Mwanduso 12
12
Imulungu komkema Abramu
1Imulungu kamlongela Abramu, “Uileke isi yako, ndughu tsako, na kaye ya aba wako, ughende kune isi yanitsokulangusa. 2Nitsokutenda ghweghwe uwe ne iwanu wengi, na nitsolitenda taghwa lyako limanyike. Naghwe kutsakuwa ibalaka. 3Nitsowabaliki iwanu iwokubaliki, lekeni nitsowalighita iwanu iwokulighita. Kubitila ghweghwe iwanu wose iwali muisi watsobalikiighwa.”
4Apfo Abramu koka ka Imulungu pfayamlongele, na Loti tsakaghenda naye. Abram hayalawile Harani tsakana miyaka sabini na tano. 5Abramu kamsola mwehe wake Sarai na Loti imwana wa ndughu yake, na ipfinu pfake pfose ne iwanu wose iyawapatile mna isi ya Harani, nawo woka waghenda Kanaani.
Kuya hawengile mna isi ayo. 6Abramu tsakabita mna isi ayo mbaka kapfika Shekemu, hanu haenzeluke hane Mbiki mkulu ghwa Mole. Ghamatsuwa agho Wakanaani wang'ali wokala mna isi ila. 7Imulungu kamlawila Abramu, kamlongela, “Nitsoweng'a iwanagho isi ino.” Apfo Abramu kamtsengela Imulungu iyamlawile hanu ha kulapfila inambiko ha ghamabwe.
8Hambele Abramu koka kaghenda mna isi ya pfidunda iili ubali wa kwalilawila litsua wa Beseli, ako keka hema lyake, tsakakala haghati mwa ghumji ghwa Beseli na ghumji ghwa Ai. Baho kamtsengela Imulungu hanu ha kulapfila inambiko kuya kamtambikila. 9Kuya Abramu kaghendelela kuka mbaka kapfika Negebu.
Abramu koghenda Misiri
10Mna isi ila tsakulawila nzala, nzala ayo tsang'ulu sideke, Apfo Abramu kahulumka, kaghenda Misiri yakakale ako chidogho. 11Abramu hayang'ali kahabehi kwingila Misiri, kamlongela mwehe wake Sarai, “Nomanya ghweghwe kwa ipinga unoghile. 12Wamisiri hawatsokwona, watsolonga ‘Ayuno mwehe wake,’ kuya watsonikoma lekeni ghweghwe watsokuleka mghima. 13Chonde chonde uwalongele ghweghwe kwa lumbu wangu, watsonendela ghoya na nene nitsokala mghima.” 14Baho Abramu hayengile Misiri, Wamisiri wamwona Sarai kanogha ng'ani. 15Iwakulu wa Farao hawamwonile Sarai, wamlongela Farao ipinga ayo pfayanoghile, Apfo Sarai kaghalighwa mng'anda mwa imfalume. 16Kwa ukunogha kwake Sarai, Farao kamtendela pfinoghile Abramu kamwing'a Abramu iwang'olo, iwasenga, iwapunda, iwatumwa na iwangamiya.
17Lekeni Imulungu kamdununza Farao kwa kumghalila utamu mkulu, yeye ne iwanu iwali mkaye mwake kwa kumsola Sarai, mwehe wa Abramu. 18Kuya Farao kamkema Abramu, kamghutsa, “Ebali unendele pfino? Ule ng'unongele baye ka Sarai mwehe wako? 19Ule tsakulonga ayuno ka lumbu wako, na nene nimsola yawe ipinga wangu? Lelo ayuno ano ipinga wako, umsole mke!” 20Kuya Farao kalaghitsa iwanu wake, nawo wamghala kunzila Abramu, wamlapfa Misiri hamwe ne ipinga wake na ipfinu pfake pfose.
Currently Selected:
Mwanduso 12: LBV
Highlight
Share
Compare
Copy
Want to have your highlights saved across all your devices? Sign up or sign in
