Mwanduso 29
29
Yakobu kopfika ukaye kwa Labani
1Kuya Yakobu kaghendelela na ghumwanza, kapfika isi ya iwanu wa ubali wa kwalilawila litsua. 2Hanu hala kona chisima kuchiwala, hamwe na makingili madatu ghe iwang'olo iwawasile habehi ne ichisima, kwaapfila tsawang'ali wakunwagha ghamatsi ghe chisima chila ichighubikighwe ne libwe likulu. 3Makingili ghe iwang'olo haghetinganagha hanu hala, wadimi wolibimbilisa libwe alyo kulawa mchisima na kuwanwesa ghamatsi iwang'olo. Kuya woliyuitsa libwe hanu hake.
4Yakobu kawaghutsa wadimi awo, “Hamlamke ndughu tsangu, mlawa kwani?”
Wadimi wamwidika, “Twolawa Harani.”
5Kawaghutsa keli, “Pfii Labani mtsukulu wa Nohari mummanya?”
Wamwidika, “Ona, tummanya.”
6Kuya Yakobu kawaghutsa, “Pfii kalamka?”
Wamwidika, “Ona kalamka, na Raheli, neghe wake ayula hala kakutsa ne iwang'olo.”
7Yakobu kalonga, “Kwaapfila kung'ali misi, na chino si chipindi che iwanyama kwitingana. Wanweseni ghamatsi na muwasole mkawadime.”
8Wamwidika, “Ng'atudaha baye kutenda apfo mbaka wanyama wose wetingane, na libwe libimbilisighwe kutali ne chisima. Kuya tutsowanwesa ghamatsi iwang'olo.”
9Yakobu hayang'ali yolonga nawo, Raheli kafika ne iwang'olo wa aba wake, kwaapfila yeye iyo iyang'ali yowadima. 10Yakobu hayamwonile Raheli neghe Labani, mtumba wake na iwang'olo wa Labani, kaghenda kulibimbilisa libwe lilawe hane chisima, kawanwesa ghamatsi iwang'olo wa mtumba wake. 11Kuya Yakobu kamnonela Raheli, na kandusa ukulila kwa kudamilila. 12Yakobu kamlongela Raheli yeye tsakakala mwiwa wa aba wake na tsakakala imwana wa Rebeka. Apfo Raheli katsuma kaghenda kumlongela aba wake. 13Bahala Labani hayahulike mbuli tsa Yakobu, mwiwaghe, katsuma kaghenda kumbokela, kamkumbatila, kamnonela, kamghala ukaye yake. Kuya Yakobu kamlongela Labani ghose ighalawile. 14Labani kamlongela, “Ghweghwe kwa mwiwangu ghendo, twolawa lukolo lumwe.” Yakobu kakala hala ghumwetsi ghwose.
Yakobu kowakwela Lea na Raheli
15Labani kamlongela Yakobu, “Kwaapfila ghweghwe kwa ndughu yangu, lelo unisang'anile hela? Nongele nikulihe choni?” 16Labani tsakana neghe weli, neghe wake mkulu tsakakemighwa Lea, na neghe wake mdodo tsakakemighwa Raheli. 17Lea tsakana nenge tsinoghile, lekeni Raheli tsakana lukuli lunoghile, yeye tsakanogha sideke.
18Raheli tsakamnoghela Yakobu, apfo Yakobu kamlongela Labani, “Ung'angaya Raheli, neghe wako mdodo nimkwele, nitsokusang'anila kwa miyaka saba.”
19Labani kamwidika, “Ng'apfu nikwing'e ghweghwe, na si kumwing'a imunu yungi baye. Ukale hano na nene.” 20Yakobu tsakasang'ana miyaka saba ili yamkwele Raheli, miyaka saba kuna yeye tsayoneka ka si chinu baye, kwaapfila Raheli tsakamnoghela sideke.
21Kuya Yakobu kamlongela Labani, “Ungaye mwehe wangu, ghamatsuwa ghangu ghamala, nobama nimkwele.” 22Apfo Labani kawakema iwanu wose, katenda chihungo. 23Lekeni chilo chila, Labani kamsola Lea, kamghala kwa Yakobu, Yakobu kawasa naye. 24Labani kamlapfa Silipa, imtumwa wake ipinga, kamwinga Lea ili yamsang'anile. 25Nemitondo haifikile, Yakobu tsakamanya ka ayula tsakakala Lea! Apfo Yakobu kaghenda kummanila Labani, “Ebali unitendele pfino? Ambe nikusang'anila nimkwele Raheli. Ule unibughile?”
26Labani kamwidika, “Muisi mwetu ng'atutendagha apfo baye, mdodo ukukwelighwa ng'ana mkulu wake yakwelighwe. 27Mtimilitsile Lea ghamatsuwa ghake saba gha ukukwelighwa, kuya tutsokwing'a Raheli, kwa kunisang'anila miyaka saba ingi.”
28Yakobu katoghola, ghamatsuwa saba gha kukala na Lea haghamalile, Labani kamwing'a Yakobu Raheli, neghe wake yamkwele. 29Labani kamlapfa Biliha, mtumwa wake ipinga, kamwing'a Raheli ili yamsang'anile. 30Yakobu pfipfila tsakawasa na Raheli, kamnoghela ng'ani Raheli kubita Lea. Kuya kamsang'anila Labani miyaka ingi saba.
Iwana wa Yakobu
31IMNDEWA hayonile Lea ng'omnoghela baye Yakobu, kamtenda yeleke iwana, lekeni Raheli tsakakala ng'akweleka baye. 32Lea tsakakinda inda keleka imwana, tsakamkema imwana ayo Rubeni. Lea kalonga, “IMNDEWA kona ukudununzika kwangu, lelo nitsomnoghela mmale wangu.” 33Lea kakinda keli inda, keleka keli imwana, kalonga, “Kwaapfila Imulungu kahulika ka simnoghela baye Yakobu, kangaya imwana yungi.” Apfo tsakamkema imwana ayo Simoni. 34Lea kakinda hinda ingi, keleka imwana yungi mmale. Kalonga, “Lelo mmale wangu katselunga na nene, kwaapfila nimwelekela iwana wadatu.” Apfo kamkema mwana ayo Lawi. 35Kuya Lea kakinda keli inda, keleka imwana yungi. Kalonga, “Chipindi chino nitsomtunitsa Imtwatsa.” Apfo tsakamkema Yuda. Kuya Lea tsakema ukweleka.
Currently Selected:
Mwanduso 29: LBV
Highlight
Share
Compare
Copy
Want to have your highlights saved across all your devices? Sign up or sign in
