Hoseya 6
6
Iwanu woleka tsinzambi
1Nawo Waisiraeli watsolonga, “Mtse tumuyile IMNDEWA! Yeye imwenyegho katutsahulatsahula lekeni katsotuhonetsa, yeye imwenyegho katulagha lekeni katsotuhonetsa ipfilonda pfetu. 2Haghatsobita matsuwa meli yeye katsotwing'a keli ugima, na mna litsuwa lya kadatu katsotwinula tukale hamwe naye. 3Lelo tummanye IMNDEWA na tughendelele kummanya yeye, ka apfila litsuwa pfalilawa nemitondo pfipfo naye katsotulawila ghendo, katsotutsila ka mvula ya ukuhandila itowa muisi.”
4Lekeni IMNDEWA kolonga, “Mwemwe Waefuremu, angu nene nitende choni kuna mwemwe? Mwemwe wanu wa Yuda angu nene nitende choni kuna mwemwe? Kwaapfila mwemwe mwonikunda ka apfila ing'ungu ya nemitondo, na ka litungwe ilisumka ukunyala. 5Apfo ning'ali niwatuma manabii wangu watse wawalongele ka nene ning'awaganileganile, na kuwalongela ka nene nitsowakoma, na ukuhigha kwangu kutsowatsila ka lumwesa. 6Kwaapfila nene chanibama mwemwe mnikunde, wala nene sibama tsinambiko tsenu baye, na ukunimanya nene Imulungu chinu chikulu kubita ukunilapfila tsinambiko tsa ukulakatsighwa.
7“Lekeni wawo waleka kulikinda lilaghano ka Adamu, kuko wawa wanu si wa ukutogholeka baye. 8Ghumji ghwa Gileadi ghumema iwanu iwotenda ghehile na iwokoma iwanu. 9Ka makingili gha iwahitsi pfawompfisila imunu mnzila, pfipfo ghamakingili gha iwatambika pfawokoma iwanu mna inzila ighenda Shekemu, kuko wotenda ighehile ng'ani. 10Nene mbona chinu chihile ichidesa ng'ani kwa Waisiraeli, iwanu wa Efuremu wotambikila milungu ingi, na Isiraeli itendighwa iha.
11“Namwe muwanu wa Yuda nomwikilani matsuwa gha ukuwatowa kwa aghala ighehile ghamtendile hata ka tsanibama ukuwatenda iwanu wangu wabwede keli.
Pioneer Bible Translators and The Word For The World
Learn More About Laghano Lya Sambi Kwe Iwanu Wose