Hoseya 8
8
Ghamatotso gha Waisiraeli
1IMNDEWA kolonga, Mtowe imalati! Aduwi kakutsa ka magengele yaipfamile ing'anda ya IMNDEWA, kwaapfila iwanu walema kulikinda lilaghano lyangu na ghamalaghitso ghangu. 2Nawo Waisiraeli watsonilila aku walonga, “Ghwe Imulungu wetu, twetwe twokumanya.” 3Lekeni Waisiraeli walema aghala ighanoghile, apfo maaduwi tsawo watsowakoleletsa.
4“Wawasaghula wafalume bila kunighutsa nene, wawasaghula pfilongotsi bila kunongela nene, wasola ifetsa na nzahabu watendela ipfinyagho, ipfitsowatenda wakomighwe ghendo. 5Mwemwe wanu wa Samaria, nochihila ichinyagho chenu cha imwana wa ing'ombe, nene nowonela maya ng'ani. Mtsoghendelela ukukala na nzambi mbaka tsuwachi? 6Kwaapfila ichinu acho chilawila ahano Isiraeli, imunu katenngenetsa chinyagho, nacho ng'achidaha kuwa mlungu baye, ona ghendo. Na ichinyagho cha imwana wa ng'ombe cha Samaria chitsobenighwa pfihande pfihande! 7Kwaapfila wawo wohanda libeho, na watsopfuna inyahemu! Imimeya yawo ili kumghunda itsoswapa wala ng'aitsolapfa mapfuno baye. Na hata ka itsolapfa mapfuno ghatsakujighwa na wagheni. 8Waisiraeli wasolighwa, lelo wamghati mwa iwanu wa isi tsingi, nawo wawa si chinu ghendo baye. 9Kwaapfila wagheluka waghenda Ashuru ka chihongwe wa kubagho iyakwanga yaliyeka. Efuremu keghala na pinga chiweghe iyohonga iwamale. 10Hata ka weutsa iwenyegho kuna iwanu wa isi tsingi, lekeni nene nitsowatinganitsa hamwe. Nawo watsakwanza kuwa chidogho na kuwa nyondenyonde ahala hawatsodununzighwa na mfalume yana tsingupfu wa Ashuru.
11“Iwanu wa Efuremu watsenga tsimatsabahu nyingi tsa ukuleghusa tsinzambi, lekeni tsimatsabahu atso tsiwa hanu ha ukwongetsela ukutenda tsinzambi. 12Hata ka niwandikila malaghitso ghangu mala nyingi, wawo woghona ka chinu chigheni. 13Wawo wolapfa tsinambiko tsa wanyama na ukutsija, lekeni nene IMNDEWA siwatoghola baye. Nene nitsoghakumbuka ighehile ghawo na nitsowahigha kwa tsinzambi tsawo, nawo watsakuya Misiri.
14“Waisiraeli wamsemwa iyawaumbile, na watsenga mang'anda gha chifalume. Iwanu wa Yuda wongetsa ukutsenga miji ina tsingome, lekeni nene nitsoghala ghumoto ghulakatse imiji yawo na tsingome tsawo.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose