Hoseya 7
7
1“Chila hanibama kuwahonetsa Waisiraeli, tsinzambi tsa Efuremu tsoghubulighwa, pfipfila ighehile ighotendeka na iwanu wa Samaria ghakoneka mwatsi, kwaapfila ako iwanu weghutsukila, iwahitsi wobomola tsing'anda webe ipfinu, na iwabapfi woboka iwanu mnzila kwa ng'uwi. 2Wala ng'awofikitsa baye mna imimoyo yawo ka nene noghakumbuka ghehile ghawo ghose. Na aghala ghawatendile ghawatsingila, na nene noghona hambele hangu.
Iwanu wotenda ghehile mna Ing'anda ya mfalume
3“Wawo womdeng'elesa mfalume kwa ighehile ghawotenda na wowadeng'elesa pfilongotsi wawo kwa ukulonga ughutsu. 4Awo wose watsinzi, weghala na litanuli lililima ghumoto, ghumoto ing'aghubama imunu iyakoka ipfighate yaghukwitse kulawa ahala hayokanda usaghe mbaka hauhumka. 5Mna ichihungo cha mfalume wetu, iwakulu wetu wapatika idipfai, mfalume na wapfilongotsi wetu welunga na iwanu wangi watende pfinu pfa utalatsi. 6Kwaapfila waitenda imimoyo iwe ka tanuli ahala hawowapfisila iwanu, chilo chigima wawo woghudubuka, na nemitondo imaya yawo yakwaka ka milambi ya ghumoto.
7“Wose wana usongo wa ukukoma iukwaka ka moto ghwa litanulu, wowakoma pfilongotsi wawo, iwafalume wawo wose waghwa, wala kuduhu iyonilomba nene nimwapfile.”
Isiraeli na isi tsingi
8IMNDEWA kolonga, “Iwanu wa Efuremu wehanganya na iwanu wa isi tsingi. Wawo pfawali ka ichighate chipfile ubali umwe 9Wanu wagheni watsifonza tsingupfu tsake, lekeni yeye imwenyegho ng'omanya baye, na tsimvi tsoneka tsenela mna litwi lyake, lekeni yeye ng'otanga baye. 10Ichidandali cha Waisiraeli chakoneka mwatsi mwatsi, lekeni wawo ng'awomuyila baye IMNDEWA, Imulungu wawo, wala ng'awombama baye. 11Iwanu wa Efuremu weghala na injiwa mbotsi na iyalihela tsimbutsi, mala kokema Misiri, mala koghuluka koghenda Ashuru yakalombe yapfilighwe. 12Hawatsoghenda nitsotandatsa wapfu wangu niwonze, nitsowahulumsa hasi ka pfideghe wa kulanga, na nitsowatowa kwa ukulola aghala ighehile ghawatendile.
13“Watsochona kwaapfila wanileka nene, wakomighwe kwaapfila wandema! Nibama niwakombole lekeni wawo wonilonga mbuli tsa ughutsu. 14Wonililila lekeni si kulawa mna imimoyo yawo baye, ila wawo wodomboketsa mna ghamasatsi ghawo, wonilomba niweng'e ichijo na idipfai, ila wawo wonileka nene. 15Hata ka nene yuyo yaniwalangulitse na kuwaghuma ngupfu, lekeni wawo wobama kunitendela ghehile. 16Wawo ng'awomuyila baye yeye iyali kuchanya ng'ani, weghala na minde ileghele, pfilongotsi wawo watsokomighwa na lipanga, kwaapfila wawo wolonga kwa chidandali, apfo chinu achino chitsowatenda wasekighwe mna isi ya Misiri.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose