Mika 2
2
Pfinu pfihile pfitsowalawila iwehile
1Watsochona awala iwobama kutenda ghehile, awala iwowasa mna ghamasatsi ghawo aku wopfikitsa ukutenda ighehile, na hakukucha nemitondo wotenda pfipfo, kwaapfila wana ngupfu tsa ukutenda apfo. 2Awala iwobama imighunda na kuisola, wang'abama tsing'anda wotsisola na wowaboka iwanu tsimali tsawo.
3Lelo, IMNDEWA kolonga apfino, “Nobama kuwaghalila lijanga namwe ng'amtsodaha baye kulihepa. Ng'amtsoghenda baye kwa ukwighoda kwaapfila kutsakuwa chipindi cha ukughaya. 4Litsuwa alyo iwanu wotsowaseka na kuwabetsa kwa ukuwembila wila auno wa usungu,
‘Twetwe tumalitsighwa ghendo,
tsimali tsa iwanu wangu tsigholighwa,
kaniboka ghendo,
imighunda yetu kawagholela iwatughoghile.’ ”
5Apfo kutsakuwa kuduhu imunu iyatsodaha kuwagholela keli imighunda iwanu wa IMNDEWA kwa ukwasa tsisimbi.
6Iwanu wanyidika apfino, “Uleke kutulapfila unabii ka awo, uleke kulonga ka agho ghatsotulawila, twetwe ng'atutsopata chinyala baye.” 7Mwemwe watsukulu wa Yakobu hebali mlonga ipfinu ka apfo? Angu IMNDEWA kaleka ukududumila? Angu aghano si yeye baye iyatendile? Apfi ghamalonga ghangu ng'aghomwapfila baye imunu ayula iyotenda ighanoghile?
8Lekeni IMNDEWA kowalongela apfino, “Mwemwe mwowapfamila iwanu wangu kulonga wawo maaduwi. Mwowaboka tsinguwo tsawo iwanu awala iwopfosa bila kwalangula chinu, ka wanu iwakuya ahala ing'ondo haimala. 9Muwawinga iwapinga wa iwanu wangu kulawa mna tsing'anda tsawo tsinoghile, na muwebila iwana wawo pfinu pfinoghile pfanibamile kuweng'a pfiwe pfawo matsuwa ghose ing'aghohupa. 10Lelo mwinuke mke tsenu, kwaapfila ahano haduhu hanu hamtsokala muwe wagima, muitenda isi ihe kwa nzambi tsenu, apfo itsohinyighwa.
11“Ka munu mghutsu na iyobugha kowatsila na kuwalongela apfino, ‘Nene notabili ka mtsakunwa idipfai na imbwali nyingi.’ Imunu ayo kakuwa ghendo nabii iyotogholeka na iwanu awano!
12“Lekeni nitsowatinganitsa ghendo hamwe, mwemwe watsukulu wa Yakobo, nitsowoyitsa mkale hamwe, mwemwe Waisiraeli imkalile, nitsoweka mkale hamwe ka wang'olo mna ichibanda, ka wang'olo wengi kuna ghumghina, namwe mtsakongetseka na kuwa wanu wengi.”
13IMNDEWA katsowapfughulila inzila naye katsowalongolela, nawo watsobena lilango walawe kunze, imfalume katsolongola hambele yawo, IMNDEWA imwenyegho yuyo iyatsowalongolela.
Pioneer Bible Translators and The Word For The World
Learn More About Laghano Lya Sambi Kwe Iwanu Wose