Mwanduso 36

Watsukulu wa Esau

1Awano iwo watsukulu wa Esau, pfipfila wakemighwa Edomu. 2Esau tsakawakwela iwapinga Wakanani, tsakamkwela Ada neghe Eloni, Mhiti, tsakamkwela Oholibama neghe Ana na mtsukulu wa Sibeoni, Mhivi, 3pfipfila tsakamkwela Basemati, neghe Ismaili, lumbu wake Nebayoti. 4Ada tsakamwelekela Esau imwana yakemighwe Elifazi, na Basemati tsakamweleka Reueli, 5Oholibama tsakamwelekela Esau iwana, Yeushi, Yalamu na Kora. Awano tsa iwana wa Esau iwelekighwe mna isi ya Kanani.

6Kuya Esau kawasola iwapinga wake, iwanaghe na iwanu wose iwali mkaye mwake, hamwe ne iwanyama wake wose ne pfinu pfose pfayapatile mna isi ya Kanani, kaghenda kukala isi ili kutali na Yakobu, ndughu yake. 7Tsakoka kwaapfila isi ila iyang'ali yokala yeye na Yakobu tsa ndodo kuna wawo kukala hamwe, tsawana iwanyama wengi na ng'awadahile baye kukala hamwe. 8Apfo Esau tsakakala mna isi ya pfidunda pfa Seili.

9Awano watsukulu wa Esau, aba wa Waedomu iwakalile mna isi ya pfidunda pfa Seiri. 10Aghano mataghwa gha iwana wa Esau, Elifazi, imwana wa Ada ipinga wake Esau, na Reuli, imwana wa Basemati, ipinga wa Esau. 11Iwana wa Elifazi tsa Temani, Omari, Sefo, Gatamu na Kenazi. 12Elifazi tsakana hawala iyakemighwe Timna, naye kamwelekela imwana yakemighwe Ameleki. Awano tsa watsukulu wa Ada ipinga wake Esau.

13Basemati, ipinga wake yungi Esau tsakamweleka Reueli. Naye Reueli tsakamweleka Nahati, Zera, Shama na Miza.

14Oholibama ipinga wa Esau, imwanaghe Ana, iyakalile mtsukulu wa Sibeoni, kamwelekela Esau iwana, Yeushi, Yalamu na Kora.

15Awano wawo iwakulu wa kolo itsilawile mna watsukulu wa Esau, iwana wa Elifazi, chaudele wa Esau, wang'ali wakulu wa kolo tsa Temani, Omari, Sefo, Kenazi, 16Kora, Gatamu na Ameleki. Awano tsa wakulu wa kolo iwalawile kwa Elifazi mna isi ya Edomu, awano tsa watsukulu wa Ada.

17Awano tsa iwana wa Reueli, iyelekile na Esau, tsa wakulu wa kolo tsa Nahati, Zera, Shama na Miza. Iwakulu wano tsawalawila kwa Reueli mna isi ya Edomu. Awano tsa watsukulu wa Basemati, ipinga wake Esau.

18Awano iwana wa Oholibama, ipinga yungi wa Esau, tsa wakulu wa kolo tsa Yeushi, Yalamu na Kora. Awano wose iwana wa Oholibama, imwana wa Ana, ipinga wake Esau. 19Awano tsa iwana wa Esau na awano tsa wakulu wawo.

Watsukulu wa Seili

20Awano iwana wa Seiri, Mhori, wenyekae wa isi ila ya Edomu, Lotani, Shobali, Sibeoni, Ana, 21Dishoni, Eseli na Dishani. Iwana wano wa Seiri tsa wakulu wa kolo tsa Wahori, mna isi ya Edomu.

22Iwana wa Lotani tsa Hori na Hemamu, na lumbu wake Lotani tsakakemighwa Timna. 23Iwana wa Shobali tsa Aluvani, Manahati, Ebali, Shefo na Onamu.

24Sibeoni tsakeleka wana weli, Aya na Ana. Ana iyo yuyo iyonile mbwibwi ya ghamatsi ighosoma akula kunyika, hayang'ali yowadima pfihongwe wa Sibeoni aba wake. 25Naye Ana, tsakaweleka Dishoni na Oholibama, Oholibama tsa imwanaghe Ana. 26Dishoni tsakaweleka Hemdani, Eshibani, Itirani na Kerani.

27Bilani tsakaweleka Zaawani na Akani.

28Dishani tsakaweleka, Usi na Arani.

29Awano tsa iwakulu wa kolo tsa Wahori, Lotani, Shobali, Sibeoni, Ana, 30Dishoni, Eseri na Dishani. Awano tsa iwakulu wa kolo tsa Wahori, mna isi ya Seiri.

Iwandewa wa Edomu

31Awano tsa wandewa iwatawale isi ya Edomu ng'ana mfalume wowose wa Isiraeli yawatawale.

32Bela imwana wa Beori tsakatawala isi ya Edomu. Ghumji ghwake tsaghukemighwa Dinaba. 33Bela hayafile, Yobabu imwana wa Zera yalawile ghumji ghwa Bosira tsakawa mfalume. 34Yobabu hayafile, Hushamu iyolawila ghumji ghwa Watemani, tsakawa mfalume.

35Hushamu hayafile, Hadadi imwana wa Bedadi tsakatawala hanu hake. Ghumji ghwake tsaghukemighwa Aviti. Ayu yuyo iyawatowile na kuwahuma Wamidiani mna isi ya Moabu. 36Hadadi hayafile, Samla kulawa Masireka, tsakawa mfalume. 37Samla hayafile, Shauli kulawa ghumji ghwa Rehoboti, isi ihili habehi na ghumto Efulate, tsakawa mfalume. 38Shauli hayafile, Baalanani imwana wa Akibori, tsakawa mfalume. 39Baalanani imwana wa Akibori hayafile, Hadadi tsakatawala hanu hake. Ghumji ghwake tsaghukemighwa Pau. Ipinga wake tsakakemighwa Mehetabeli, neghe Matiredi, mtsukulu wa Mezahabu.

40Aghano mataghwa gha wakulu wa kolo yawalawile kwa Esau kwa mataghwa ghawo, kwa imiji yawalawile na isi tsawalawile, Timna, Aliva, Yeteti, 41Oholibama, Ela, Pinoni, 42Kenazi, Temani, Mibusari, 43Magidieli na Iramu. Awano tsa wakulu wa kolo tsa Edomu, iye Esau aba wa Wahedomu. Wandikighwa kwa imiji yawo na isi tsawakalile.

Currently Selected:

Mwanduso 36: LBV

Highlight

Compare

Copy