Mwanduso 27
27
Isaka kombaliki Yakobu
1Isaka tsakalala na nenge tsake ng'atsing'ali tsikona baye. Isaka kamkema Esau imwanaghe mkulu kamlongela, “Mwanangu!”
Naye kamwidika, “Oo aba wangu.”
2Isaka kamlongela, “Ulole, sambi nene nilala kuya simanyile baye ka nitsakufa tsuwachi. 3Lelo usole mghowa ghwako, ughende kwibagho ukaniwindile imnyama. 4Kuya unyambikile chijo chinoghile chanibama, ungalile ndiye, ili nikubaliki ng'ana nife.”
5Isaka hayang'ali yolonga na Esau, Rebeka yang'ali yotegheletsa. Esau haghendile kuwinga, 6Rebeka kamlongela Yakobu, “Nimuhulika aba wako kolonga na ndughu yako Esau, 7‘Ungalile mnyama wa kwibagho, unyambikile chijo chinoghile ndiye, ili nikubaliki hambele he IMNDEWA ng'ana nife.’ 8Lelo mwanangu unitegheletse na utende achila chanikulongela. 9Ughende kune likingili lya iwamene usole mene weli wanoghile, ungalile nimwambikile aba wako chijo ichinoghile, achila ichimnoghela. 10Kuya usole chijo acho umghalile aba wako, ili yakubaliki ng'ana yafe.”
11Lekeni Yakobu kamlongela mai wake, “Mai, ambe Esau kana mvili mlukuli, lekeni nene nahela. 12Lelo itsakuwatse aba wangu ang'anikinda? Ang'amanya ka nombugha ambe katsonilani, kuya ng'atsonibaliki baye.”
13Mai wake kamlongela, “Mwanangu, ka kulanighwa leka nilanighwe nene. Tenda chanikulongela, ghenda ungalile iwamene awo.” 14Apfo kaghenda kawasola iwamene awo kamghalila mai wake, naye mai wake kambika ichijo chinoghile, achila ichimnoghela Isaka, aba wake. 15Kuya Rebeka kasola lighwanda ilinoghile lya Esau mwanaghe mkulu, ilikalile mng'anda mwake, kampfatsa Yakobu imwanaghe mdodo. 16Kuya kamghubika ghamoko ne singo kwa ngotsi ye iwamene. 17Kuya kamwing'a Yakobu chijo ichinoghile na chighate chayambike.
18Kuya Yakobu kamghendela aba wake kamkema, “Aba!”
Naye kamwidika, “Oo mwanangu, ghweghwe uli nani?”
19Yakobu kamwidika aba wake, “Nene Esau imwanagho chaudele. Nitenda ka pfaunongele. Lelo ukale hasi uje inyama yanikughalile, ili unibaliki.”
20Lekeni Isaka kamghutsa, “Mwanangu, pfii mbona kupata himahima?”
Yakobu kamwidika, “Kwaapfila Imtwatsa, Imulungu wako kanyapfila.”
21Isaka kamlongela Yakobu, “Haya mwanangu seghela habehi nikukinde, nimanye ka ghweghwe kwa mwanangu ghendo Esau au kwa imunu yungi.” 22Yakobu kamsoghelela habehi aba wake, naye kambamasa kuya kalonga, “Litsi lyino, litsi lya Yakobu, lekeni ghamoko ghano, ghamoko gha Esau.” 23Isaka ng'amtangile baye, kwaapfila ghamoko ghake tsaghakala ne tsimvili ka ghamoko gha Esau ndughu yake, apfo ang'ali yobama kumbaliki, 24kamghutsa keli, “Apfi ghweghwe kwa mwanangu ghendo Esau?”
Kamwidika, “Ona, nene.”
25Kuya Isaka kalonga, “Mwanangu, ngalile nyama yuwindile ndiye nikubaliki.” Yakobu kamghalila chijo kaja, pfipfila kamghalila idipfai, kanwa. 26Kuya aba wake kamlongela, “Mwanangu, utse ano twihagatile.” 27Yakobu kamsoghelela habehi aba wake, nawo wehaghatila, Isaka hayanusile ghamaghwanda ghake, tsakambaliki kalonga,
“Lola mwanangu, pfaunung'ila ghoya
ka mghunda ighubalikighwe ne Imtwatsa.
28Nomlomba Imulungu yakuhulumsile litungwe kulawa kulanga,
akwing'e lidongo linoghe, ipfijo ne idipfai!
29Makabila ghasokutumikila,
na iwanu watsokutowela ghamaghoti.
Kutsowatawala ndughu tsako,
na iwana wa mai wako watsotowa ghamaghoti hambele hako.
Iwanu iwatsokulani watsolanighwa,
na iwanu wala iwokubaliki watsobalikiwa.”
Esau kolomba yabalikighwe
30Isaka hamalitse kumbaliki Yakobu, na bahala Yakobu hayang'ali yolawa kwa aba wake, Esau koya kulawa kuwinda. 31Naye Esau kamwambikila aba wake chijo ichinoghile. Kuya kamlongela, “Aba wangu, winuke uje nyama yanikughalile, ili unibaliki.”
32Aba wake kamghutsa, “Ghweghwe uli nani lelo?”
Naye kamwidika, “Nene Esau, mwanagho chaudele.”
33Isaka tsakadedema ng'ani kalonga, “Angu nani yula iyawindile na kunighalila nyama? Kuya ma ndiya ng'ana ghweghwe utse, na ma nimbaliki, naye katsobalikiwa.”
34Esau hayahulike apfo, kalila kwa ukukemelela kwa usungu mkulu kalonga, “Aba wangu, unibaliki na nene!”
35Aba wake kamwidika, “Ndughu yako katsa kangutsukila, nani nimbaliki.”
36Esau kalonga, “Ayu ghendo taghwa lyake Yakobu. Kanibugha mala mbili, tanu tsakasola haki yangu ya mwana chaudele, na sambi kasola balaka yangu!” Kuya kamghutsa aba wake, “Lelo ng'undekele balaka baye na nene?”
37Isaka kamwidika, “Nimtenda Yakobu yawe mtwatsa wako na niwatenda ndughu tsake wawe watumwa wake, na nimwing'a pfijo na idipfai. Lelo nikutendele choni mwanangu?”
38Esau kamlongela aba wake, “Aba wangu, apfi kwahela balaka ingi? Unibaliki na nene!” Kuya Esau kalila ng'ani.
39Kuya Isaka kamwidika, “Kaye yako itsokuwa kutali na lidongo linoghile, na kutsokala kutali na tungwe lya kulanga. 40Kutsokala kwa lipanga lyako, na kutsomtumikila ndughu yako. Lekeni hautsoswekuka, ngutsolongosighwa naye keli.”
41Apfo Esau kamuhila Yakobu, kwaapfila aba wake tsakambaliki Yakobu. Esau tsakelongela, “Ghamatsuwa gha kumlilila aba wetu ghahabehi, apfo nitsomkoma ndughu yangu Yakobu.”
42Lekeni Rebeka hayahulike achila chayobama kutenda Esau, kamtuma imunu aghende kumkema Yakobu, imwanaghe mdodo, kamlongela, “Lola, ndughu yako Esau kobama yakukome. 43Lelo mwanangu, utende chanikulongela. Utsumile kwa ndughu yangu Labani iyokala ako Harani. 44Ukale naye chidogho mbaka maya ya ndughu yako haitsohola. 45Maya ya ndughu yako haitsohola na kwisemwa aghala ghumtendele, nitsomtuma imunu yakuitse ukaye. Ebali nimwaghitseni wanangu wose weli mala lumwe?”
Yakobu koghalighwa kwa Labani
46Rebeka kamlongela Isaka, “Iwapinga wano Wahiti wonidesa ghendo. Yakobu ang'akwela ipinga mna isi ino, iwapinga ka Wahiti wano, ughima wangu utsakuwa wahela mana.”
Currently Selected:
Mwanduso 27: LBV
Highlight
Share
Compare
Copy
Want to have your highlights saved across all your devices? Sign up or sign in
