Nahumu 2
2
Ukughwa kwa ghumji ghwa Ninawi
1Ghwe Ninawi aduwi iyobena pfihandepfihande kokutsila,
ubetetse tsingome na ukalitse tsinzila tsako,
wighangamitse na wiyongetse tsingupfu.
2Kwaapfila IMNDEWA katsowoyitsila watsukulu wa Yakobo utunitso wake,
ka utunitso wa iwanu wa Isiraeli,
mana iwapfamitsi tsawawapfamila na kuihinya imiputila ya iminzabibu yawo.
3Tsingao tsa maasikali wake ndung'u,
na iwanu iwadahile ukwitowa wapfala magwanda madung'u,
imituka yawo ya ing'ondo yomeletseka ka milambi ya ghumoto haweyandaa kwa ing'ondo,
nawo wohighisa imigoha yawo ya miyeletsi kwa ukuwatenda iwanu wapfuke.
4Imituka ya ing'ondo yotsuma tsuma mnzila mbaka hasi hodinila,
nayo yotsunguluka tsunguluka mna ipfibwalu,
yakwoneka ka pfiwenge pfa ghumoto!
Yotsumisa ka lumwesa.
5Kowakumbuka na kuwakema iwakulu wake,
nawo hawomghendela wekwala,
woghenda himahima kuna ubanda wa ghumji,
na baho wopfika ghumji ghutsingilighwa.
6Ngimitso tsa imito tsitulika,
na ing'anda ya mfalume ighwa.
7Ilaghitsighwa ghumji ghusolighwe,
na iwanu waghalighwe kuna isi ya utumwa,
na iwapinga watumwa wa ghumji,
wodomboketsa ka njiwa aku wetowatowa mna tsimambagha tsawo.
8Lekeni ghumji ghwa Ninawi kulawa ghumwande ghukala ka tsimbu lya ghamatsi,
ila sambi iwanu wake wotsuma chaka.
Iwanu wowakemelela, “Mwime! Mwime!”
Lekeni kuduhu iyohunduka kuchughu.
9Mboke tsifetsa! Mboke tsinzahabu!
Kwaapfila mna ihatsina yake mmema pfinu pfingi pfa bei ng'ulu.
10Ghumji ghwa Ninawi ghuhinyighwa,
ghubokighwa na ghulekighwa uchuwa!
Imimoyo ya iwanu itenyuka,
na ghamagoti ghetowa towa,
tsingupfu tsimala,
napfo ipfihanga pfose pfiyauka kwa ukupfuka!
11Lelo ilikwani imango ya isimba?
Na halikwani ihanu ahala hawaweng'ile ichijo iwana wawo,
hanu ahala hawang'ali wakwanga simba mmale na simba pinga,
na iwana wa simba hawangile bila ukupfuka chinu chochose?
12Isimba mmale yang'ali yowatsahulila iwanaghe inyama ya ukuwenela,
na kuwaghoghela mawingo mapinga tsake,
na kumemetsa ghamaunde gha inyama ighatsahulighwe mna tsimango tsake.
13Lelo IMNDEWA yana tsingupfu tsose kolonga, “Nene sili hamwe na ghweghwe baye, nitsoilakatsa imituka yako ya ing'ondo kwa ghumoto, na iwana wako wa isimba watsokomighwa kwa lipanga, wala muisi sitsowalekela mawingo baye, na litsi lya iwasenga wako ng'alitsohulikika keli baye.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose