Hoseya 5
5
1“Tegheletseni aghano mwemwe watambika! Hulikitseni mwemwe Waisiraeli! Muwambe ghamaghutwi mtegheletse mwemwe iwanu wa ikaye ya mfalume! Kwaapfila ukuhighighwa akuno kuwatsilani mwemwe, mwemwe tsamkala mtegho ako Misipa, na ilwapfu lwa ukuwonza iwanu ako Tabori. 2Iwanu wandema nene na wawakoma wanu wengi, lelo nene nitsowahigha wose. 3Nene nowamanya iwanu wa Isiraeli na kuduhu chinu ichipfisike chawotenda nene nileke kuchona. Sambi Waisiraeli muwa watsinzi na mwitenda muwenyegho mwihe.”
Hosea kokanya iwanu waleke utsinzi
4Ghawotenda ghowaghoma waleke kumuyila Imulungu wawo. Iloho ya ukutenda utsinzi yamna mimoyo yawo, nawo ng'awommanya IMNDEWA baye. 5Ichidandali cha Waisiraeli chakoneka mwatsi mwatsi, apfo iwanu wa Isiraeli na Efuremu watsekwala kwa kutenda tsinzambi tsawo, pfipfila iwanu wa Yuda nawo watsekwala hamwe nawo. 6Hawatsoghenda na ghamakingili ghawo gha wang'ombe na wang'olo ili wambame IMNDEWA ng'awatsomwona baye, kwaapfila yeye kebaghula nawo. 7Wamlema IMNDEWA, na weleka iwana wa kunze, apfo hawodeng'elela ichihungo chawo cha mlao ghwa ghumwetsi, IMNDEWA katsowakoma na ukuhinya imighunda yawo.
Ing'ondo ya Yuda na Waisiraeli
8Mtowe imalati ako Gibea, na mtowe italumbeta ako Rama. Mkeme lukemo lwa ing'ondo ako Beti Aveni, mwemwe wanu wa Benyamini aduwi tsenu wowatsila! 9Litsuwa lya ukuhigha lyakutsa, na isi ya Efuremu itsohinyika iwe uchuwa! Na chanitangatsa mna ghamakabila gha Isiraeli chitsolawila ghendo.
10Pfilongotsi wa Yuda weghala na iwanu iwosoghetsa ghamabwe mna tsimbaka ili weyongetsele, lelo nene nitsowamwaghila maya yangu ka matsi na nitsowakoma. 11Iwanu wa Efuremu waghanzika ng'ani, wahondighwa ahala hawahighighwe, kwaapfila wawo wasaghula ukutambikila ipfinyagho. 12Apfo nene nitsakuwa ka nyenze iwakuja tsinguwo kwa iwanu wa Efuremu, na nitsakuwa wang'onyo iwotenda imibiki yole kwa iwanu wa Yuda.
13“Iwanu wa Efuremu hawatangile ughonzwa wawo na iwanu wa Yuda hawamanyile ichilonda chawo, baho Waefuremu waghenda Ashuru kwa mfalume Yarebu kumlomba yawapfile, lekeni yeye ngodaha baye ukuwahonetsa utamu wenu, wala ukuwahonetsa ichilonda chenu. 14Kwaapfila nene nitsakuwa mkali ka simba kwa iwanu wa Efuremu na ka mwana wa simba kwa iwanu wa Yuda. Nitsowatsahulatsahula kuya nitsakuka, nitsowaghala kutali na kuduhu munu iyatsowakombola.
15“Kuya nitsakuka na kuya hanu hangu mbaka watoghole tsinzambi tsawo na wambuyile nene. Hawatsoghaya ng'ani baho watseyunda ukunibama nene.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose