Roˉma‸ li‸ 7

Awˬ hpawˇ awˬ miˇ awˬ lawn tawˇ pa haˉ

1Awˬ viˉ awˬ nyi teˇ hpaˍ-oˬ, chaw teˇ gʼaˇ te‸ chehˇ ve awˬ yanˇ awˬ hkʼaw lo ceh tiˉ yawˇ awˬliˇtawˇhkawˇ awˬ hawˉ lo chehˇ ve hta‸ nawˬ hui maˇ shiˍ laˇ. (Ngaˬ chi hkʼe kʼoˆ ve lehˬ, awˬliˇtawˇhkawˇ shiˍ paˍ hui hta‸ kʼoˆ ve yoˬ.) 2Awˬ lawn kʼo, awˬ miˇ ma teˇ gʼaˇ yawˇ ve awˬ hpawˇ te‸ chehˇ ve awˬ yanˇ awˬ hkʼaw lo, awˬliˇtawˇhkawˇ lehˬ, awˬ miˇ ma oˇ ve hta‸ yawˇ ve awˬ hpawˇ geh hpeh ka taˍ ve yoˬ. Ya‸ hkʼaˇ awˬ hpawˇ suh peuˬ ve kʼo, awˬ hpawˇ hta‸ caˉ da‸ ve awˬ liˇ hta‸ awˬ miˇ ma gʼa ponˬ peuˬ. 3Chi hta‸ pa taw, yawˇ ve awˬ hpawˇ maˇ suh sheˍ htaˇ, awˬ kaˍ awˬ nu hawˉ hkʼaˆ teˇ gʼaˇ hta‸ ca heuˆ ve kʼo, haˉ chawˇ haˉ paˆ te shehˍ ma teh‸ shu yawˇ hta‸ kʼoˆ tuˬ yoˬ. Ya‸ hkʼaˇ yawˇ ve awˬ hpawˇ suh peuˬ ve kʼo, awˬ liˇ tawˇ hkawˇ oˇ ve hta‸ ponˬ peuˬ ve pa taw, awˬ kaˍ awˬ nu hawˉ hkʼaˆ teˇ gʼaˇ hta‸ ca heuˆ ve htawˇ, yawˇ haˉ chawˇ haˉ paˆ te shehˍ ma maˇ heˆ. 4Ngaˬ awˬ viˉ awˬ nyi teˇ hpaˍ-oˬ, chi hkʼa shuˍ shuˍ nawˬ hui Hkri‸ ve awˬ to geh teˇ geh suh peuˬ ve pa taw, awˬ liˇ tawˇ hkawˇ hta‸ maˇ kʼaw‸ caˉ da‸. Hkʼe te leh, ngaˬ hui Gʼuiˬsha awˬ pon awˬ shiˍ naw‸ la hpeh‸ tuˬ, suh kuiˬ lo kʼaw‸ te‸ tu la peuˬ ve awˬ kaˍ awˬ nu teˇ gʼaˇ hta‸ nawˬ hui heuˆ da‸ peuˬ. 5Awˬ lawn kʼo, ngaˬ hui lehˬ awˬ suhˍ awˬ shaˍ a loˍ awˬ hkʼaˇ suh kʼai chehˇ ve teˇ yanˇ, suh ve teˇ ceuˬ awˬ pon awˬ shiˍ naw‸ la tuˬ, venˇ baˆ te gaˇ ve nyi ma teˇ ceuˬ lehˬ ngaˬ hui ve awˬ to awˬ hkʼeun teˇ hpaˍ awˬ hkʼaw lo kanˉ te chehˇ ve yoˬ. Venˇbaˆ te gaˇ ve nyi ma oˇ ve lehˬ, awˬliˇtawˇhkawˇ hta‸ pa taw nawˇ la ve yoˬ. 6Ya‸ hkʼaˇ, chi beu‸ ngaˬ hui awˬliˇtawˇhkawˇ hta‸ ponˬ peuˬ. Ponˬ laˬ htaˇ ngaˬ hui hta‸ hpeh tiˍ taˍ ve teˇ ceuˬ hta‸ ngaˬ hui suh taˉ peuˬ ve pa taw, chi beu‸ ngaˬ hui kanˉ te ve lehˬ, bvuh‸ taˍ ve awˬ liˇ awˬ piˍ awˬ hawˉ lo te ve maˇ heˆ. Ya‸ hkʼaˇ, Awˬ ha hpu hta‸ caˉ da‸ ve nyi ma awˬ suhˉ awˬ hkʼaw lo ngaˬ hui te ve yoˬ.

