Mwanduso 15
15
Imulungu kelaghana na Abramu
1Hambele, imbuli ye Imulungu tsaimtsila Abramu mna ghamaono, “Abramu uleke kupfuka, nene nitsokukinga na nitsokughweka chinu chikulu.”
2Lekeni Abramu kamwidika, “Ghwe IMNDEWA, utsongaya choni, aku noghendelela kukala bila imwana na imunu iyatsohala ing'anda yangu yuyuno Elieseri, munu wa Dameski?” 3Abramu kalonga, “Lola, ng'ungaile baye iwana. Imtumwa iyelekighwe mng'anda mwangu katsohala pfinu pfangu.”
4Baho imbuli ya Imulungu imtsila, “Imunu yuno ng'atsohala baye pfinu pfako, bali nitsokwing'a mwana kulawa mlukuli mwako, ayo katsohala pfinu pfako.”
5Imulungu kamlapfa kunze Abramu, kamlongela, “Lola mlanga, tsipete tsinondo ka kwodaha kutsipeta. Apfi pfipfo watsukulu wako pfawatsakuwa wengi.”
6Abramu kamtoghola Imulungu, naye koneka kanogha hambele he Imulungu.
7Kuya Imulungu kamlongela, “Nene Imulungu, iyanikulapfile Uri, isi ya Wakalidayo nikwing'e isi ino iwe yako.”
8Abramu kamghutsa, “Ghwe Imulungu, nitsomanyatse ka isi ino itsakuwa yangu?”
9Imulungu kamlongela, “Ngalile ng'ombe, imene ne ing'olo, chila yumwe yawe na miyaka midatu, hamwe na tetele na njiwa.” 10Abramu kamghalila awo wose, kamghana chila mnyama pfihindi pfili, kapfika pfihindi apfo aku pfelolesa, lekeni iwapfideghe ng'awaghanile baye pfihindi pfibili. 11Pfimanga waihulumkila mitsogha ayo, lekeni Abramu kawawinga.
12Litsua haling'ali lyakuswa, Abramu kawasa ghendo, wogha na chisi chikulu tsapfimghubika. 13Kuya Imulungu kamlongela, “Umanye ghendo ka watsukulu wako watsakuwa wagheni mna isi iili si yawo baye, watsakuwa watumwa na kudununzighwa kwa miyaka miya nne. 14Lekeni nitsowahigha iwanu wala iwowatenda watumwa, hambele watsolawa muisi amwo na mali nyingi. 15Lekeni ghweghwe imwenyegho kutsokala ghamatsuwa mengi no utsakufa tseghamba. 16Mna mweleko wako ghwa kane, watsukulu wako watsakuya hano, kwaapfila ghehile gha Waamori ng'ana ghatimile baye ili wahighighwe.”
17Litsua haliswele na chisi kwingila, baho tanuri ililapfa lihosi na chiwenge ichikwaka tsapfiluta mghati mwa pfihindi pfila. 18Litsuwa lila Imulungu tsakalaghana na Abramu, kamlongela, “Watsukulu wako noweng'a isi ino, kulawa ghumto ghwa Misiri mbaka ghumto mkulu ghwa Efurate, 19isi tsa Wakeni, Wakemisi, Wakadimoni, 20Wahiti, Waperisi, Warefai, 21Waamori, Wakanaani, Wagirigashi na Wayebusi.”
Currently Selected:
Mwanduso 15: LBV
Highlight
Share
Compare
Copy
Want to have your highlights saved across all your devices? Sign up or sign in
