Hoseya 3
3
Hosea na pinga chiweghe
1Kuya IMNDEWA kanilongela, “Ghenda ukalanguse komkunda keli ipinga wako iyali mtsinzi, hata ka immale yungi komkunda, umkunde ka nene pfaniwakunda Waisiraeli hata ka wawo woitambikila milungu ingi, na wokunda ipfighate ipfilimta pfa nzabibu inyalile.” 2Apfo nimlihila imali ipinga ayo kwa kulapfa pfihande kumi na tano pfa fetsa na maghunila miya imwe na hamsini gha shayili. 3Kuya nimlongela, “Kutsokala matsuwa mengi aku konibeta nene, na uleke kutenda utzinzi, wala uleke kuwa na mmale yungi, na nene nitsokala pfipfo kwaajili yako.” 4Kwaapfila Waisiraeli watsokala kwa matsuwa mengi bila kuwa na mfalume wala chilongotsi, wala ukulapfa nambiko, wala kuwa na ngutso, wala kuwa na chitsibao cha mmambagha, wala kuwa na chinyagho. 5Lekeni hambele Waisiraeli watsakuya watsombama IMNDEWA Imulungu, na mfalume wawo Daudi. Na mna ghamatsuwa gha ukutsigha watsakutsa kwa IMNDEWA aku wodedema, na kulolela yawatendele ighanoghile.
Pioneer Bible Translators and The Word For The World
Learn More About Laghano Lya Sambi Kwe Iwanu Wose