Mwanduso 37
37
Yosefu na ndughu tsake
1Yakobu tsakaghendelela kukala mna isi ya Kanaani, isi iyakalile aba wake. 2Atsino mbuli tsa iwanaghe Yakobu.
Yosefu hayang'ali na miyaka kumi na saba, yang'ali yodima iwang'olo na iwamene na ndughu tsake, iwana wa Bila na Zilipa, iwapinga wa aba wake. Yosefu yang'ali yomlongelagha aba wake mbuli tsihile tsa ndughu tsake.
3Yosefu tsakamnoghela ng'ani Yakobu kubita iwanaghe wangi, kwaapfila tsakamweleka aku yeye kalala. Kamtendela Yosefu lighwanda litali linoghile. 4Ndughu tsake hawamanyile aba wawo konoghelwa ng'ani na Yosefu kubita wawo, tsawamuhila ng'ani na ng'awabamile kulonga naye pfinoghile.
5Chilo chimwe Yosefu kalota ndoto, lekeni hayawalongele ndughu tsake, wose tsawamuhila ghendo. 6Kawalongela, “Mtegheletse ndoto yanilotile. 7Tsanilota pfino, wose tsatung'ali kumghunda twakoa makinza ghe mibeleghe, bahala kinza lyangu linuka wima. Baho, makinza ghenu tsaghatsunguluka na kughwinamila mbeleghe ghwangu.”
8Ndughu tsake wamghutsa, “Pfii kwobama ututawale? Apfi kutsotutawala?” Apfo wose tsawamuhila ghendo kwa ndoto yake na achila chayawalongele.
9Kuya Yosefu kalota keli, kawalongela ndughu tsake, “Mtegheletse, nilota keli, litsua, lwetsi na tsinondo kumi na imwe tsininamila nene.”
10Hayawalongele aba wake na ndughu tsake, aba wake kammanila kamlongela, “Aino ndoto yachi yulotile? Apfi mai wako, nene na ndughu tsako tutsokwinamila?” 11Ndughu tsake tsawamwonela chepfu, lekeni aba wake kayalangula mbuli ino.
Yosefu kohutsighwa na ndughu tsake
12Litsuwa limwe ndughu tsake Yosefu hawaghendile kudima iwang'olo habehi na Shekemu, 13Isiraeli kamlongela, “Ka pfaumanya, ndughu tsako waghenda kudima iwang'olo habehi na Shekemu. Utse, nobama nikutume kuna wawo.”
Yosefu kamwidika, “Ona aba.”
14Apfo aba wake kamlongela, “Ughende ukawalole ndughu tsako na iwang'olo ka waghima, kuya utse unongele.” Kuya kamtuma aghende lwanda lwa Heburoni.
Yosefu hayapfikile Shekemu, 15imunu yumwe kamwona kakwangakwanga kunyika, kamghutsa, “Ubama choni?” 16Yosefu kamwidika, “Nowabama ndughu tsangu. Chondechonde nongele hanu kwawodimila iwang'olo.”
17Imunu yula kamlongela, “Ahano woka. Tsanihulika wolonga woghenda Dotani.” Apfo Yosefu kaghenda kuwabama na kawafika habehi na Dotani.
18Ndughu tsake hawamwonile kwa kutali, na ng'ana yawapfikile, tsawalamla wamkome. 19Welongela, “Mlole, mlota ndoto kakutsa. 20Leka tumkome tumwase mpondo, kuya tutsolonga mnyama wa kumuhulo kamkoma. Lelo tutsakona ndoto tsake tsitsakuwatse.”
21Rubeni hayahulike apfi, kabama kumkombola Yosefu, apfo kawalongela ndughu tsake, “Tuleke kumkoma.” 22Rubeni kaghendelela kulonga, “Tumwase mpondo mno, hano kunyika, lekeni mleke kumlagha.” Rubeni tsakalonga apfi kumkombola Yosefu kulawa mna ghamoko ghawo, na yamuyitse kwa aba wake. 23Yosefu hayapfikile kwa ndughu tsake, ndughu tsake wamtsula kwa ngupfu lighwanda lila litali line unzolingo lyayapfalile. 24Kuya wamsola, wamwasa mna pondo, pondo lila tsalyahela chinu na tsalyahela ghamatsi.
25Hawang'ali wakuja, wawona wachuhutsi wa lukolo lwa Ishimaeli wolawa Gileadi woghenda Misiri. Wawabapitsa ngamiya wawo imitsigho ya ubani, ziri na manemane. 26Yuda kawalongela ndughu tsake, “Tutsopata choni tung'amkoma ndughu yetu na kupfisa ukufa kwake? 27Leka tumuhutse kwa Waishimaeli wano, tuleke kumlagha, kwaapfila ayu ka ndughu yetu, yeye na twetwe twa iwana wa aba yumwe.” Ndughu tsake wamtogholela. 28Apfo wachuhutsi awo wa Midiani hawapfikile hanu aho, ndughu tsake Yosefu wamkwegha kulawa mpondo, tsawamuhutsa kwa watsukulu awo wa Ishimaeli kwa pfihindi ishilini pfa pfetsa, nawo wamsola Yosefu mbaka Misiri.
29Rubeni hayoile mna pondo lila, na ukwona Yosefu ng'ali baho, kadegha ghamaghwanda ghake kwa usungu. 30Rubeni koya kwa ndughu tsake, kawalongela, “Msongolo ng'ali baho! Lelo nitendetse?”
31Kuya walisola lighwanda lya Yosefu, wamkoma imene walipfabika lighwanda lila mna idamu. 32Walisola lighwanda lila, walighala kwa aba wawo, wamlongela, “Tulidondola lighwanda lino. Ulilole wone ka lighwanda lyino lya imwanagho.”
33Aba wawo kalitanga lighwanda lila, kalonga, “Alino ghwanda lya mwanangu ghendo! Mnyama wa kumuhulo kamkoma mwanangu. Mwanangu Yosefu kadeghighwa pfihindi pfihindi.” 34Kuya Yakobu kaghadegha ghamaghwanda ghake kwa usungu, kapfala ghamaghunila, kamlilila mwanaghe kwa ghamatsuwa mengi. 35Iwanaghe wose wamtsila kumkanza, lekeni tsakalema kukanzighwa, kalonga, “Mndeke, nitsoghendelela kumlilila mwanangu mbaka hawatsonitsika na nene.” Apfo kaghendelela kumlilila Yosefu, imwanaghe.
36Ghamatsuwa ghagho, akula Misiri, Wamidiani wala tsawamuutsa Yosefu kwa imunu yumwe iyakemighwe Potifa, yumwe we iwakulu wa Farao, iyakalile mkulu wa iwabetetsi.
Currently Selected:
Mwanduso 37: LBV
Highlight
Share
Compare
Copy
Want to have your highlights saved across all your devices? Sign up or sign in
