Mwanduso 21
21
Kwelekighwa kwa Isaka
1Kuya IMNDEWA tsakamkumbuka Sara, kamtendela ka pfayamlongele. 2Abrahamu hayang'ali kalala ng'ani, mwehe wake tsakakinda inda, kuya kamwelekela imwana immale. Imwana ayo tsakoneka msimu uhuhula wayalongile Imulungu. 3Abrahamu tsakamkema imwana ayo iyelekighwe na Sara, Isaka. 4Isaka hayapfikile ghamatsuwa manane, Abrahamu kamwingitsa ngoma ka Imulungu pfayamlaghitse. 5Abrahamu tsakana na miyaka miya ahala hayoneke Isaka. 6Naye Sara tsakalonga, “Imulungu kangalila chiseko, chila imunu iyatsohulika nene nyeleka imwana katsoseka na nene.” 7Kuya kaghendelela kulonga, “Yuhi ang'adahile kumlongela Abrahamu, ka nene Sara nitsoghwaghwisa iwana? Mana nimwelekela imwana immale mna unzehe wake.” 8Kuya imwana kakula, na litsuwa lyalekile kughwaghwa, Abrahamu kamtendela Isaka chihungo chikulu.
Hagari na Ismaili wowingighwa
9Litsuwa limwe Sara tsakamwona Ismaili, mwana wa Abrahamu iyelekighwe na Hagari Mmisiri kombetsa Isaka imwanaghe. 10Apfo Sara kamlongela Abrahamu, “Muwinge imtumwa yuno ne imwanaghe, kwaapfila imwana we pinga yuno ng'atsohala baye ne imwanangu Isaka.” 11Mbuli ino tsaimtsupfa ghendo Abrahamu mana Ismaili pfipfila tsakakala imwanaghe.
12Lekeni Imulungu kamlongela Abrahamu, “Imwana yuno ne imtumwa wako waleke kukutenda ughanzike. Utende chochose choyokulongela Sara, kwaapfila kubitila Isaka ghweghwe kutsakuwa ne watsukulu wanikulongele. 13Kuya imwana wa imtumwa wako naye nitsomwing'a iwana wengi, apfo katsokuwa aba we iwanu wengi, mana na yeye ka imwanagho.”
14Tsuwa liwinzile Abahamu kalamka lupfilipfili, kasola ichijo na chibuyu che ghamatsi kamwing'a Hagari, kamtwika pfinu apfo mmahegha, kammlongela yoke hamwe ne imwanaghe. Hagari koka, yang'ali yakwangakwanga mnyika mwa Beasheba.
15Ghamatsi haghamalile, Hagari kamuwasisa msongolo mchimbeho. 16Kuya kaghenda kukala utali wa ghamaghulu miya imwe, tsakelongela mmoyo, “Sibama baye kumwona mwanangu pfayakufa.” Kuya kandusa kulila.
17Kuya Imulungu tsakamuhulika msongolo ayo kolila, imalaika kamkema Hagari, kamghutsa, “Hagari ichinu chachi ichikutenda ughanzike? Uleke kupfuka, Imulungu kahulika chililo cha imwanagho ako kwayali. 18Winuke, umsole imwanagho, mana nitsomtenda yawe aba we wanu wengi.” 19Kuya Imulungu kampfumbula tsinenge Hagari, kona chisima. Apfo kaghenda kadegha ghamatsi mchibuyu, kamnwesa mwanaghe. 20Naye Imulungu tsakakala hamwe ne msongolo ayo, msongolo ayo kaghendelela kukula. Kuya tsayang'ali yowinda. 21Tsakakala mna nyika ya Parani, na mai wake tsakamkwelela ipinga kulawa isi ya Misiri.
Laghano lya Abrahamu na Abimeleki
22Chipindi chila Abimeleki na Fikoli imkulu we iwang'ewele wake, wamghendela Abrahamu, wamlongela, “Imulungu kahamwe naghwe mna ghose ghoutenda. 23Lelo wilahe hambele he Imulungu ka ng'utsonibugha baye nene au iwanangu au iwatsukulu wangu. Ka pfanikutendele ghweghwe pfinoghile, pfipfila naghwe ututendele pfinoghile nene ne iwanu wangu mna isi ino yaukala.”
24Abrahamu kelaha, “Imulungu yandiye.”
25Kuya Abrahamu tsakamsing'inikila Abimeleki kwaajili ya chisima cha ghamatsi chawambokile iwatumwa wa Abimeleki. 26Lekeni Abimeleki kalonga, “Simmanyile baye imunu iyatendile apfo. Naghwe ng'unongele baye imbuli ino, na nene sina nihulike baye mbaka leloli.” 27Abrahamu tsakamwing'a Abimeleki iwang'olo ne wang'ombe, kuya wanu awo weli tsawelaghana. 28Abrahamu tsakabaghula iwang'olo mbughuma saba kulawa mna iwang'olo wake. 29Abimeleki kamghutsa, “Ule utenda pfino?”
30Abrahamu kamwidika, “Uwasole iwang'olo wano saba kulawa kuna nene wawe ukalangama, ka nene iyanihimbile chisima chino.”
31Apfo hanu hala tsahakemighwa Beasheba, kwaapfila iwanu awo weli tsawelaha hanu hala.
32Hawafambule kwilaghana ako Beasheba, Abimeleki na Fikoli tsawoya kune isi ya Wafilisti. 33Kuya Abrahamu kahanda mkwaju ako Beasheba, na baho kamtamanila IMNDEWA, Imulungu wa ghamatsuwa ghose. 34Abrahamu tsakakala mna isi ya Wafilisti kwa ghamatsuwa mengi.
Currently Selected:
Mwanduso 21: LBV
Highlight
Share
Compare
Copy
Want to have your highlights saved across all your devices? Sign up or sign in
