Roˉma‸ li‸ 8

Awˬ ha hpu awˬ hkʼaw lo chehˇ ve awˬ lawn

1Hkʼe te leh, Yeˍsuˆ Hkri‸ awˬ hkʼaw lo chehˇ ve chaw teˇ hpaˍ hta‸ chi beu‸ ciˍ yanˍ tuˬ maˇ kʼaw‸ cawˬ. 2Awˬ lawn kʼo, Yeˍsuˆ Hkri‸ awˬ hkʼaw lo co ha te‸ piˇ lawˬ ve Awˬ ha hpu ve awˬ liˇ awˬ hkʼaˇ lehˬ, venˇbaˆ ve awˬ liˇ awˬ hkʼaˇ awˬ hkʼaw lo leh, suh ve awˬ liˇ awˬ hkʼaˇ awˬ hkʼaw lo ngaˬ hta‸ hpehˇ laˇ peuˬ. 3Awˬ suhˍ awˬ shaˍ hta‸ pa taw, awˬ liˇ tawˇ hkawˇ awˬ gʼaˇ nuˇ leh te maˇ gʼa ve awˬ ceuˬ hta‸ Gʼuiˬsha te taˍ peuˬ. Venˇbaˆ yaˇ awˬ pon Gʼuiˬsha yawˇ ve Yaˇ hpu hta‸ peu laˇ ve yoˬ. Yaˇ hpu lehˬ, venˇbaˆ awˬ pon tanˇ tuˬ hpeh‸ tuˬ, venˇbaˆ yaˇ hui awˬ to cawˬ ve hkʼa shuˍ shuˍ awˬ to cawˬ ve yoˬ. Hkʼe te leh, venˇbaˆ yaˇ hui awˬ hkʼaw lo cawˬ ve venˇbaˆ hta‸ Gʼuiˬsha ciˍ yanˍ piˇ ve yoˬ. 4Yawˇ chi hkʼe te ve lehˬ, ngaˬ hui awˬ suhˍ awˬ shaˍ awˬ hkʼaˇ suh maˇ kʼai leh, Awˬ ha hpu awˬ hkʼaˇ suh kʼai ve chaw teˇ hpaˍ awˬ hkʼaw lo, awˬliˇtawˇhkawˇ kʼoˆ taˍ ve hkʼe biˇ la tuˬ awˬ pon yawˇ te ve yoˬ. 5Awˬ lawn kʼo, awˬ suhˍ awˬ shaˍ hta‸ caˉ da‸ ve chaw teˇ hpaˍ lehˬ, awˬ suhˍ awˬ shaˍ hpawˇ hta‸ dawˇ nyi tcuhˉ taˍ ve nyi ma cawˬ ve yoˬ. Ya‸ hkʼaˇ, Awˬ ha hpu hta‸ caˉ da‸ ve chaw teˇ hpaˍ lehˬ, Awˬ ha hpu hta‸ caˉ da‸ ve awˬ ceuˬ teˇ hpaˍ hta‸ dawˇ nyi tcuhˉ taˍ ve nyi ma cawˬ ve yoˬ. 6Awˬ suhˍ awˬ shaˍ hta‸ dawˇ nyi tcuhˉ taˍ ve nyi ma lehˬ, suh ve awˬ ceuˬ hpeh‸ ve yoˬ. Awˬ ha hpu hta‸ dawˇ nyi tcuhˉ taˍ ve nyi ma lehˬ, co ha te‸ ve leh dawˇ sha ve awˬ ceuˬ hpeh‸ ve yoˬ. 7Awˬ lawn kʼo, awˬ suhˍ awˬ shaˍ hta‸ dawˇ nyi tcuhˉ taˍ ve nyi ma lehˬ, Gʼuiˬsha hta‸ canˇ jaˇ ve yoˬ. Gʼuiˬsha ve awˬ liˇ tawˇ hkawˇ awˬ hawˉ lo maˇ chehˇ ve awˬ hkʼoˆ ka‸, chehˇ maˇ hpeh‸ taˬ. 8Awˬ suhˍ awˬ shaˍ awˬ hkʼaˇ suh kʼai ve chaw hui lehˬ, Gʼuiˬsha nyi ma cawˇ tuˬ te maˇ gʼa.

9Ya‸ hkʼaˇ, Gʼuiˬsha ve Awˬ ha hpu nawˬ hui awˬ hkʼaw lo chehˇ tehˬ ve kʼo, nawˬ hui awˬ suhˍ awˬ shaˍ a loˍ awˬ hkʼaˇ suh kʼai tuˬ maˇ heˆ. Awˬ ha hpu awˬ hkʼaˇ suh kʼai tuˬ ve yoˬ. Chaw teˇ gʼaˇ gʼaˇ awˬ hkʼaw lo Hkri‸ ve Awˬ ha hpu maˇ chehˇ ve kʼo, yawˇ Hkri‸ hta‸ maˇ caˉ da‸. 10Ya‸ hkʼaˇ, Hkri‸ nawˬ hui awˬ hkʼaw lo chehˇ ve kʼo, awˬ to lehˬ venˇbaˆ hta‸ pa taw suh peuˬ ve htawˇ, co ha lehˬ hteˇ ve cawˇ ve teˇ ceuˬ hta‸ pa taw te‸ chehˇ ve yoˬ. 11Chi hkʼoˆ ka‸, Yeˍsuˆ hta‸ suh kuiˬ lo kʼaw‸ te‸ tu la piˇ shehˍ hpaˇ ve Awˬ ha hpu nawˬ hui awˬ hkʼaw lo chehˇ taˍ ve kʼo, Yeˍsuˆ Hkri‸ hta‸ suh kuiˬ lo kʼaw‸ te‸ tu la piˇ shehˍ hpaˇ lehˬ, nawˬ hui suh puiˉ ve awˬ to hta‸ htawˇ kʼaw‸ te‸ tu la piˇ tuˬ yoˬ. Nawˬ hui awˬ hkʼaw lo chehˇ ve yawˇ ve Awˬ ha hpu hta‸ cuˇ leh yawˇ chi hkʼe kʼaw‸ te‸ tu la piˇ tuˬ yoˬ.

12Hkʼe te leh, awˬ viˉ awˬ nyi teˇ hpaˍ-oˬ, ngaˬ hui lehˬ awˬ suhˍ awˬ shaˍ a loˍ awˬ hkʼaˇ suh kʼai tuˬ, awˬ suhˍ awˬ shaˍ geh jeˬ pfuhˇ taˍ ve chaw hpeh‸ ve maˇ heˆ. 13Awˬ lawn kʼo, nawˬ hui lehˬ awˬ suhˍ awˬ shaˍ a loˍ awˬ hkʼaˇ suh a sha‸ te‸ ve kʼo, nawˬ hui gʼa suh tuˬ yoˬ. Ya‸ hkʼaˇ, nawˬ hui lehˬ Awˬ ha hpu hta‸ cuˇ leh awˬ to te ve kanˉ teˇ hpaˍ hta‸ suh piˇ lawˬ ve kʼo, nawˬ hui co ha gʼa te‸ tuˬ yoˬ. 14Gʼuiˬsha ve Awˬ ha hpu shiˍ kʼai sheh kʼai ve chaw teˇ hpaˍ lehˬ, Gʼuiˬsha ve awˬ yaˇ awˬ duˬ hpeh‸ ve yoˬ. 15Awˬ lawn kʼo, nawˬ hui teˇ pawˆ kʼaw‸ kawˆ tuˬ, awˬ ceˬ ve nyi ma hta‸ gʼa ve maˇ heˆ. Nawˬ hui awˬ yaˇ ve nyi ma hta‸ gʼa ve yoˬ. Hkʼe te leh, Aˍbaˆ a pa-oˬ teh‸ ngaˬ hui yawˇ hta‸ kuˬ hpeh‸ ve yoˬ. 16Ngaˬ hui Gʼuiˬsha ve awˬ yaˇ hpeh‸ ve yoˬ teh‸ Awˬ ha hpu lehˬ ngaˬ hui ve nyi ma geh teˇ geh shaˉ hkiˆ hkanˍ ve yoˬ. 17Awˬ yaˇ hpeh‸ ve kʼo, awˬ shinˉ caˇ shehˍ hpaˇ ka‸ hpeh‸ ve yoˬ. Hkri‸ geh teˇ geh awˬ me‸ awˬ hponˇ gʼa tuˬ yawˇ geh teˇ geh ngaˬ hui gʼa tu‸ gʼa hkanˍ ve kʼo, Gʼuiˬsha ve awˬ shinˉ caˇ shehˍ hpaˇ hpeh‸ leh, Hkri‸ geh teˇ geh awˬ shinˉ hta‸ ngaˬ hui gʼa caˇ tuˬ yoˬ.

18Chi beu‸ teˇ yanˇ awˬ hkʼaw lo gʼa tu‸ gʼa hkanˍ ve lehˬ, awˬ hkʼaw‸ nawˉ ngaˬ hui hta‸ hpeu‸ maˍ laˇ tuˬ ve awˬ me‸ awˬ hponˇ hta‸ tehˆ nyi maˇ keunˍ ve teh‸ ngaˬ dawˇ ve yoˬ. 19Hpanˍ taˍ te taˍ ve awˬ ceuˬ hkʼa peu-eˬ lehˬ, Gʼuiˬsha ve awˬ yaˇ teˇ hpaˍ hkʼa tawˍ lehˆ tawˆ la ve hta‸ gʼa mawˬ tuˬ, dawˇ law jaˇ leh law chehˇ taˍ ve yoˬ. 20Awˬ lawn kʼo, hpanˍ taˍ te taˍ ve hkʼa peu-eˬ lehˬ, te‸ chiˉ te maˇ gʼa ve awˬ hkʼaw lo gʼa chehˇ taˍ ve yoˬ. Yawˇ hkʼaˇ yawˇ chehˇ gaˇ ve hta‸ pa taw maˇ heˆ. Yawˇ hta‸ chehˇ tcuh shehˍ hpaˇ ve a loˍ hta‸ pa taw gʼa chehˇ taˍ ve yoˬ. 21Hpanˍ taˍ te taˍ ve hkʼa peu-eˬ lehˬ, luˬ ve sheˆ ve awˬ ceuˬ awˬ hawˉ lo awˬ ceˬ te ve hta‸ gʼa ponˬ leh, Gʼuiˬsha ve awˬ yaˇ awˬ duˬ teˇ hpaˍ ve awˬ me‸ awˬ hponˇ hta‸ caˉ da‸ ve ponˬ ve teˇ ceuˬ hta‸ gʼa tuˬ, yawˇ hui dawˇ law chehˇ ve yoˬ. 22Chi beu‸ hkʼa gaˬ hpanˍ taˍ teˍtaˍ ve awˬ ceuˬ hkʼa peu-eˬ lehˬ, teˇ geh hkʼanˇ chehˇ leh, teˇ geh tu‸ jaˇ hkanˍ jaˇ chehˇ ve hta‸ ngaˬ hui shiˍ ve yoˬ. 23Hpanˍ taˍ ve awˬ ceuˬ ceh tiˉ maˇ heˆ. Awˬ ha hpu ve awˬ bon hta‸ awˉ lawˉ gʼa peuˬ ve ngaˬ hui htawˇ, awˬ yaˇ awˬ tehˬ awˬ na hpeh‸ la leh, awˬ to chi htaiˍ hkʼaw‸ gʼa tuˬ ve hta‸ ngaˬ hui law chehˇ htaˇ, nyi ma awˬ hkʼaw lo hkʼanˇ chehˇ ve yoˬ. 24Awˬ lawn kʼo, dawˇ law ve awˬ hkʼaw lo ngaˬ hui htaiˍ hkʼaw‸ ve hta‸ gʼa ve yoˬ. Dawˇ law taˍ ve hta‸ gʼa mawˬ peuˬ ve kʼo, kʼaw‸ dawˇ law tuˬ maˇ loˍ. Gʼa mawˬ peuˬ ve awˬ ceuˬ hta‸ a shu teˇ gʼaˇ kʼaw‸ dawˇ law tuˬ sheˍ le. 25Ya‸ hkʼaˇ, ngaˬ hui maˇ mawˬ ve awˬ ceuˬ hta‸ dawˇ law chehˇ ve kʼo, oˇ ve hta‸ ngaˬ hui yeunˇ hkanˍ leh law chehˇ taˍ ve yoˬ.

26Chi hkʼa shuˍ shuˍ, ngaˬ hui awˬ gʼaˇ nuˇ ve hta‸ Awˬ ha hpu ga laˇ ve yoˬ. Awˬ lawn kʼo, ngaˬ hui bon hkʼaˬ hkʼe te lawˬ cawˇ ve hta‸ ngaˬ hui maˇ shiˍ. Ya‸ hkʼaˇ, Awˬ ha hpu lehˬ hkʼanˇ ve awˬ hkʼaw lo ngaˬ hui awˬ pon lawˬ hkawˉ ve yoˬ. Yawˇ hkʼanˇ ve lehˬ, tawˇ yaw maˇ tawˆ leh hkʼanˇ ve teˇ ceuˬ hpeh‸ ve yoˬ. 27Nyi ma hta‸ ca nyi shehˍ hpaˇ lehˬ, Awˬ ha hpu ve dawˇ hkʼaˇ hta‸ shiˍ ve yoˬ. Awˬ lawn kʼo, Gʼuiˬsha ve a loˍ cawˇ ve hkʼe, Hkri‸ yaˇ hui awˬ pon Awˬ ha hpu lawˬ hkawˉ ve yoˬ.

Leuˉ leh gʼaˇ shehˍ hpaˇ hpeh‸ ve

28Gʼuiˬsha hta‸ hkʼa ha‸ ve chaw hui awˬ pon, hkʼa peu-eˬ awˬ hkʼaw lo da‸ ve awˬ ceuˬ yawˇ te tawˆ la ve hta‸ ngaˬ hui shiˍ ve yoˬ. Gʼuiˬ sha yawˇ dawˇ taˍ ve hkʼe hpeh‸ la tuˬ awˬ pon, yawˇ hui hta‸ kuˬ yuˬ taˍ ve yoˬ. 29Awˬ gʼuˇ suhˍ htaˇ ka‸ yawˇ shiˍ taˍ ve chaw teˇ hpaˍ lehˬ, yawˇ ve Yaˇ hpu awˬ ho‸ awˬ han hkʼa shuˍ shuˍ hpeh‸ la tuˬ, Gʼuiˬsha yawˇ hui hta‸ awˉ lawˉ htaˇ ka‸ fuiˍ teh taˍ ve yoˬ. Aˬ hto‸ ma hta‸ pa taw le teh‸ kʼoˆ kʼo, awˬ viˉ awˬ nyi maˇ ve awˬ hkʼaw lo Yaˇ hpu lehˬ, yaˇ uiˍ hpeh‸ tuˬ ve awˬ pon Gʼuiˬsha te ve yoˬ. 30Awˉ lawˉ htaˇ ka‸ yawˇ fuiˍ teh taˍ ve chaw hui hta‸ yawˇ kuˬ yuˬ ve yoˬ. Kuˬ yuˬ taˍ ve chaw hui hta‸ htawˇ, yawˇ hteˇ ve cawˇ ve chaw hpeh‸ piˇ lawˬ ve yoˬ. Hteˇ ve cawˇ ve chaw hpeh‸ piˇ lawˬ peuˬ ve chaw hui hta‸ htawˇ, yawˇ awˬ me‸ awˬ hponˇ piˇ ve yoˬ.

Yeˍsuˆ Hkri‸ awˬ hkʼaw lo Gʼuiˬsha ve ha‸ pehnˇ ve teˇ ceuˬ

31Hkʼe te leh, awˬ lawn chi teˇ hpaˍ hta‸ aˬ hto‸ ma kʼoˆ tuˬ cawˬ le. Gʼuiˬsha ngaˬ hui hpawˇ chehˇ ve kʼo, a shu ngaˬ hui hta‸ tawˍ da‸ hpeh‸ tuˬ le. 32Yawˇ ve Yaˇ hpu hta‸ yawˇ maˇ ponˬ piˇ leh, ngaˬ hui hkʼa peu-eˬ awˬ pon yawˇ hta‸ chiˇ a‸ piˇ shehˍ hpaˇ Gʼuiˬsha lehˬ, yawˇ ve Yaˇ hpu geh teˇ geh hkʼa cawˬ ve hkʼa peu-eˬ ngaˬ hui hta‸ pe‸ laˇ tuˬ maˇ heˆ laˇ. 33Gʼuiˬsha leuˆ yuˬ taˍ ve chaw hui hta‸ a shu venˇbaˆ taˍ hpeh‸ tuˬ le. Hteˇ ve cawˇ ve chaw hpeh‸ la piˇ lawˬ shehˍ hpaˇ lehˬ Gʼuiˬsha yoˬ. 34Venˇbaˆ cawˬ ve teh‸ a shu suhˉ taˆ hpeh‸ tuˬ le. Hkanˍ suh shehˍ hpaˇ lehˬ Yeˍsuˆ Hkri‸ yoˬ. Yawˇ hkanˍ suh ve ceh tiˉ maˇ heˆ, suh kuiˬ lo yawˇ kʼaw‸ te‸ tu la leh, Gʼuiˬsha ve la‸ sha paˉ lo chehˇ taˍ leh, ngaˬ hui awˬ pon lawˬ hkawˉ chehˇ ve maˇ heˆ laˇ. 35Hkri‸ ve ha‸ pehnˇ ve awˬ hkʼaw lo, a shu ngaˬ hui hta‸ yuˬ hpaˆ laˇ hpeh‸ tuˬ le. Tu‸ ve hkanˍ ve, dawˇ tui‸ gaˇ tui‸ ve, fawˉ ve mehˍ ve, meu‸ ve kaˆ ve, veu‸ kʼaˇ maˇ cawˬ ve, kawˆ tuˬ ve, aˉ hte‸ aˉ htaw, chi teˇ hpaˍ laˇ. 36Li‸ hpu hkʼaw bvuh‸ taˍ ve hkʼe,

Nawˬ awˬ pon teˇ nyi tanˇ vanˇ ngaˬ hui

tiˇ pehˍ ve hta‸ gʼa hkanˍ chehˇ ve yoˬ.

Tiˇ pehˍ tuˬ awˬ pon teh taˍ ve

yawˬ hkʼa shuˍ shuˍ ngaˬ hui hta‸ shu shawˍ taˍ laˇ ve yoˬ teh‸ bvuh‸ taˍ ve yoˬ.#Chi 44:22

37Ya‸ hkʼaˇ ngaˬ hui hta‸ ha‸ ve chaw teˇ gʼaˇ hta‸ pa taw, chi hkʼa peu-eˬ hta‸ ngaˬ hui leuˉ leh gʼaˇ shehˍ hpaˇ hpeh‸ chehˇ taˍ peuˬ. 38Awˬ lawn kʼo, suh ve teˇ ceuˬ maˇ kʼoˆ, te‸ ve teˇ ceuˬ maˇ kʼoˆ, mvuhˇ naw ma tcuh yaˇ teˇ hpaˍ maˇ kʼoˆ, jawˇmawˇ teˇ hpaˍ maˇ kʼoˆ, chi beu‸ cawˬ taˍ ve awˬ ceuˬ maˇ kʼoˆ, awˬ hkʼaw‸ nawˉ cawˬ la tuˬ ve awˬ ceuˬ maˇ kʼoˆ, 39kanˇ paˆ maˇ kʼoˆ, mvuh ve teˇ ceuˬ maˇ kʼoˆ, naˉ ve teˇ ceuˬ maˇ kʼoˆ, hkʼa hpanˍ taˍ ve awˬ kaˍ awˬ nu hkʼaˬ ve teˇ ceuˬ htawˇ maˇ kʼoˆ, ngaˬ hui Jawˇmawˇ Yeˍsuˆ Hkri‸ hta‸ pa taw, Gʼuiˬsha ve ha‸ pehnˇ ve awˬ hkʼaw lo ngaˬ hui hta‸ yuˬ hpaˆ laˇ maˇ hpeh‸ ve teh‸ ngaˬ yonˍ tehˬ ve yoˬ.

Currently Selected:

Roˉma‸ li‸ 8: LHBE

Highlight

Compare

Copy