Hoseya 4
4
IMNDEWA kowalonga Waisiraeli
1Mwemwe Waisiraeli mhulike chayolonga IMNDEWA, kwaapfila IMNDEWA kana ghomba alino na mwemwe imkala muisi amno. Yeye kolonga, “Kuduhu munu iyotogholeka, wala iyana uluso, wala iyommanya Imulungu mna isi aino, 2iwanu wolighita, woghutsuka, na wokoma, wakwiba, na wotenda utsinzi na wobitililitsa ukutenda ghehile, na wokoma iwanu chila hakukucha. 3Apfo kwa aghano ghawotenda isi yose itsosakala, na iwanu wose iwokala amwo watsakuwa nyondenyonde, iwanyama wa kubagho na wapfideghe wa kulanga, na wasomba iwali mna ibahali wose watsakufa.”
IMNDEWA kowalighita iwatambika
4IMNDEWA kolonga, “Lekeni imunu wowose yaleke kumwing'a ghomba, wala kumkembela miyaghe, ila nene nina ghomba na iwatambika. 5Ghweghwe kwitsekwala nemisi, na nabii katsekwala nechilo hamwe na ghweghwe, na nitsomkoma mai wako. 6Iwanu wangu wokomighwa kwaapfila ng'awomanya chinu baye, ghweghwe kulema ukumanya, na nene nitsokulema ghweghwe uleke kuwa mtambika wangu. Kwaapfila kughasemwa malaghitso gha Imulungu wako, na nene pfipfila nitsowasemwa iwanagho.
7“Apfila iwatambika pfawongetseke, pfipfo pfawongetse ukunitendela tsinzambi. Apfo ukulu iwali nawo nitsoughalusa uwe chinyala. 8Weghuta kwa ukuja tsinambiko tsa inzambi tsawolapfa iwanu wangu, apfo wodeng'elela hawowona iwanu wotenda ighehile. 9Iwatambika watsakuwa na nzambi ka iwanu pfawali na tsinzambi, apfo nitsowahigha iwatambika kwa ighehile ghawo ghawatendile, na nitsowaliha kwa aghala ghehile ghawatendile. 10Watsakuja lekeni ng'awetseghuta baye, watsotenda unzinzi lekeni ng'awotsopata iwana baye kwaapfila wanilema nene IMNDEWA.”
IMNDEWA kowalighita iwotambikila imilungu
11IMNDEWA kolonga, “Ukutenda utsinzi, idipfai ya ghumwande na ya sambi pfose pfotenda iwanu waleke kuwa na tsimbutsi. 12Iwanu wangu wolaghula kuna ipfinyagho pfa imibiki, na ing'weku ya ghumbiki yawalongela choni cha ukutenda, kwaapfila iloho ya utsinzi iwaghisa, nawo watenda utsinzi na wanileka nene Imulungu wawo.” 13Wawo wolapfa tsinambiko mchidanando mwa ipfidunda, na wodusula upfumba mchanya mwa ipfighongo, hasi ha imibiki ya mialoni, imighude na imikwaju kwaapfila ichimbeho cha imibiki ayo chinogha. Apfo iwana wenu iwali wotenda ughoni na iwapinga iwokwelighwa wowasa na iwamale wangi. 14Lekeni sitsowatowa iwana wenu iwali ahala hawotenda ughoni, wala iwapinga wenu iwokwelighwa hawowasa na iwamale wengi, kwaapfila iwamale wenyegho iwobaghuka hambalimbali na kuwasa na mapinga pfiweghe, kuya wolapfa tsinambiko hamwe wapinga watsinzi mna tsing'anda tsa ukutambikila milungu ingi. Apfo iwanu awano iwalihela tsimbutsi watsokomighwa ghendo.
15Hata ka mwemwe Waisiraeli mwotenda ughoni, lekeni mleke kuwatenda iwanu wa Yuda nawo watotse! Mleke kughenda ako Giligali, wala mleke kugheluka kughenda Beti Aveni, wala mleke ukwilaha kwa ukulonga, “Ka apfila IMNDEWA pfayokala mgima!” 16Kwaapfila Waisiraeli wasughu ka pfayali ing'ombe msughu, lelo IMNDEWA yodahatse kuwadima ka ng'olo hana mghunda ghuna ghumgina? 17Lelo iwanu wa Efuremu wasaghula kutambikila ipfinyagho, apfo walekeni pfipfo. 18Hata wang'amalitsa ukunwa imbwali, wawo woghendelela ukutenda utsinzi, na iwakulu wawo wokunda ipfinu ipfighela chinyala. 19Apfo chipfulapfumbi chitsowaghulusa kutali na tsinambiko tsawo tsitsowaghalila chinyala.
Pioneer Bible Translators and The Word For The World
Learn More About Laghano Lya Sambi Kwe Iwanu Wose