Mwanduso 28
28
1Apfo Isaka kamkema Yakobu kambaliki, kamlaghitsa kamlongela, “Uleke kukwela pinga Mkanani. 2Ghenda Pedani Aramu sambi baha, ukaye kwa sekulu wako Betueli, umkwele neghe yumwe wa mtumba wako Labani. 3Imulungu yane ngupfu ng'ani yakubaliki, yakwing'e iwana ketseketse, ili uwe aba wa isi nyingi. 4Imulungu yakubaliki ghweghwe ne watsukulu wako ka pfayambaliki Abrahamu, ili isi iuli mgheni sambi iwe yako, isi ino Imulungu yammwing'ile Abrahamu!” 5Kuya Isaka kamghala Yakobu, naye kaghenda Padani Aramu, kwa Labani imwana wa Betueli, Mwaramu. Labani lumbu wake Rebeka, mai wawo tsina Yakobu na Esau.
Esau kokwela pinga yungi
6Esau hayonile Isaka kambaliki Yakobu na kamlongela aghende kukwela Padani Aramu. Pfipfila tsakahulika ka Isaka hayambalikile Yakobu, kamlaghitsa aleke kukwela ipinga Mkanani. 7Kuya Esau tsakamanya ka Yakobu kawategheletsa mai wake na aba wake, kaghenda Padani Aramu. 8Kuya Esau kamanya ka aba wake ng'onoghelwa baye ne iwapinga Wakanani. 9Apfo Esau kaghenda kwa Ismaili imwana wa Abrahamu, kamkwela ipinga yungi, yakemighwe Mahalati, neghe Ismaili, lumbu jake Nebayoti.
Yakobu kolota ako Beseli
10Yakobu kalawa Beesheba, kaghenda Harani. 11Hayapfikile hanu hamwenga, tsakawasa aho kwaapfila litsua tsaliswa. Kasola libwe lya hanu ho, kalika hasi he litwi lyake, kawasa. 12Kalota, kona ludanala lwimitsighwa muisi, na kusa kwake kupfika kulanga. Kuya malaika we Imulungu wang'ali wogheluka na kuhulumka mludanala. 13Na mludanala amo kema IMNDEWA, kamlongela, “Nene Imtwatsa, Imulungu wa Abrahamu na Imulungu wa Isaka, aba wako. Nitsokwing'a ghweghwe na watsukulu wako isi ino yuwasile. 14Watsukulu wako watsokuwa wengi ka litimbwisi lya iisi. Nawo watsakwenela ubali wa kwalilawila litsua na kwaliswela litsua, na ubali wa kuchang'a na wa kuhisi. Kubitila ghweghwe ne iwatsukulu wako, iwanu wose muisi watsobalikiwa. 15Nene nahamwe naghwe na nitsokulolesa kwokwose kughenda, no ukukuyitsa mna isi ino. Sitsokuleka mbaka nikutendele achila chanikulongele.”
16Kuya Yakobu kalamka, kalonga, “IMNDEWA kahano ghendo, tsasimanyile baye!” 17Yakobu kapfuka, kalonga, “Hanu hano honikangawatsa! Aino ng'anda ye Imulungu ghendo, na alino libani lya kulanga.”
18Nemitondotondo litsuwa liwinzile Yakobu kasola libwe lyaliwasile, kalika ka ngutso na kalighidila ghamafuta liwe lya Imtwatsa. 19Yakobu kahakema hanu hala Beseli, mana yake ng'anda ye Imulungu, lekeni ghumji ghula tsaghukemighwa Lusu. 20Kuya Yakobu kelaha kalonga, “Imulungu ung'akala hamwe na nene na kunilolesa mna ghumwanza ghwangu na ung'angaya chijo na ghamaghwanda, 21nani ning'oya tseghamba ukaye kwa aba wangu, ghweghwe IMNDEWA kutsokuwa Imulungu wangu. 22Libwe lyino lyanikile hano ka ngutso, hatsakuwa hanu ho ukukutamanila ghweghwe Imulungu, nani nitsokwing'a hanu ha kumi mna pfinu pfose pfaungayile.”
Currently Selected:
Mwanduso 28: LBV
Highlight
Share
Compare
Copy
Want to have your highlights saved across all your devices? Sign up or sign in
