Mwanduso 20
20
Abrahamu na Abimeleki
1Abrahamu tsakoka Mamre, kaghenda kukala haghatighati ha Kadeshi na Shuri mna isi ya Negebu. Kuya kaghenda kukala ako Gerari, 2Abrahamu tsakawalongela iwanu ka Sara, mwehe wake, tsakakala lumbu wake. Apfo Abimeleki, imfalume wa Gerari kamsola Sara. 3Lekeni chilo chimwe Imulungu kamlawila Abimeleki mndoto, kamlongela, “Ghweghwe kutsakufa, mana pinga ayo yumsolile, pinga we munu.”
4Lekeni Abimeleki tsang'ana yawase baye na Sara, apfo kalonga, “Imtwatsa, apfi kutsowakoma iwanu iwalihela totso? 5Abrahamu mwenyegho tsakanongela Sara ka lumbu wake, kuya naye Sara mwenyegho tsakalonga Abrahamu lumbu wake. Nene nitenda pfino kwa ghumoyo ghunoghile, nene nahela totso.”
6Imulungu kamwidika Abimeleki mndoto, “Ona, nomanya kutenda apfo kwa ghumoyo ghunoghile, nene iyo inikughomile uleke kunendela nzambi, apfo sikulekile baye umdolitse. 7Lelo muyitse kwe mmale wake, kwaapfila Abrahamu nabii, yeye katsokulombela, naghwe kutsakuwa mghima. Lekeni ka ng'umuyitsa baye, umanye ghendo ghweghwe ne iwanu wako mtsakufa.”
8Abimeleki kalamka nemitondotondo kawakema pfilongotsi wake wose wa isi yake, kawalongela aghala ighamlawile, nawo wapfuka ghendo. 9Kuya Abimeleki kamkema Abrahamu, kamghutsa, “Angu ututendiletse? Nikutendile choni chihile mbaka ungalile maghayo ghano nene na undewa wangu? Chaunendile ng'achinoghile baye.” 10Kuya Abimeleki kamghutsa Abrahamu, “Ule kunendela pfino?”
11Abrahamu kamwidika, “Tsanitsagha hanu hano haduhu imunu iyompfuka Imulungu, apfo mng'anikomile mumsole mwehe wangu. 12Hata apfo Sara ka lumbu wangu ghendo, yeye imwana we aba wangu lekeni si imwana wa mai wangu baye, apfi pfipfo pfawile mwehe wangu. 13Imulungu hayandapfile mng'anda mwe aba wangu ng'ende hanu hangi, tsanimlongela Sara, ‘Apfi pfipfo pfautsonitendela uluso, kokose kwatughenda ulonge nene na lumbu wako.’ ”
14Abimeleki kamuyitsila Abrahamu mwehe wake, kamwing'a ne iwang'olo, wang'ombe na watumighwa. 15Kuya Abimeleki kamlongela Abrahamu, “Aino yose isi yangu, lelo usaghule kokose kwaubama kukala.” 16Kuya Abimeleki kamlongela Sara, “Nomwing'a lumbu wako pfihindi elufu imwe pfa pfesa kuwalangusa iwanu iwali naghwe ka ng'utendile chinu chihile, kwahela totso.”
17Kuya Abrahamu kamlomba Imulungu, Imulungu kamuhonetsa Abimeleki ne ipinga wake ne iwatumwa wake mapinga, nawo wadaha kweleka keli iwana. 18Kwa aghala ighamlawile Sara, mwehe wa Abrahamu, IMNDEWA tsakawatenda iwapinga iwali mkaye mwa Abimeleki waleke ukweleka iwana.
Currently Selected:
Mwanduso 20: LBV
Highlight
Share
Compare
Copy
Want to have your highlights saved across all your devices? Sign up or sign in
