Hoseya 2
2
1Apfo mna litsuwa alyo mtsowakema ndughu tsenu wamale Ami, kwaapfila Imulungu kolonga, “Mwemwe mwa wanu wangu,” na ndughu tsenu iwapinga mtsowakema Ruhama kwaapfila Imulungu kolonga, “Mwemwe mwonelighwa libatsi.”
Isi ya Isiraeli yohighighwa
2Mmanileni mai wenu, mmanileni, kwaapfila yeye si pinga wangu baye, wala nene sili mmale wake baye. Mmanileni yaleke ughoni wake na utsinzi wake, 3hela nene nitsomtsula tsinguwo yawe chidako, na nitsomtenda yakale ka pfayoneke. Nitsomtenda yawe ka nyika, nitsomtenda yawe ka isi isakale ilihela ghamatsi, na nitsomkoma kwa ing'ilu ya ghamatsi. 4Na iwanaghe sitsowonela libatsi baye, kwaapfila wawo wa wana wa utsinzi. 5Mai wawo mtsinzi, kaweleka kwa kuwasa na wamale wangi, apfo kaghela chinyala ng'ani, kwaapfila kelongela imwenyegho, “Nitsoghenda kwa iwamale wangu iwongaya ichijo na ghamatsi, isufu, na tsinguwo tsa chitani, ghamapfuta na idipfai.”
6Apfo nitsoidiwa inzila yake kwa ukwika imihonga, nitsomtsungulusila ubanda ili yaleke kuyona inzila. 7Katsowawinzilitsa iwamale wake lekeni ng'atsowapata baye, katsowabama lekeni ng'atsowona baye. Baho katsolonga, “Leka mbuye kwa immale wangu iyanikwelile, kwaapfila ng'apfu pfanikalile mwanduso kubita sambi.”
8Kwaapfila tsang'amanyile baye ka nene yuyo iyanimwing'ile ingano, idipfai ya sambi na ghamapfuta, iyanimwing'ile tsifetsa nyingi, na tsinzahabu, atsila tsayatumile kumtambikila mulungu Baali. 9Apfo ghamatsuwa gha ukupfuna ghang'apfika nitsosola ingano yangu na idipfai yangu, nitsomboka isufu yangu, na inguwo yangu ya chitani iyapfalile mlukuli mwake. 10Nitsomtsula aku iwamale wake wolola, wala kuduhu munu iyatsomswekula mna ghamoko ghangu. 11Nitsowaghoma waleke ukudeng'elela, ipfihungo ipfitendeka mna ghumwaka, ipfihungo pfa mlao ghwa ghumwetsi, tsisabato tsake na ipfihungo pfose ipfikighwe na Imulungu. 12Nitsoihinya imighunda yake ya iminzabibu na imibiki ya mitini, iyolonga keng'ighwa na iwamale wake, nitsoitenda iwe mihulo, na iwanyama wa kubagho watsoija. 13Nitsomuhigha kwa matsuwa ghake ghose ghayaitambikile na kuidusulila upfumba milungu Baali, na hayang'ali yehamba kwa ukupfala tsipete, pfipuli na tsiheleni tsa bei ng'ulu yaghende kwa iwamale wake, lekeni nene kanisemwa ghendo. Nene IMNDEWA iyanilonga apfo.
IMNDEWA kowakunda iwanu wake
14Apfo nitsomnyenganyenga nimsole nimghale kunyika, na kuko nitsolonga naye lughalugha. 15Kuko nitsomuyitsila imighunda yake ya minzabibu, na ilwanda lwa Akori hanu hamanyike ka hanu ha maghayo nitsohatenda hawe hanu hake ha ukulolela ighanoghile. Ako katsonihulikitsa ka pfayanihulikitse hayakalile mwali, na ka mna litsuwa lyayalawile kuna isi ya Misiri. 16Mna litsuwa alyo, IMNDEWA kolonga, kutsonikema mmale wangu, wala ng'utsonikema keli Baali wangu baye. 17Kwaapfila nitsolitenda litaghwa lya Baali lileke kulongeka keli mna imilomo yake, wala ghamataghwa gha milungu Baali ng'atsokumbukighwa keli baye. 18Mna litsuwa alyo nitsakwika laghano na iwanyama wa kubagho, wapfideghe wa kulanga, na iwapfilumbe iwotambala mwidongo ili waleke kuwalagha. Nitsohinya tsiminde, lipanga, na tsisilaha tsa ing'ondo itsili muisi na nitsowatenda iwanu wangu wakale tseghamba. 19Nitsokukwela uwe pinga wangu matsuwa ghose ing'aghohupa, nitsokutendela ighanoghile na aghala ighobamighwa, na nitsokutendela uluso na nitsokwonela libatsi. 20Nitsokukwela ka pfaibamighwa, naghwe kutsomanya ka nene yuyo IMNDEWA. 21Mna litsuwa alyo nene IMNDEWA nitsakwidika ghawolomba iwanu wa Isiraeli, na nitsakwika libingu mlanga, na libingu alyo litsoghala imvula muisi. 22Nayo isi itsomela ingano, idipfai na ghamapfuta napfo pfitsowenela iwanu wose wa ilwanda lwa Yezireeli. 23Nene nitsoweka iwanu wangu wakale muisi,
kuya nitsomwonela libatsi ayula iyakemighwe “Loruhama,”
na iwakemighwe Loami, “Si wanu wangu baye,”
nitsowakema, “Mwemwe mwa wanu wangu,”
nawo watsolonga, “Ghweghwe kwa Mulungu wangu.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose