Mika 4
4
Imulungu katsowatawala ghoya iwanu
1Mna ghamatsuwa ighakutsa,
ichidunda ichitsengighwe ing'anda ya IMNDEWA chitsakuwa chikulu kubita pfidunda pfose,
chitsakwinulighwa chiwe kuchanya mwa pfidunda pfose.
Na iwanu wengi watsoghenda ako.
2Na wanu wengi kulawa isi tsingi watsakutsa,
nawo watselongela apfino, “Tukeni kuchanya kuna ichidunda cha IMNDEWA,
kwaili ing'anda ya IMNDEWA wa Yakobo.
Ako IMNDEWA katsotulangulitsa nzila tsake,
na twetwe tutsotsiwinza nzila tsake,
kwaapfila Sayuni hatsakuwa hanu kwa iwanu kufundighwa ghamalaghitso na Yerusalemu, hatsakuwa hanu ha kutegheletsa imbuli inoghile ya IMNDEWA.”
3Imulungu katsoghombeletsa ghamaghomba gha iwanu wengi,
katsolamlitsa ghamaghomba gha iwanu iwolawa mna tsiisi ng'ulu na itsili kutali.
Nawo watsohonda ghamapanga ghawo ghawe maghembe gha kulimila,
na watsohonda imigoha yawo iwe sengo tsa kuganila maputila.
Iwanu wa isi imwe ng'awetsetowa baye na iwanu wa isi ingi,
nawo ng'awotsowafunda keli baye iwanu wawo ukwitowa ng'ondo.
4Chila munu katsokala tseghamba hasi ha mnzabibu ghwake na hasi ha mtini ghwake,
na kutsakuwa kuduhu munu iyatsowatenda wapfuke,
kwaapfila IMNDEWA yana tsingupfu tsose kalonga.
5Iwanu wa isi tsingi wowinza imilungu yawo, lekeni twetwe twomuwinza IMNDEWA Imulungu wetu matsuwa ghose.
Waisiraeli watsakuya kulawa kuna utumwa
6IMNDEWA kolonga, “Mna litsuwa alyo nitsoweka hamwe ipfimbete wose, na nitsowatingatsa awala iwawingighwe kutali na awala yaniwatendile waghaye. 7Ipfimbete wala iwalekighwe wagima na iwanu wala iwawingighwe kutali, awo watsakuwa wanu wa isi ina ngupfu. Na nene IMNDEWA nitsowatawala ako kuna chidunda cha Sayuni, kulawa sambi mbaka matsuwa ghose.”
8Ghweghwe chidunda cha Yerusalemu kweghala na ghumnala ghwayakwima imdimi yalolese wang'olo wake, ghweghe kwa ngome kwa iwanu iwokala Sayuni, ukulu wako wa ghuwande utsokuyila, Yerusalemu ghutsakuwa na mfalume iyotawala. 9Lelo ebali mwakwangula chililo? Pfii mwahela mfalume? Pfihi mlamlitsi wenu kafa, mwolila kwa usungu ka mai iyakweleka. 10Mwemwe iwanu wa siyoni, mwibulughitse hasi na mlile ka pinga iyakweleka! Kwaapfila sambi mtsakuka mna ghumji ghuno, mwoghenda kukala kuna imighunda, mtsoghenda Babuloni. Lekeni ako mtsokombolighwa: Na kuko IMNDEWA katsowakombola kulawa kuna maaduwi wenu. 11Iwanu wa isi tsingi wetingana hamwe wawatowe. pfawolonga, “Leka tughunange ghumji' ghwawo, na twetwe twone apfila pfaghubomolighwa!” 12Lekeni wawo ng'awomanya baye chayopfikitsa IMNDEWA wala chayobama kutenda, yeye kaweka hamwe ka mibangu hanu ha ukubetela.
13IMNDEWA kolonga, “Mwemwe wanu wa Sayuni, mwinuke mkawatowe maaduwi tsenu! Nitsoweng'eni tsimembe tsa chuma na kwato tsa shaba. Mtsowahonda iwanu wengi, ghamtsopata mtsonilapfila nene, mali tsawo mtsonilapfila nene IMNDEWA wa isi yose.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose