Mika 3
3
Mika kowakembela pfilongotsi iwehile wa Isiraeli
1Kuya tsanonga, Tegheletseni mwemwe pfilongotsi wa iwatsukulu wa Yakobu, mwemwe iwatawala wa Isiraeli! Angu si mwemwe baye imbamighwa mhighe pfinoghile, 2lekeni mwemwe mwoghehila ighanoghile na mwonoghelwa na ighehile. Mowahuna ingotsi iwanu wangu na mwobandula inyama mna imipate yawo. 3Agho ghamtenda mwemwe, ka apfila mwakuja inyama ya iwanu wangu, mwowahuna ingotsi yawo, mwoibenabena imipate yawo na kuwakanakana ka inyama ikwikighwa mna ichiya yambikighwe. 4Kuya mtsomlilila IMNDEWA, lekeni yeye ng'atsowedika baye. Matsuwa agho katsochipfisa ichihanga chake kwaapfila mwemwe tsamtenda ighehile.
5IMNDEWA kowalonga apfino manabii iwowaghitsa iwanu wangu, Imunu yang'aweng'a chijo, wawo wokemelela womwidika, “Kutsokala mgima,” lekeni ka ng'aweng'ile chijo baye womghela wogha ka katsokomighwa. 6“Chilo chitsakwingila kuna mwemwe, na mwemwe ng'amtsakwona ghamaono baye, na chisi chitsakwingila, na mwemwe ng'amtsotabili baye, litsuwa litsowaswela manabii, na nemisi kutsakuwa chisi!” 7Iwanu iwakwona ghamaono watsoumbuka na awala iwotabili watsakona chinyala, wose watsoghubika ipfihanga pfawo kwaapfila Imulungu ng'atsowedika baye.
8Lekeni nene nimema ingupfu na iloho ya IMNDEWA, nomanya ighanoghile na ning'ighwa uwetso wa kuwalongela iwatsukulu wa Yakobo ka watotsa, na kuwalongela Waisiraeli ka watenda nzambi. 9Tegheletseni aghano mwemwe pfilongotsi wa iwatsukulu wa Yakobu, mwemwe iwatawala wa Isiraeli, mwemwe mwoghehila ighanoghile na mwoghatenda aghala ing'aghagholoke baye. 10Mwemwe mwoghutsenga ghumji ghwa Sayuni kwa kumwagha idamu, na ghumji ghwa Yerusalemu kwa ukutenda ighehile. 11Pfilongotsi wake wobokela hongo hawowahigha iwanu, watambika wake wolangulitsa ghamalaghitso kwa iwanu iwowaliha isendi, nawo manabii wotabili kwa iwanu awala iwoweng'a isendi. Wotenda apfo aku wolonga wawo wehuwila IMNDEWA, wolonga, “IMNDEWA kahamwe na twetwe, kuduhu chochose chihile chitsotulawila!”
12Kwa aghano ghamtendile mwemwe wapfilongotsi, ghumji ghwa Sayuni ghutsolimighwa ka mghunda, Yerusalemu ghutsomema pfilundo pfa tsing'anda itsimwaghike, na akula kuchidunda kwaili ing'anda ya Imulungu kutsakuwa bagho.
Pioneer Bible Translators and The Word For The World
Learn More About Laghano Lya Sambi Kwe Iwanu Wose