Hoseya 9
9
Hosea kolonga Isiraeli pfaitsotowighwa
1Mwemwe Waisiraeli mleke kudeng'elela ka pfawodeng'elela iwanu wa isi tsingi, kwaapfila mumlema Imulungu wenu, kwaapfila mghala ipfinu kwa milungu ingi chila hanu ha ukubetela ipfijo ka iwanu pfawowahonga wamapinga. 2Lekeni hanu ha ukubetela ipfijo, na hanu ha ukukamlila idipfai ng'ahatsomwing'ani chijo wala dipfai, na idipfai ya sambi itsohunguka. 3Ng'awatsokala kuna isi ya IMNDEWA baye, lekeni iwanu wa Efuremu watsakuya Misiri, na watsakuja ichijo chihile ako Ashuru. 4Kuko ng'awotsomlapfila IMNDEWA tsinambiko tsa dipfai, wala tsinambiko tsawo ng'atsitsomnoghela baye. Tsinambiko tsawo tsitsakuwa ka chijo cha ukudomboketsa, wose iwatsakuja chitsowatenda wehe. Na ichijo acho chitsakuwa cha ukuja wawo wenyegho, na si cha kughala kuna ing'anda ya IMNDEWA baye. 5Mtsotenda choni mna litsuwa lya ichihungo chenu ichisaghulighwe, na mna litsuwa lya ichihungo cha IMNDEWA? 6Hata mng'atsuma mleke kukomighwa, mwemwe mtsoghoghighwa mna isi ya Misiri, mtsakufa na mtsotsikighwa Memfisi ghumji mkulu ghwa Misiri. Imisinde itsokula na kughubika ipfinu pfenu pfa fetsa, na imihonga itsakota mna ghamahema ghenu.
7Ichipindi cha ukutowighwa chipfika, ichipindi cha ukulihighwa chipfika. Waisiraeli wobamighwa wamanye aghano! Nabii kakoneka mbotsi kwaapfila tsinzambi tsenu nyingi ng'ani, na ighehile ghenu makulu ng'ani. 8Nabii na Imulungu wose wowakalitsa Waefremu, lekeni nabii kokose kwayoghenda womtegha ka chideghe. Hata mng'anda mwa Imulungu wake womwihila. 9Wawo wabitilitsa mna ukutenda ighehile ka pfaikalile akula Gibea. Imulungu katsoghakumbuka matotso ghawo, naye katsowahigha kwa tsinzambi tsawo.
Nzambi ya Isiraeli pfaitsowatenda waghaye
10Nene hanyanzile kuwona Waisiraeli, tsaiwa ka mbona ghamatunda gha minzabibu kunyika. Na iwahenga wenu niwona wanogha ka tunda tsa tini tsa mwanduso. Lekeni waghenda ako Baali Peori, welapfa iwenyegho wachitambikile ichinyagho cha mulungu Baali, nawo wawa chinu ichidesa ka ichinyagho achila chawakundile. 11Ukulu wa Efuremu utsoghuluka uke ka chideghe, ng'akutsakuwa na ukweleka wana baye, wala kuduhu pinga iyatsokala na inda, wala iyatsokinda inda! 12Hata ka wang'alela iwana wawo nene nitsowakoma, na kuduhu hata yumwe iyatsokala mgima. Hanitsowaleka mbuke watsochona!
13Niyona Efuremu ka apfila ghumji ghwa Tiro, ghuhandighwa hana likonde, lekeni lelo Efuremu katsoghala iwanaghe kwa imunu iyokoma. 14Ghwe IMNDEWA, angu utsoweng'a choni? Ghwe IMNDEWA! Uwatende wapinga wawo waleke kweleka iwana, na ughatende ghamatombo ghawo ghaleke kong'esa
Imulungu kowahigha Waisiraeli
15MNDEWA kolonga, “Nene tsanyanza ghendo kuwehila kulawa kuko Giligali kwawanzile ukutenda ghehile ghao, kwaapfila wawo watenda ghehile, nene nitsowawinga woke mna ing'anda yangu, sitsowakunda keli baye, na pfilongotsi wawo wose wanilema. 16Iwanu wa Efuremu watowighwa, wawa ka mbiki ghuna imitsitsi inyalile, ng'awatsakweleka wana baye. Na hata ka watsakweleka wana, nene nitsowakoma iwana wawo iwowakunda.”
Nabii kolonga isi ya Isiraeli pfaitsakuwa
17Mulungu katsowalema kwaapfila walema kumtegheletsa, nawo watsotangatanga mna tsiisi tsingi.
Pioneer Bible Translators and The Word For The World
Learn More About Laghano Lya Sambi Kwe Iwanu Wose