Hoseya 14
14
Hosea kowadedetsa Waisiraeli
1Mwemwe Waisiraeli mmuyile IMNDEWA Imulungu wenu, kwaapfila mghwa kwa tsinzambi tsenu tsamtendile. 2Mmuyile IMNDEWA na mumlongele apfino, “Utuleghusile tsinzambi tsetu tsose, na ubokele tsinzawadi tsetu, natwe tutsokutunya kwa imilomo yetu ka apfila twokulapfila nambiko tsa ng'ombe. 3Ashuru ng'aitsotukombola baye, wala ng'atutsodina falasi wa ng'ondo baye, wala ng'atutsotsilongela keli tsisang'ano tsa ghamoko ghetu, ‘Mwemwe mwa milungu yetu,’ kwaapfila ghweghwe kwowonela libatsi iwachuwa.”
IMNDEWA pfayatsowahonetsa Waisiraeli
4IMNDEWA kolonga, “Nitsowahonetsa imimiyo yawo waleke kuya kuchughu keli, nitsowakunda kwa ghumoyo ghose, kwaapfila sitsowaghudubukila keli baye. 5Nitsakuwa ka tungwe kwa Isiraeli, naye katsosanula ka luwa lya yungiyungi, na katsakuwa na mitsitsi ighendese hasi ka mweletsi ghwa Lebanoni. 6Tsinyotela tsake tsitsokula ghoya, ukunogha kwake kutsakuwa ka minzeituni, na ukunung'ila ghoya kwake ka mweletsi ghwa Lebanoni. 7Na awala iwokala mna ichimbeho chake watsakuya, watsohanda na ukupfuna pfijo pfingi, watsosanula ka mnzabibu, watsomanyika ka dipfai ilawa Lebanoni 8Ghwe Efuremu hebali unihanganya nene na ipfinyagho? Nene nitsokwidika hautsonilomba na nitsokulolesa ghoya. Nene nitsokwing'a chimbeho ka Mberoshi, nene yuyo iyanitsokutenda weleke ghamatunda.”
Ukumalitsila
9Nani iyana ihekima yaghamanye aghano? Nani iyana tsimbutsi yaghatange aghano? Kwaapfila tsinzila tsa IMNDEWA tsigholoka, na iwanu wana ihaki watsakwanga mna tsinzila atso, lekeni iwanu iwototsa, amwo watsekwala.
Pioneer Bible Translators and The Word For The World
Learn More About Laghano Lya Sambi Kwe Iwanu Wose