Mwanduso 22
22
Imulungu komghetsa Abrahamu
1Hambele Imulungu kamghetsa Abrahamu. Kamkema, “Abrahamu!”
Abrahamu kamwidika, “Oo, ulongatse Mtwatsa!”
2Kuya Imulungu kalonga, “Umsole mwanagho Isaka, imwanagho nyalimwe, iyokunoghela ng'ani, mghende isi ya Moriya. Umlapfe ka inambiko ya kulakatsighwa mna lughongo lwanitsokulangusa.”
3Litsuwa liwinzile Abrahamu tsakalamka mitondotondo, katula tsingodi tsa kulakatsila inambiko, kambapitsa ipunda wake, kamsola Isaka ne iwatumwa wake weli, kuya waghenda hanu hayalongelighwe ne Imulungu yaghende. 4Litsuwa lya kadatu Abrahamu kenula tsinenge, kalwona lughongo kwa kutali. 5Kuya kawalongela iwatumwa wake, “Mkale hano ne ipunda. Nene ne imsongolo wangu twoghenda hala kumlomba Imulungu, kuya tutsowoyila.” 6Hawang'ali woghenda, Abrahamu kamwing'a imwanaghe Isaka tsingodi tsa kulapfila inambiko, imwenyegho tsakaghala ghummaghe na ghumoto. 7Isaka kamkema aba wake, “Aba!”
Aba wake kamwidika, “Ulongatse mwanangu?”
Isaka kamghutsa, “Tsingodi na ghumoto pfabaha, lekeni yalikwani imwana we ing'olo wa kumlapfa nambiko?”
8Abrahamu kamwidika, “Mwanangu, Imulungu imwenyegho katsolapfa imwana we ing'olo wa kumlapfila inambiko.” Kuya wose weli waghendelela na ghumwanza.
9Hawapfikile hanu Imulungu hayamlongele yaghende, Abrahamu katenda hanu ha kulapfila inambiko ha ghamabwe, keka tsingodi mchanya mwake. Kuya kamwoha Isaka, kamwasisa mna tsingodi hanu he kulapfila inambiko. 10Kuya Abrahamu kasola mmaghe yamsubutule imwanaghe. 11Lekeni malaika we Imulungu kamkema Abrahamu kulawa kulanga, “Abrahamu! Abrahamu!”
Abrahamu kamwidika, “Oo!”
12Malaika ayo kamlongela, “Uleke kumlagha wala kumtendela chinu chochose imwanagho. Sambi nomanya ka ghweghwe kompfuka na komhulikitsa Imulungu, kwaapfila ng'umwimile baye imwanagho nyalimwe.”
13Abrahamu kalola mmbalimbali, kamwona ng'unzu yanasile tsimembe mwibagho. Kamlekelela Isaka, kaghenda kumsola ing'unzu ayo, kamlapfa nambiko ya kulakatsighwa hanu ha imwanaghe. 14Abrahamu kahakema hanu hala, “IMNDEWA koghola.” Mbaka leloli iwanu wolonga, “Mne lugongo lwe Imtwatsa, Imulungu koghola.”
15Malaika we IMNDEWA kamkema keli Abrahamu, 16kamlongela, “IMNDEWA kolonga apfi, ‘Nilaha kwa taghwa lyangu, nitsokubaliki, kwaapfila ng'ulemile baye kungaya imwanagho, imwanagho nyalimwe. 17Nitsokubaliki ghendo, nitsokwing'a watsukulu ketseketse ka itsinondo tsili mlanga, na ka msanga ghuli kumwani. Nawo watsowatawala iwanu iwowahila. 18Kubitila watsukulu wako, kolo tsose itsili muisi mwose tsitsobalikiwa, kwaapfila ghweghwe kunihulikitsa.’ ”
19Kuya Abrahamu kawoyila iwatumwa wake, nawo wose woya Beasheba, naye Abrahamu tsakakala kuko.
Iwatsukulu wa Nohari
20Kuya Abrahamu tsakahulika, “Milika kamwelekela iwana Nohari ndughu yako.” 21Usi, chaudele wake na Busi ndughu yake na Kemueli, aba wake Aramu, 22Kesedi na Hazo na Pilidashi na Yidilafu na Betueli. 23Betueli kamweleka Rebeka. Milika kamwelekela Nohari, ndughu yake Abrahamu iwana wanane. 24Kuya Reuma, pinga wake wa kunze Nohari, naye kamwelekela iwana, Teba na Gahamu na Tahashi na Maaka.
Currently Selected:
Mwanduso 22: LBV
Highlight
Share
Compare
Copy
Want to have your highlights saved across all your devices? Sign up or sign in
