Mwanduso 14
14
Abramu komkombola Lutu
1Ghamatsuwa agho, mfalume Amrafeli wa Shinari, mfalume Arioko wa Elasari, mfalume Kedorilaomeri wa Elamu na mfalume Tidali wa Goimu, 2waghenda kwitowa na Bera mfalume wa Sodoma, Birisha mfalume wa Gomora, Shinabu mfalume wa Adima, Shemeberi mfalume wa Seboimu na mfalume wa Bela iikemighwe Soari. 3Wandewa wano wose wetingana hamwe mna ulwanda lwa Sidimu, hane Bahari ya Munyu. 4Kwa miyaka kumi na mili wang'ali womtumikila Kedorilaomari, lekeni mna ghumwaka ghwa kumi na tatu walema kumtumikila. 5Mna ghumwaka wa kumi na nne, Kedorilaomeri na wandewa iwelungile naye, kawatowa Warefai ako Ashitaroti Karinaumu, Wazuzi ako Hamu, Waemi ako Shawe Kiriatamu, 6Wahori mna chidunda cha isi ya Seiri, wawawinga mbaka Eliparani habehi na nyika 7Kuya woya, waghenda Enimishipati, isi ya Kadeshi, waitowa isi yose ya Waamaleki, na kuwatowa Waamori iwakalile Hasasoni Tamari.
8Kuya mfalume wa Sodoma, mfalume wa Gomora, mfalume wa Adima, mfalume wa Seboiimu, mfalume wa Bela au Soari waghenda mna Ulwanda lwa Sidimu 9kwitowa na Kedolaomeri mfalume wa Elamu, Tidali mfalume wa Goiimu, Amrafeli mfalume wa Shinari, Arioko mfalume wa Elasari, wandewa wane wetowa na wandewa watano. 10Ulwanda lwa Sidimu tsaumema ghamapondo gha lami, na iwandewa wa Sodoma na Gomora hawabamile kutsuma, wangi waghwila mna ghamapomdo lekeni wangi watsumila mpfidunda. 11Wandewa wala wane tsawasola tsimali tsose na pfijo pfao pfose pfa Sodoma na Gomora, kuya woka. 12Pfipfila wamsola Lutu, imwana wa ndughu yake Abramu, iyang'ali yokala Sodoma hamwe na tsimali tsake tsose, woka tsao.
13Lekeni imunu yumwe iyahoneke, kaghenda kumlongela ayula Muheburaniya Abramu, iyang'ali yokala habehi na imibiki mikulu ya Mamre Mwaamori, ndughu yake Eshikoli na Aneri, wose tsawelunga ne Abramu.
14Abramu hayahulike ka mwana wa ndughu yake kaghoghighwa na kasolighwa, kalawa na iwanu wake miya ndatu kumi na nane iwalangulitsighwe kwitowa pfinoghile iwelekighwe mkaye mwake, kawawinzilitsa mbaka Dani. 15Nechilo chicho Abramu kawaghola iwanu wake wakawatowe iwanu awo, wawatowa na wawawinga mbaka Hoba, ubali wa kuchang'a wa Damasikasi. 16Apfo koyitsa mali tsose na kamuyitsa Loti ndughu yake na mali tsake, hamwe na iwapinga na iwanu wangi.
Melikisedeki kombaliki Abramu
17Abramu hayoile kumtowa Kedorilaomeri na wandewa weyaghe, mfalume wa Sodoma tsakalawa yaketingane naye ako kune Ulwanda lwa Imfalume. 18Kuya Melikisedeki mfalume wa Salemu, kaghala chighate na dipfai. Melikisedeki tsakakala mlapfa nambiko wa Imulungu iyali Kuchanya Ng'ani, 19kambaliki Abramu, kamlongela,
“Abramu kubalikighighwa ne Imulungu iyali Kuchanya Ng'ani,
iyalumbile isi na lilanga.
20Yatunitsighwe Imulungu iyali Kuchang'a Ng'ani,
iyakwapfile kuwahuma awala iwokwihila.”
Kuya Abramu kalapfa lifungu lya kumi mna ipfinu pfake pfayalinapfo.
21Imfalume wa Sodoma kamlongela Abramu, “Sola mali yose lekeni ungaye iwanu wangu.”
22Abramu kamwidika imfalume wa Sodoma, “Nelaha kwe Imulungu iyali Kuchang'a Ng'ani, iyalumbile isi na lilanga, 23sisola baye ichinu chochose kulawa kuna ghweghwe, hata lutsi au lutsabi lwa mikwabatsa, ili uleke kulonga, ‘Nimtenda Abramu yawe na mali.’ 24Sitsosola chinu chochose kulawa kuna ghweghwe ila pfinu pfawajile iwanu wangu na pfinu pfa iwanu iwaghendile na nene, Aneri, Eshikoli na Mamre, waleke wasole pfinu pfawo.”
Currently Selected:
Mwanduso 14: LBV
Highlight
Share
Compare
Copy
Want to have your highlights saved across all your devices? Sign up or sign in
