Mwanduso 11
11
Ghumnara ghwa Babeli
1Isi yose tsaikaka na ilugha imwe na ukulonga kwao tsakukala kumwe. 2Iwanu hawang'ali woghenda ubali wa kwalilawila litsua, tsawapfika mna chiwala cha Babiloni kuya tsawakala kuko. 3Welongela, “Leka, tufatule matofali tughoke pfinoghile.” Ng'awatsengele baye ghamabwe na chokaa, ila tsawatsengela matofali na lami. 4Walonga, “Leka twitsengele ghumji na mnara ghupfike kulanga, ili taghwa lyetu limanyike, tuleke kupwililika mna isi yose.”
5Kuya IMNDEWA kahulumka hasi, kona ghumji na mnara ighutsengighwe ne iwanu. 6IMNDEWA kalonga, “Iwanu wano wolonga lugha imwe na wandusa kutenda pfino, apfo wodaha kutenda chochose chawobama. 7Leka tuhulumke hasi tuitiwanyitse lugha yawo ili waleke kwihulikitsa.” 8Apfo IMNDEWA kawapwililisa muisi mwose, nawo waleka kutsenga ghumji. 9Ghumji ghula tsaghukemighwa Babeli, kwaapfila ako Imulungu tsakaitiwanyitsa lugha yose, ako kawapwililisa iwanu chila hanu muisi mwose.
Iwana wa Shemu
10Aghuno mweleko ghwa Shemu. Miyaka mili kulawa gharika haimalile, Shemu hayang'ali miyaka miya, tsakamweleka Arifakisadi. 11Hayamweleke Arifakisadi, Shemu tsakakala keli miyaka miya tano, kuya kaweleka iwana wangi iwamale ne iwapinga.
12Arifakisadi hayapfikile na miyaka salasini na tano, kamweleka Shela. 13Hayamweleke Shela, Arifakisadi tsakakala keli miyaka mia nne na midatu.
14Shela hayapfikile miyaka salasini, kamweleka Eberi. 15Hayamweleke Eberi, Shela kakala keli miyaka miya nne na midatu, kuya keleka iwana wangi iwamale ne iwapinga.
16Eberi hayapfikile miyaka salasini na mine, kamweleka Pelegi. 17Eberi hayamweleke Pelegi, kakala keli miyaka miya ndatu na salasini. kuya keleka iwana wangi iwamale ne iwapinga.
18Pelegi hayapfikile miyaka selasini kamweleka Reu. 19Pelegi hayamweleke Reu, tsakakala keli miyaka miya mbili na tisa kuya keleka iwana wangi, iwamale ne iwapinga.
20Reu hayapfikile miyaka selasini na mili, kamweleka Serugi. 21Reu tsakakala keli miyaka miya mbili na saba kuya keleka iwana wangi, iwamale ne iwapinga.
22Serugi hayapfikile miyaka selasini, kamweleka Nahori. 23Kuya Serugi tsakakala keli miyaka miya mbili kuya keleka iwana wangi, iwamale ne iwapinga.
24Nahori hayapfikile na miyaka ishirini na tisa, tsakamweleka Tera. 25Nahori tsakakala keli miyaka miya imwe kumi na tisa kuya keleka iwana wangi, iwamale ne iwapinga.
26Tera hayapfikile miyaka sabini, kamweleka Abramu, Nahori na Harani.
Iwana wa Tera
27Auno mweleko wa Tera. Tera kamweleka Abramu, Nahori na Harani. Harani tsakamweleka Lutu. 28Harani tsakafila Uri isi ya Wakalidayo, hanu hayelekighwe, aku aba wake yang'ali mghima. 29Abramu na Nahori tsawakwela. Pinga wa Abramu tsakakemighwa Sarai na pinga wa Nahori tsakakemighwa Milika, Milika tsakakala neghe Harani, Halani pfipfila tsakakala aba wa Isika. 30Sarai tsakakala tasa, tsakahela iwana.
31Tera kamsola Abramu iyali imwanaghe, na mtsukulu wake, Loti imwana wa Harani, na mwalifala wake Sarai, pinga wa Abramu, wose tsawalawa Uri isi ya Wakalidayo waghenda Kanaani. Lekeni hawapfikile Harani, wakala baho. 32Tera kafila Harani aku kana miyaka miya mbili na mitano.
Currently Selected:
Mwanduso 11: LBV
Highlight
Share
Compare
Copy
Want to have your highlights saved across all your devices? Sign up or sign in
