Mwanduso 35
35
Yakobu kakuya Beseli
1Kuya Imulungu kamlongela Yakobu, “Ugheluke ughende Beteli, ukakale ako, ukanitsengele nene Imulungu hanu ha kutambikila, nene Imulungu yanikulawile haung'ali utsuma kumpfuka ndughu yako Esau.”
2Apfo Yakobu kawalongela iwanu wa mkaye mwake na iwanu iwali naye, “Pfilapfeni pfinyagho pfe imilungu pfamlinapfo, kuya mwoghe na mpfale ghamaghwanda ghangi. 3Twakuka, twoghenda Beteli, ako nitsomtsengela Imulungu hanu ha kutambikila, Imulungu yula iyanyapfile litsuwa lila hanidununzike, yuyo iyakalile na nene kokose kwang'endile.” 4Apfo wamwing'a Yakobu pfinyagho pfose pfe imilungu pfawali napfo na heleni tsose tsawapfalile mmaghutwi mwawo, Yakobu kapfitsika hasi mwe mbiki ighukemighwe mwaloni ako Shekemu.
5Yakobu ne iwanaghe hawang'ali wakuka, Imulungu kawaghela wogha iwanu wa imiji iili habehi, ng'awadahile baye kuwakoleletsa. 6Yakobu ne iwanu wake tsawapfika hanu hakemighwe Luzu, sambi hokemighwa Beseli, mna isi ya Kanaani. 7Tsakatsenga hanu ha kulapfila nambiko, na kahakema hanu hala Eli Beteli, kwaapfila hanu hala Imulungu tsakamlawila Yakobu hayang'ali yotsuma kumpfuka ndughu yake. 8Kuya Debora iyakalile mtumwa wa Rebeka, tsakafa na kutsikighwa hasi he mbiki ighukemighwa mwaloni, ubali wa kuhisi wa Beteli, apfo mbiki aghwo tsaghukemighwa Aloni Bakuti, mana yake mbiki wa chililo.
9Yakobu hayoyile Padani Aramu, Imulungu kamlawila keli, kambaliki. 10Imulungu kamlongela, “Taghwa lyako Yakobu, lekeni ng'utsokemighwa keli Yakobu, ila kutsokemighwa Isiraeli.” Apfo Imulungu tsakamwing'a taghwa Isiraeli. 11Imulungu kamlongela, “Nene na Imulungu Yane Ngupfu tsose. Weleke iwana wengi na wongetseke. Wanu wengi watsolawila mna iwana wako, na wandewa watsolawa mlukuli mwako. 12Isi yanimwing'ile Abrahamu na Isaka nitsokwing'a ghweghwe, pfipfila nitsoweng'a na watsukulu wako isi ino.” 13Imulungu hayamalitse kulonga naye, kamleka koka. 14Yakobu kemitsa libwe hanu hala Imulungu hayalongile naye, kaghida nambiko ya chokunwa, pfipfila kaghida ghamafuta mna libwe alyo, kalitenda liwe lye Imtwatsa. 15Yakobu kahakema Beteli, hanu aho hayalongile ne Imulungu.
Raheli kakufa
16Yakobu na kaye yake woka kulawa Beteli, hawang'ali wahabei na kupfika Efurati, Raheli tsakona usungu ng'ani wo ukweleka. 17Naye hayang'ali mna usungu awo mkulu wo ukweleka, mkunga kamlongela, “Raheli, uleke kupfuka, kwaapfila kuna imwana yungi immale.” 18Lekeni Raheli hayang'ali yohila no ukufa, kamwing'a mwanaghe taghwa Benoni, mana yake mwana wa usungu wangu, lekeni aba wake tsakamkema Benjamini, mana yake, mwana wa nondokela.
19Kuya Raheli kafa, katsikighwa mmbalimbali mwa inzila iighenda Efurati, sambi yomanyika ka Betilehemu. 20Yakobu keka libwe mchang'a mwa chibaka cha Raheli, libwe lila lyolangusa chibaka cha Raheli mbaka leloli. 21Kuya Yakobu, pfipfila iyakemighwe Isiraeli, kaghendelela na ghumwanza, katsenga chibumbulika chake kumwambu mwa ghumnala ghwa Ederi.
Iwana wa Yakobu
22Isiraeli hayang'ali yokala mna isi ila, Rubeni tsakawasa na Biliha, pinga wa aba wake, naye Isiraeli tsakahulika mbuli atso.
Yakobu tsakana iwana kumi na weli. 23Iwanaghe Lea tsawakala Rubeni, chaudele wa Yakobu, Simeoni, Lawi, Yuda, Isakari na Zabuloni. 24Iwanaghe Raheli tsa Yosefu na Benjamini. 25Iwana wa Biliha, mtumwa wa Raheli, tsawakemighwa Dani na Nafutali. 26Iwana wa Zilipa, mtumwa wa Lea, tsa Gadi na Asheri. Awano iwo iwana wa Yakobu, iwelekighwe Padani Aramu.
Isaka kakufa
27Yakobu tsakaghenda kwa aba wake, Isaka iyakalile ako Mamre, habehi na Heburoni, hanu hawakalile Abrahamu na Isaka. 28Isaka tsakana miyaka miya imwe na semanini. 29Naye kafa aku kalala ng'ani. Iwanaghe, Esau na Yakobu wamtsika.
Currently Selected:
Mwanduso 35: LBV
Highlight
Share
Compare
Copy
Want to have your highlights saved across all your devices? Sign up or sign in
