Mwanduso 38
38
Yuda na Tamari
1Ghamatsuwa ghala, Yuda kawaleka ndughu tsake, kahulumka kaghenda kukala na imunu yumwe wa Adulami, taghwa lyake Hira. 2Ako Adulamu, Yuda tsaketingana na ipinga Mkanaani taghwa lyake Shua. Tsakamkwela, 3Shua tsakakinda hinda keleka imwana mmale, Yuda tsakamkema imwana ayo Eri. 4Shua tsakakinda keli hinda keleka imwana mmale, tsakamkema Onani. 5Kuya Shua keleka imwana yungi, tsakamkema Shela. Shela hayelekighwe, Yuda yang'ali yokala Kezibu.
6Yuda kamkwelela Eri ipinga, imwanaghe chaudele, ipinga ayo tsakakemighwa Tamari. 7Lekeni Eri, imwana chaudele wa Yuda, tsakeha hambele he Imtwatsa, apfo IMNDEWA tsakamkoma. 8Kuya Yuda kamlongela Onani, “Umkwele mlamu wako, umwelekele ndughu yako iwana.” 9Lekeni Onani tsakamanya ka ng'aidahika iwana wala kuwa wake, apfo hayawasile na mlamu wake, tsakakotsela hasi aleke kumwelekela ndughu yake iwana. 10Achila chayatendile Onani, tsachiha hambele he Imtwatsa, apfo IMNDEWA pfipfila tsakamkoma Onani. 11Kuya Yuda kamlongela Tamari, mwehe we iwanaghe, “Uye ukaye kwa aba wako na ukale bila kukwelighwa mbaka mwanangu Shela akule.” Yuda kalonga apfi kwaapfila yang'ali yopfuka Shela yang'akomighwe ka ndughu tsake. Apfo Tamari koya ukaye.
12Ghamatsuwa mengi haghalutile mwehe wa Yuda, neghe Shua tsakafa. Yuda hayafambule chililo, kagheluka Timna kwa iwanu wake iwoghana mighala iwang'olo, tsakaghenda na Hira sale yake, munu wa Adulami. 13Munu yumwe kamlongela Tamari ka aba wa mmale wake kamnzila koghenda Timna kuwaghana mighala iwang'olo wake, 14apfo Tamari katsula maghwanda ghake gha usaka, keghubika shela, kuya kakala hanu he kwingila Enaimu, habehi na inzila ighenda Timna. Tsakatenda apfo kwaapfila tsakamanya Shela tsakakula, lekeni ng'eng'ighwe baye yamkwele Tamari.
15Yuda hayamwonile, tsakepfikitsa yang'ali malaya, kwaapfila tsakeghubika chihanga chake. 16Kamghendela aho hambalimbali he nzila, kamlongela, “Nobama niwase naghwe.” Yuda ng'amanyile baye ka ayula tsa ipinga wa mwanaghe.
Tamari kamghutsa, “Ning'atoghola utsongaya choni?”
17Kamwidika, “Nitsokughalila imene kulawa mna iwanyama wangu.”
Naye kamghutsa, “Ungaya choni nikale nacho mbaka hautsongalila imene?”
18Yuda kamghutsa, “Nikwing'e choni ukale nacho mbaka hanikughalila imene ayo?”
Tamari kamwidika, “Ungaye pete iili na chitango, lutsabi lwake na ng'weku iili mna ghamoko ghako.” Apfo Yuda kamwing'a, kuya kawasa naye, na Tamari tsakakinda hinda. 19Tamari koka ukaye, katsula shela yake, kapfala maghwanda ghake gha usaka.
20Yuda tsakamtuma Hira sale yake aghale imene kwa pinga yula na yasole ipfinu pfayamwing'ile, lekeni Hira ng'amwonile baye ipinga ayo. 21Hira kawaghutsa iwanu iwakakalile hala, “Alikwani ipinga yula iyang'ali iyeutsa hambalimbali he nzila iighenda Enaimu?”
Iwanu wala wamwidika, “Hanu hano tsang'ana akale ipinga iyeutsa.”
22Apfo Hira koya kwa Yuda, kamlongela, “Simwonile baye. Na iwanu wa hanu hala walonga tsang'ana akale ipinga iyeutsa hanu hala.”
23Yuda kamlongela, “Mleke akale napfo, hela tutsosekighwa. Nikwing'a imene umghalile, lekeni ng'aumwonile baye.”
24Miyetsi midatu hambele, imunu yumwe kamlongela Yuda, “Tamari, ipinga yula we imwanagho katenda ughoni, na sambi kana hinda.”
Yuda kalaghitsa, “Mlapfeni kunze mumlakatse mbaka yafe.”
25Hawang'ali womlapfa kunze, kamtumila usenga aba wake mkwe, kalonga, “Imunu iyane pfinu pfino iyo iyangaile hinda. Mtange pfinu pfino, mmanye ka pfa nani, pete ino, lutsabi luno na ng'weku ino.”
26Yuda kapfitanga pfinu pfila, kalonga, “Ipinga yuno kana haki kubita nene, kwaapfila simwing'ile Shela mwanangu yamkwele.” Kulawa litsuwa lila Yuda ng'awasile keli na Tamari.
27Litsuwa lya Tamari lya ukweleka halipfikile, tsaimanyika tsakana hinda ya wana weli. 28Hayang'ali yakweleka, imwana yumwe kalapfa ghumoko, mkunga kamwoha lutsi ludung'u, kalonga, “Ayuno chaudele.” 29Lekeni imwana ayo kaghuyitsa ghumoko ghwake mghati, na ndughu yake kalawa. Kuya mkunga kalonga, “Mbona kulawa kwa ngupfu?” Apfo tsakamkema mwana ayo Peresi. 30Kuya ndughu yake kelekighwa na lutsi mna ghumoko ghwake, naye tsakakemighwa Zera.
Currently Selected:
Mwanduso 38: LBV
Highlight
Share
Compare
Copy
Want to have your highlights saved across all your devices? Sign up or sign in