Ngaˬ hui awˬ hkʼaw lo cawˬ ve venˇbaˆ

7Hkʼe te leh, ngaˬ hui hkʼaˬ hkʼe gʼa kʼoˆ tuˬ le. Awˬliˇtawˇhkawˇ lehˬ, venˇbaˆ hpeh‸ ve laˇ. Maˇ heˆ taˬ. Ya‸ hkʼaˇ awˬliˇtawˇhkawˇ maˇ cawˬ ve kʼo, venˇbaˆ hta‸ ngaˬ maˇ shiˍ. Awˬ lawn kʼo, Shu mawˇ shu jeˬ hta‸ taˇ sheˉ lai teh‸ awˬliˇtawˇhkawˇ maˇ kʼoˆ ve kʼo, sheˉ lai ve teˇ ceuˬ hta‸ ngaˬ maˇ shiˍ. 8Ya‸ hkʼaˇ venˇbaˆ lehˬ, awˬliˇtawˇhkawˇ hta‸ pa taw awˬ yanˇ cawˇ ve hta‸ gʼa leh, ngaˬ awˬ hkʼaw lo sheˉ lai ve laiˉ ceuˬ te tawˆ la piˇ lawˬ ve yoˬ. Awˬ lawn kʼo, awˬ liˇ tawˇ hkawˇ maˇ cawˬ ve kʼo, venˇbaˆ lehˬ suh taˍ ve yoˬ. 9Ponˬ laˬ htaˇ, awˬliˇtawˇhkawˇ hta‸ maˇ caˉ da‸ ve awˬ hkʼaw lo ngaˬ te‸ chehˇ ve yoˬ. Ya‸ hkʼaˇ, awˬliˇtawˇhkawˇ gaˬ la htaˇ, venˇbaˆ te‸ la leh ngaˬ suh ve yoˬ. 10Awˬliˇtawˇhkawˇ chi hta‸ pa taw ngaˬ co ha gʼa te‸ tuˬ ve teh‸ dawˇ ve ka‸, ngaˬ awˬ pon suh ve teˇ ceuˬ hpeh‸ ve hta‸ gʼa mawˬ ve yoˬ. 11Awˬ lawn kʼo venˇbaˆ lehˬ, awˬ liˇ tawˇ hkawˇ hta‸ pa taw awˬ yanˇ cawˇ ve hta‸ gʼa leh, ngaˬ hta‸ heˍ laˇ ve awˬ hkʼoˆ ka‸, oˇ ve hta‸ yehˇ leh ngaˬ hta‸ tiˇ pehˍ laˇ ve yoˬ.

12Hkʼe te leh, awˬliˇtawˇhkawˇ lehˬ, da‸ kehˬ ve yoˬ. Piˇ taˍ ve tawˇ hkawˇ htawˇ, da‸ ve kehˬ ve, hteˇ ve cawˇ ve leh, da‸ jaˇ ve teˇ ceuˬ yoˬ.

13Hkʼe te leh da‸ ve awˬ ceuˬ lehˬ, ngaˬ hta‸ suh tuˬ te laˇ ve laˇ. Chi hkʼe maˇ heˆ taˬ. Venˇbaˆ lehˬ, awˬ tehˬ awˬ na venˇbaˆ hpeh‸ ve hta‸ hkʼa tawˍ lehˆ tawˆ la tuˬ, venˇbaˆ lehˬ da‸ ve awˬ ceuˬ hta‸ yehˇ leh ngaˬ hta‸ suh tuˬ te laˇ ve yoˬ. Hkʼe te leh, piˇ taˍ ve awˬ liˇ tawˇ hkawˇ hta‸ pa taw, venˇbaˆ hkʼaˬ ma haiˬ jaˇ ve hkʼa tawˍ lehˆ tawˆ la ve yoˬ.

14Awˬliˇtawˇhkawˇ lehˬ, co ha hta‸ caˉ da‸ ve teh‸ ngaˬ hui shiˍ ve yoˬ. Ya‸ hkʼaˇ ngaˬ lehˬ, awˬ suhˍ awˬ shaˍ hta‸ caˉ da‸ leh, venˇbaˆ vuiˬ yuˬ taˍ ve awˬ ceˬ hpeh‸ ve yoˬ. 15Ngaˬ te ve teˇ hpaˍ hta‸ ngaˬ ca dawˇ maˇ tawˆ. Ngaˬ te gaˇ ve teˇ hpaˍ hta‸ ngaˬ maˇ te leh, ngaˬ canˇ jaˇ ve teˇ hpaˍ hta‸ ngaˬ te ve yoˬ. 16Ya‸ hkʼaˇ, maˇ te gaˇ ve hta‸ ngaˬ te ve kʼo, awˬliˇtawˇhkawˇ lehˬ da‸ ve yoˬ teh‸ ngaˬ hkanˍ ve yoˬ. 17Hkʼe te leh maˇ da‸ ve oˇ ve hta‸ chi beu‸ ngaˬ awˬ to te ve maˇ heˆ. Ngaˬ awˬ hkʼaw lo chehˇ taˍ ve venˇbaˆ te ve yoˬ. 18Ngaˬ ve awˬ suhˍ awˬ shaˍ awˬ to chi awˬ hkʼaw lo, da‸ ve teˇ ceuˬ a ciˉ ka‸ maˇ cawˬ ve hta‸ ngaˬ shiˍ ve yoˬ. Da‸ ve hta‸ te gaˇ ve nyi ma cawˬ htawˇ, da‸ ve hta‸ ngaˬ te maˇ puiˉ. 19Awˬ lawn kʼo, ngaˬ lehˬ da‸ ve hta‸ te gaˇ ve ka‸ maˇ te. Maˇ te gaˇ ve awˬ haiˬ hta‸ ngaˬ te ve yoˬ. 20Ngaˬ maˇ te gaˇ ve hta‸ ngaˬ te ve kʼo, ngaˬ awˬ to oˇ ve hta‸ te ve maˇ heˆ. Ngaˬ awˬ hkʼaw lo chehˇ taˍ ve venˇbaˆ te ve yoˬ.

21Hkʼe te leh, ngaˬ da‸ ve hta‸ te gaˇ ve teˇ yanˇ, awˬ haiˬ teˇ ceuˬ ngaˬ geh chehˇ taˍ ve awˬ liˇ hta‸ ngaˬ gʼa mawˬ ve yoˬ. 22Ngaˬ ve nyi ma hkʼaw lo tiˉ kʼo, Gʼuiˬsha ve awˬliˇtawˇhkawˇ hta‸ ngaˬ ha lehˬ ve yoˬ. 23Ya‸ hkʼaˇ, ngaˬ ve awˬ to awˬ hkʼeun teˇ hpaˍ awˬ hkʼaw lo, awˬ kaˍ awˬ nu awˬ liˇ hta‸ ngaˬ gʼa mawˬ ve yoˬ. Awˬ liˇ chi teˇ maˬ lehˬ, ngaˬ ve nyi ma dawˇ hkʼaˇ hta‸ bawˆ da‸ chehˇ leh, ngaˬ ve awˬ to awˬ hkʼeun teˇ hpaˍ awˬ hkʼaw lo cawˬ ve venˇbaˆ teˇ ceuˬ ngaˬ hta‸ hpeh kʼai tuˬ ka‸ te chehˇ ve yoˬ. 24Ngaˬ lehˬ hpeh‸ bawˬ jaˇ, dawˇ haˍ jaˇ ve chaw teˇ gʼaˇ hpeh‸ ve yoˬ. Ngaˬ hta‸ suh piˇ lawˬ puiˉ ve awˬ to chi awˬ hkʼaw lo a shu ponˬ laˇ tuˬ le. 25Ngaˬ hui ve Jawˇmawˇ Yeˍsuˆ Hkri‸ ponˬ laˇ ve pa taw, Gʼuiˬsha hta‸ chiˇ mvuh ve yoˬ.

Hkʼe te leh, ngaˬ ve nyi ma dawˇ hkʼaˇ lehˬ, Gʼuiˬsha ve awˬ liˇ awˬ hkʼaˇ hta‸ cawˇ ve hkʼe te ve yoˬ. Ya‸ hkʼaˇ, ngaˬ ve awˬ suhˍ awˬ shaˍ lehˬ, venˇbaˆ ve awˬ liˇ awˬ hkʼaˇ hta‸ cawˇ ve hkʼe te ve yoˬ.

Currently Selected:

Roˉma‸ li‸ 7: LHBE

Highlight

Copy

Compare