Hoseya 13
13
Waisiraeli womalitsa ukuhighighwa
1Iwanu wa likabila lya Efuremu hawalongile, iwanu waghudema kwa ukupfuka, kwaapfila likabila alyo tsalikala kulu mna isi ya Isiraeli, lekeni iwanu wa likabila alyo tsawapetighwa wafa hawamtambikile mulungu Baali. 2Lelo Waefuremu woghendelela ukutenda nzambi, na wetengenetsela iwenyegho ipfinyagho pfa ukulubula, kwa ufundi wawo wotengenetsa pfinyagho pfa ifetsa, atso tsose sang'ano tsa mafundi, na yolongighwa apfino, “Wolapfa tsinambiko tsa iwanu na wononola ipfinyagho pfa imwana wa ing'ombe.” 3Apfo iwanu awano watsohupa ka likungughu lya nemitondo, na ka litungwe lya nemitondo ilisumka ukunyala, na ka imiyewetsa ighulusighwa hanu ha ukubetela, na ka yosi ililawa mna lidilisha.
4Lekeni nene yuyo IMNDEWA, Imulungu wenu tangiya mwemwe hamkalile mna isi ya Misiri, mwemwe mleke ukumanya milungu ingi, ila nene niliyeka, wala kuduhu iyodaha kuwakombolani ila nene. 5Nene yuyo iyaniwatunzile ghoya hamkalile ako kunyika, kuna isi isoma na inyalile. 6Lekeni hawajile na ukwighuta, imimoyo yawo iwa na ichidandali apfo wanisemwa nene. 7Lelo niwa ka simba kuna wawo, na nitsowapfitsiya mnzila ka chui. 8Nitsowatsila ka dubu iyabokighwe iwanaghe. Nitsowatsahulatsahula tsimambagha tsenu na kuko nitsowaja ka simba, na mnyama wa kubagho katsowatsahula pfihandepfihande, 9na katsowahinya mwemwe Waisiraeli kwaapfila mwemwe mnibiduka nene yaniwapfila. 10Lelo yalikwani mfalume wenu, yadahe kuwakombola mna imiji yenu yose? Na walikwani pfilongotsi wenu awala wamlongile, Twing'e mfalume na pfilongotsi watutawale? 11Nene hanighudubuke nimwing'ani mfalume, na hambonile maya nimlapfa.
12“Litotso lya Efuremu lyandikighwa, na inzambi yake ng'aisemwighwa baye. 13Usungu wa ipinga iyakweleka utsomtsila, yeye ka mwana mdodo iyalihela tsimbutsi, kwaapfila hayobamighwa yoneke yeye kolema ukulawa muinda mwa mai wake! 14Pfihi nitsowakombola na tsingupfu tsa likabuli? Au nitsowakombola na lifwa? Ghwe lifwa kulikwani ukutowa kwako? Ghwe kabuli kulikwani ukuhinya kwako? Nene sitsowonela keli libatsi baye. 15Hata ka mna wandughu tsake Efuremu kakweleka ng'ani, libeho lya IMNDEWA ililawa mashaliki litsakutsa liduma kulawa kunyika, imbwibwi yake ng'aitsolapfa matsi baye, na ichisima chake chitsonyala, na litsosola ipfinu pfake pfa bei ng'ulu pfose ipfikighwe mna ihatsina yake. 16Iwanu wa Samaria watsohighighwa kwaapfila wambiduka Imulungu wawo. Watsokomighwa kwa lipanga, iwana wawo woneke sambi watsoghanighwa pfihande pfihande, na iwapinga tsawo wana tsiinda watsotumbulighwa.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose