hamwe. 19Kuduhu iyohonetsa ipfilonda pfako, ipfilonda pfako pfa ilifwa. Iwanu wose iwohulika mbuli tsako wodeng'elela. Mana yuhi yapfosile mna ghehile ghako?
Pioneer Bible Translators and The Word For The World
Learn More About Laghano Lya Sambi Kwe Iwanu Wose